ನರಗುಂದ ತಾಲೂಕಿನಲ್ಲಿ ಹಿಂಗಾರು ಬಿತ್ತನೆಗೆ ಬಾರದ ಬೀಜ!

ಎಸ್.ಜಿ. ತೆಗ್ಗಿನಮನಿ

ತಾಲೂಕಿನ ರೈತರು ಮುಂಗಾರು ಹಂಗಾಮಿನಲ್ಲಿ ಬಿತ್ತನೆ ಮಾಡಿದ್ದ ಹೆಸರು, ಗೋವಿನಜೋಳ ಇತರ ಬೆಳೆಗಳು ಅತಿವೃಷ್ಟಿಯಿಂದ ಸಂಪೂರ್ಣವಾಗಿ ಹಾನಿಯಾಗಿವೆ. ಹಿಂಗಾರು ಹಂಗಾಮಿನಲ್ಲಾದರೂ ಸಮಯಕ್ಕೆ ಸರಿಯಾಗಿ ಬಿತ್ತನೆ ಮಾಡಿ ಉತ್ತಮ ಬೆಳೆ ತೆಗೆಯುವ ಕಾತರದಲ್ಲಿದ್ದ ರೈತರಿಗೆ ನಿರಾಸೆಯಾಗಿದೆ. ಕಾರಣ ಸರ್ಕಾರದಿಂದ ಸಹಾಯಧನದಲ್ಲಿ ನೀಡುವ ಬೀಜಗಳು ರೈತ ಸಂಪರ್ಕ ಕೇಂದ್ರಕ್ಕೆ ಬಂದಿಲ್ಲ. ರೈತರು ಬೀಜ ಖರೀದಿ ಮಾಡಲು ರೈತ ಸಂಪರ್ಕ ಕೇಂದ್ರಕ್ಕೆ ಪ್ರತಿದಿನ ಅಲೆದಾಡುವಂತಾಗಿದೆ.

ಬಿತ್ತನೆ ಬೀಜದ ಬೇಡಿಕೆ: ತಾಲೂಕಿನಲ್ಲಿ ಹಿಂಗಾರು ಹಂಗಾಮಿನಲ್ಲಿ ಜೋಳ- 322.5 ಕೆಜಿ, ಗೋದಿ- 5250 ಕ್ವಿಂಟಲ್, ಕಡಲೆ- 10350 ಕ್ವಿಂಟಲ್, ಕುಸಬೆ-13 ಕ್ವಿಂಟಲ್, ಸೂರ್ಯಕಾಂತಿ- 432.25 ಕೆಜಿ ಸೇರಿ ಒಟ್ಟು 16367 ಕ್ವಿಂಟಲ್ ಬಿತ್ತನೆ ಬೀಜಗಳ ಅವಶ್ಯಕತೆ ಇದೆ ಎಂದು ಕೃಷಿ ಅಧಿಕಾರಿಗಳು ಹೇಳುತ್ತಾರೆ.

ಪ್ರತಿವರ್ಷ ಹಿಂಗಾರು ಬಿತ್ತನೆಗೆ ಬೇಕಾಗುವ ಬೀಜಗಳನ್ನು 15 ದಿನಗಳ ಮುಂಚಿತವಾಗಿ ರೈತ ಸಂಪರ್ಕ ಕೇಂದ್ರದಲ್ಲಿ ಸಂಗ್ರಹ ಇರುತ್ತಿದ್ದವು. ಆದರೆ ಈ ವರ್ಷ ಬಿತ್ತನೆ ದಿನ ಹತ್ತಿರ ಬಂದರೂ ಬೀಜ ಪೂರೈಕೆ ಮಾಡದಿರುವುದು ವಿಷಾದನೀಯ ಎಂದು ರೈತ ಬಸವರಾಜ ಹಡಪದ ತಿಳಿಸಿದರು.