ಸಂಘಟಿತ ಕಾರ್ಯದಿಂದ ರಾಜ್ಯಮಟ್ಟದ ಪಂದ್ಯಾವಳಿ ಯಶಸ್ವಿ: ಡಾ.ಪುಷ್ಪದಂತ ದಾನಿಗೊಂಡ

ಕನ್ನಡಪ್ರಭ ವಾರ್ತೆ ತೇರದಾಳ(ರ-ಬ)

ದಾನಿಗೊಂಡ ಸಮೂಹ ಸಂಸ್ಥೆಗಳ ಸಿದ್ಧಾಂತ ನಗರದ ಮೈದಾನದಲ್ಲಿ ಬುಧವಾರ ರಾತ್ರಿ ನಡೆದ ಪಾರಿತೋಷಕ ವಿತರಣೆ ಸಮಾರಂಭದಲ್ಲಿ ಮಾತನಾಡಿದ ಅವರು, ರಾಜ್ಯಮಟ್ಟದ ೯೪ ಕಾಲೇಜುಗಳ ೧೫೦೦ ಕ್ರೀಡಾಳುಗಳು, ೬೨ ತರಬೇತುದಾರರು, ೩೨ ನಿರ್ಣಾಯಕರು ಪಾಲ್ಗೊಳ್ಳುವ ಪಂದ್ಯಗಳ ನಿರಾತಂಕ ಸಾಗುವಿಕೆಗೆ ಊಟ, ಉಪಾಹಾರ ಮತ್ತು ವಸತಿ ವ್ಯವಸ್ಥೆಯನ್ನು ಮೊದಲೇ ಮಾಡಿಕೊಳ್ಳಲಾಗಿತ್ತು. ಪಂದ್ಯಗಳು ಸರಾಗವಾಗಿ ಸಾಗಲು ಫ್ಲೂಡ್‌ಲೈಟ್ ವ್ಯವಸ್ಥೆಯ ೬ ಸುಸಜ್ಜಿತ ವಿಶಾಲ ಆಟದ ಮೈದಾನ ಸಜ್ಜುಗೊಳಿಸಲಾಗಿತ್ತು. ಪ್ರಮುಖವಾಗಿ ೧೨ ತಂಡಗಳ ಸಮಿತಿ ರಚಿಸಿ, ಅವುಗಳಿಗೆ ಉಪ ಸಮಿತಿಗಳನ್ನು ಸೇರಿಸಿ ಖಚಿತ ಕಾರ್ಯಗಳ ಉಸ್ತುವಾರಿ ನೇಮಿಸಿದೆವು. ಪ್ರಕೃತಿಯೂ ನಮ್ಮೊಡನೆ ಸಹಕರಿಸಿದ ಕಾರಣ ಮಳೆಯು ಅಡ್ಡಿಯಾಗಲಿಲ್ಲ. ಶಿಕ್ಷಣ ಇಲಾಖೆ ತೀರ್ಪುಗಾರರನ್ನು ಕಳಿಸಿದ್ದರಿಂದ ಪಂದ್ಯಾವಳಿ ಪಾರದರ್ಶಕತೆ ಕಾಯ್ದುಕೊಳ್ಳಲು ನೆರವಾಯಿತು. ರಾಜೀವಗಾಂಧಿ ವಿಶ್ವವಿದ್ಯಾಲಯ ಉತ್ತರ ಕರ್ನಾಟಕದಲ್ಲಿ ಪ್ರಥಮ ಬಾರಿಗೆ ಗ್ರಾಮೀಣ ಭಾಗವಾದ ತೇರದಾಳದ ನಮ್ಮ ಸಂಸ್ಥೆಗೆ ರಾಜ್ಯಮಟ್ಟದ ಪಂದ್ಯಾವಳಿ ನಡೆಸಲು ವಿಶ್ವಾಸವಿರಿಸಿ ನೀಡಿದ ಅವಕಾಶವನ್ನು ಯಶಸ್ವಿಯಾಗಿ ನಿರ್ವಹಿಸಿದ ತೃಪ್ತಿ ನಮಗಿದೆ ಎಂದರು.

ವೇದಿಕೆಯಲ್ಲಿ ವಿ.ವಿ.ಕ್ರೀಡಾ ಸಂಯೋಜಕ ಡಾ. ಜೋಸೆಫ್ ಅನೀಲ, ಪ್ರಾಚಾರ್ಯ ಡಾ.ಪ್ರಭಾಕರ ಅಪರಾಜ, ದೈಹಿಕ ಶಿಕ್ಷಣ ನಿರ್ದೇಶಕ ರಾಮು ಹಾಡಕರ ಉಪಸ್ಥಿತರಿದ್ದರು.