ನವ ವೃಂದಾವನ ಗಡ್ಡೆಯಲ್ಲಿ ಶ್ರೀ ಪದ್ಮನಾಭ ತೀರ್ಥರ ಪೂರ್ವಾರಾಧನೆ

ಗಂಗಾವತಿ: ತಾಲೂಕಿನ ಆನೆಗೊಂದಿಯ ನವವೃಂದಾವನ ಗಡ್ಡೆಯಲ್ಲಿರುವ ಶ್ರೀ ಪದ್ಮನಾಭತೀರ್ಥರ ಪೂರ್ವಾರಾಧನೆಯನ್ನು ಮಂತ್ರಾಲಯ ಮಠದಿಂದ ನೆರವೇರಿಸಲಾಯಿತು.

ಆನೆಗೊಂದಿಯ ರಂಗನಾಥ ದೇವಸ್ಥಾನದಿಂದ ಮಂತ್ರಾಲಯ ಮಠಾಧೀಶ ಶ್ರೀ ಸುಬುಧೇಂದ್ರತೀರ್ಥ ಶ್ರೀಪಾದಂಗಳವರು ಮತ್ತು ಪ್ರಥಮ ಬಾರಿಗೆ ಆಗಮಿಸಿದ ಸೋದೆ ವಾದಿರಾಜ ಮಠದ ವಿಶ್ವ ವಲ್ಲಭತೀರ್ಥ ಶ್ರೀಪಾದಂಗಳವರನ್ನು ಅದ್ಧೂರಿಯಾಗಿ ಮೆರವಣಿಗೆ ಮೂಲಕ ಸ್ವಾಗತಿಸಲಾಯಿತು. ಆನಂತರ ಉಭಯ ಶ್ರೀಗಳು ಶ್ರೀ ಪದ್ಮನಾಭತೀರ್ಥರ ವೃಂದಾವನಕ್ಕೆ ಪಂಚಾಮೃತಾಭಿಷೇಕ, ಹೂವಿನ ಅಲಂಕಾರ, ಕನಕಾಭಿಷೇಕ, ನೈವೇದ್ಯ, ಮಹಾಮಂಗಳಾರತಿ ನೆರವೇರಿಸಿದರು.

ಈ ಸಂಧರ್ಭದಲ್ಲಿ ಪಂಡಿತ ವಾದಿರಾಜ ಆಚಾರ, ಪಂ. ದ್ವಾರಕನಾಥ ಆಚಾರ, ಪಂ. ಮದ್ವೇಶ ಆಚಾರ ತಂತ್ರಿ, ಪಂ. ನರಹರಿ ಆಚಾರ, ಬಿ.ಎನ್. ವಿಜೇಂದ್ರ ಆಚಾರ, ಪಂ. ವೆಂಕಟ ನರಸಿಂಹ ಆಚಾರ ರಾಜಪುರೋಹಿತ, ವಿಷ್ಣು ಕಶ್ಯಪ, ಮಠದ ವ್ಯವಸ್ಥಾಪಕ ಸುಮಂತ ಕುಲಕರ್ಣಿ, ಸಾಮವೇದ ಗುರುರಾಜ ಆಚಾರ, ವಿಜಯರಾವ್ ಡಣಾಪುರ, ವಾಸುದೇವ ನವಲಿ, ವಿಷ್ಣುತೀರ್ಥ ಜೋಷಿ, ಗುರುರಾಜ ದಿಗ್ಗಾವಿ, ಸುಧೀಂದ್ರ ನವಲಿ ಭಾಗವಹಿಸಿದ್ದರು.

ಆನೆಗೊಂದಿಯ ನವವೃಂದಾವನ ಗಡ್ಡೆಯಲ್ಲಿ ಪದ್ಮನಾಭ ತೀರ್ಥರ ಆರಾಧನೆ ಹಾಗೂ ಪೂಜೆ ವಿವಾದ ಇದ್ದು, ಇದರ ಇತ್ಯರ್ಥಕ್ಕೆ ಅನ್ಯ ಮಠದೊಂದಿಗೆ ಮಾತುಕತೆಗೆ ನಾವು ಸಿದ್ಧರಾಗಿದ್ದೇವೆ ಎಂದು ಮಂತ್ರಾಲಯ ಮಠಾಧೀಶ ಸುಬುಧೇಂದ್ರತೀರ್ಥ ಶ್ರೀಪಾದಂಗಳವರು ಹೇಳಿದರು.ನವವೃಂದಾವನ ಗಡ್ಡೆಯಲ್ಲಿ ಪದ್ಮನಾಭತೀರ್ಥರ ಪೂರ್ವಾರಾಧನೆ ನೆರವೇರಿಸಿದ ಆನಂತರ ಪತ್ರಕರ್ತರೊಂದಿಗೆ ಶ್ರೀಗಳು ಮಾತನಾಡಿದರು. ನವವೃಂದಾವನ ಗಡ್ಡೆಯಲ್ಲಿ ಯತಿಗಳ ಪೂಜೆ ಕುರಿತು ನಾವು 50 ಬಾರಿ ಮಾತುಕತೆಗೆ ಕರೆದಿದ್ದೇವೆ. ಈ ವಿಷಯದಲ್ಲಿ ನಮ್ಮ ಮಠ ಮುಕ್ತವಾಗಿ ಮಾತನಾಡಲು ಸಿದ್ಧರಿದ್ದೇವೆ. ಆದರೆ ಅನ್ಯಮಠದವರು ಗಂಗಾವತಿ ನ್ಯಾಯಾಲಯದಿಂದ ಸರ್ವೋಚ್ಚ ನ್ಯಾಯಾಲಯಕ್ಕೆ ಹೋಗಿದ್ದಾರೆ. ಈಗ ನ್ಯಾಯಾಲಯದಲ್ಲಿ ನಮಗೆ ಜಯ ಸಿಕ್ಕಿದೆ ಎಂದರು.ನವವೃಂದಾವನದಲ್ಲಿರುವ ಯತಿಗಳ ಪೂಜೆ ಗೊಂದಲ ಭಕ್ತರಲ್ಲಿದೆ. ಇದನ್ನು ಬಗೆಹರಿಸಬೇಕಾಗಿದೆ ಎಂದರು.