ಬಳ್ಳಾರಿಯಲ್ಲಿ ಮಳೆ ಬಿಡುವು: ಬಿತ್ತನೆ ಕಾರ್ಯ ಚುರುಕು

ಬಳ್ಳಾರಿ: ಸತತ ಸುರಿಯುತ್ತಿದ್ದ ಮಳೆ ಒಂದಷ್ಟು ಬಿಡುವು ನೀಡುತ್ತಿದ್ದಂತೆಯೇ ಜಿಲ್ಲೆಯ ವಿವಿಧೆಡೆ ಬಿತ್ತನೆ ಕಾರ್ಯ ಚುರುಕು ಪಡೆದಿದೆ.ಮಳೆಯಾಶ್ರಿತ ಪ್ರದೇಶಗಳಲ್ಲಿ ಬಿತ್ತನೆ ಕಾರ್ಯ ವೇಗ ಪಡೆದಿದೆ. ಕಳೆದ ವರ್ಷ ಮುಂಗಾರು, ಹಿಂಗಾರಿನಲ್ಲಿ ರೈತರು ಬೆಳೆನಷ್ಟಗೊಂಡಿದ್ದರು. ಆದರೆ, ಈ ಬಾರಿಯ ಪೂರ್ವ ಮುಂಗಾರು ಉತ್ತಮ ಆರಂಭ ನೀಡಿದ್ದು ರೈತರಲ್ಲಿ ಉತ್ತಮ ಫಸಲಿನ ನಿರೀಕ್ಷೆ ಮೂಡಿಸಿದೆ.

ಪೂರ್ವ ಮುಂಗಾರು ಮಳೆ ಶುರುಗೊಳ್ಳುತ್ತಿದ್ದಂತೆಯೇ ಕೃಷಿ ಇಲಾಖೆ ಬಿತ್ತನೆ ಬೀಜ ಅಗತ್ಯ ದಾಸ್ತಾನು ಮಾಡಿಕೊಂಡು ಆಯಾ ರೈತ ಸಂಪರ್ಕ ಕೇಂದ್ರಗಳ ಮೂಲಕ ವಿತರಣೆ ಮಾಡಿದ್ದು, ಮಳೆ ಬೀಳುತ್ತಿದ್ದಂತೆಯೇ ಬಿತ್ತನೆ ಕಾರ್ಯಕ್ಕೆ ಮುಂದಾಗುವ ರೈತರಿಗೆ ಅನುಕೂಲ ಒದಗಿಸಿದೆ.

ಜಿಲ್ಲೆಯಲ್ಲಿ 1,08,943 ಹೆಕ್ಟೇರ್ ಪ್ರದೇಶ ನೀರಾವರಿ ಸೇರಿದಂತೆ ಒಟ್ಟು 1,73,897 ಹೆಕ್ಟೇರ್ ಪ್ರದೇಶವಿದೆ. ಈ ಪೈಕಿ 3570 ಹೆಕ್ಟೇರ್ ನ ನೀರಾವರಿ ಪ್ರದೇಶದಲ್ಲಿ ಬಿತ್ತನೆ ಶುರುವಾಗಿದೆ. 17895 ಹೆಕ್ಟೇರ್‌ನ ಮಳೆಯಾಶ್ರಿತ ಪ್ರದೇಶದಲ್ಲಿ ಬಿತ್ತನೆ ನಡೆದಿದೆ. ಜೂ.21ವರೆಗೆ ಜಿಲ್ಲೆಯಲ್ಲಿ 21,465 ಹೆಕ್ಟೇರ್‌ ಬಿತ್ತನೆಯಾಗಿದೆ. ಶೇ.12 ಬಿತ್ತನೆಯಾಗಿದೆ.

ಜಿಂಕೆ ಹಾವಳಿಗೆ ರೈತರು ಕಂಗಾಲು:

ಬಿತ್ತನೆ ಬೀಜ ದಾಸ್ತಾನಿದೆ. ರೈತ ಸಂಪರ್ಕ ಕೇಂದ್ರಗಳಿಂದ ಖರೀದಿಸಿ ಬಿತ್ತನೆ ಮಾಡುತ್ತಿದ್ದಾರೆ. ಬಿತ್ತನೆಬೀಜ, ರಸಗೊಬ್ಬರ ಕೊರತೆಯಾಗದಂತೆ ನಿಗಾ ವಹಿಸಲಾಗಿದೆ ಎಂದು ಕೃಷಿ ಇಲಾಖೆ ಹೇಳಿದೆ.

ಉತ್ತಮ ಮಳೆಯಿಂದಾಗಿ ಬಿತ್ತನೆ ಶುರುವಾಗಿದೆ. ಬಿತ್ತನೆ ಬೀಜ ಕೊರತೆಯಿಲ್ಲ. ಆದರೆ, ನಮ್ಮ ಭಾಗದಲ್ಲಿ ಜಿಂಕೆ ಕಾಟವಿದೆ. ಅರಣ್ಯ ಇಲಾಖೆ ಈ ಬಗ್ಗೆ ಕ್ರಮ ವಹಿಸಬೇಕು ಎನ್ನುತ್ತಾರೆ ಕಾರೆಕಲ್ಲು ವೀರಾಪುರ (ಬಳ್ಳಾರಿ ತಾಲೂಕು) ರೈತ ಹನುಮನಗೌಡ.