ಗುಲಾಮಗಿರಿ ಒಪ್ಪಿದರೆ ಸಮಾಜ ಸರ್ವನಾಶ: ನಾಗರಾಜಮೂರ್ತಿ

ಕನ್ನಡಪ್ರಭ ವಾರ್ತೆ ಕಲಬುರಗಿ

ಕಲಬುರಗಿಯಲ್ಲಿ ಗುರುವಾರ ನಡೆದ, ಈ ಭಾಗದಲ್ಲಿ ರಂಗಕಲೆಗೆ ನಿರಂತರ ಪ್ರೋತ್ಸಾಹ ನೀಡುತ್ತಿರುವ ರಂಗ ಸಂಗಮ ಕಲಾ ಸಂಸ್ಥೆಯ ಜಂಗಮಶೆಟ್ಟಿ ರಂಗ ಪುರಸ್ಕಾರ ಪ್ರದಾನ ಸಮಾರಂಭದಲ್ಲಿ ಭಾಗವಹಿಸಿ ಅವರು ಮಾತನಾಡಿದರು.

ಸಾಹಿತ್ಯ, ಸಾಂಸ್ಕೃತಿಕ ರಂಗ ಸ್ವತಂತ್ರವಾಗಿ ಕೆಲಸ ನಿರ್ವಹಿಸುತ್ತಿದ್ದರೆ ಮಾತ್ರ ಅಂತಹ ಸಮಾಜ ಚುರುಕಾಗಿರುತ್ತದೆಂದು ಗಾಂಧೀಜಿ ಹೇಳಿದ್ದರು, ಆದರಿಂದು ಈ ಮಾತಿಗೆ ವ್ಯತಿರಿಕ್ತವಾಗಿ ಈ ರಂಗಗಳಲ್ಲಿನ ಬೆಳವಣಿಗೆಗಳು ಸಾಗಿವೆ. ಹೀಗಾಗಿ ಸಾಂಸ್ಕೃತಿಕ, ಸಾಹಿತ್ಯದ ಅಧಃಪತನದತ್ತ ನಾವೆಲ್ಲರೂ ವೇಗವಾಗಿ ಸಾಗಿದ್ದೇವೆಂದು ಆತಂಕ ಹೊರಹಾಕಿದರು.

ಏಕಾಏಕಿ ವಾಲ್ಮೀಕಿ ನಿಗಮದ ನೂರಾರು ಕೋಟಿ ಮಂಗಮಾಯವಾಗುತ್ತದೆ, ಲೈಂಗಿಕ ಕಾರಣಕ್ಕೆ ಒಂದೇ ವಾರದಲ್ಲಿ ಮೂವರು ರಾಜಕಾರಣಿಗಳು ಜೈಲುಪಾಲಾಗುತ್ತಾರೆ. ಇವರಿಗೇನು ಕಮ್ಮಿ ಎಂದು ಸ್ವಾಮೀಜಿಗಳು ಜೈಲು, ಬೇಲು ಎಂದು ಓಡಾಡುತ್ತಿದ್ದಾರೆ. ಅನೇಕರು ಮಾಡಿದ ಅನಾಚಾರ ಜೀರ್ಣಿಸಿಕೊಳ್ಳಲಾಗದೆ ಆತ್ಮಹತ್ಯೆ ಮಾಡಿಕೊಳ್ಳುತ್ತಿದ್ದಾರೆ. ಇವೆಲ್ಲವು ನಾಗರಿಕ ಸಮಾಜದ ಅಧೋಗತಿಗೆ ಹಿಡಿದ ಕನ್ನಡಿ ಎಂದರು.

ಅಂಬಾನಿಯಂತಹ ಉದ್ದಿಮೆದಾರ ಸಾವಿರಾರು ಕೋಟಿ ರುಪಾಯಿ ಮದುವೆಗೆ ವೆಚ್ಚ ಮಾಡುತ್ತಾನೆ, ಅದನ್ನೇ ಮಾಧ್ಯಮದವರು ವೈಭವೀಕರಿಸಿ ತೋರಿಸುತ್ತಾರೆ. ಇಂತಹ ವೈಭವೀಕರಣ ಬೇಕೆ? ದುಂದುವೆಚ್ಚಕ್ಕೆ ಕಡಿವಾಣ ಹಾಕೋಣವೆಂಬ ಸಂದರ್ಭದಲ್ಲಿ ಕೋಟಿಗಟ್ಟಲೇ ವೆಚ್ಚ ಮಾಡೋದು, ಅದೂ ಜನರ ಹಣವನ್ನೇ ವೆಚ್ಚ ಮಾಡುತ್ತಿರುವ ಇಂತಹ ಉದ್ಯಮಪತಿಗಳ ಬಣ್ಣ ಬಯಲು ಮಾಡಬೇಕಿದ್ದ ಮಾಧ್ಯಮದವರು ಅದನ್ನೇ ವೈಭವೀಕರಿಸಿದರು ಎಂದು ವಿಷಾದಿಸಿದರು.

ಹೆಚ್ಚುತ್ತಿರೋ ಅಸಹಿಷ್ಣುತೆ: ಸಮಾಜದಲ್ಲಿ ಒಬ್ಬರನ್ನು ಕಂಡರೆ ಇನ್ನೊಬ್ಬರಿಗೆ ಆಗಂದತಹ ವಾತಾವರಣ ನಿರ್ಮಾಣವಾಗುತ್ತಿದೆ. ಇಂತಹ ಅಸಹಿಷ್ಣುತೆ ಆರೋಗ್ಯಕರ ಸಮಾಜಕ್ಕೆ ಮಾರಕ. ನಂಬಿಕೆ, ಪ್ರೀತಿ ಉಳಿಸಿಕೊಳಂಡು ಸಮ ಸಮಾಜ ನಿರ್ಮಾಣದತ್ತ ನಾವೆಲ್ಲರು ಬಸವಣ್ಣನವರ ತತ್ವಗಳೊಂದಿಗೆ ಸಾಗಬೇಕಿದೆ. ಜಂಗಮಶೆಟ್ಟಿ ಪರಿವಾರ ರಂಗ ಸಂಗಮ ಮೂಲಕ ಎಲೆಮರೆಯಲ್ಲಿರುವಂತಹ ನಿಜವಾದ ಕಲಾವಿದರನ್ನು ಹುಡುಕಿ ಪುರಸ್ಕಾರಸುತ್ತಿರೋದು ಹೆಮ್ಮೆಯ ಸಂಗತಿ. ಈ ಕೆಲಸ ನಿರಂತರ ಸಾಗಲಿ ಎಂದು ಮೂರ್ತಿ ಹಾರೈಸಿದರು.