ರಾಜ್ಯದ ಜನತೆಗೆ ತುಟ್ಟಿ ಭಾಗ್ಯದ ಬರೆ ಕೊಟ್ಟ ಕಾಂಗ್ರೆಸ್ ಸರ್ಕಾರ: ಮಾಜಿ ಶಾಸಕ ಶಿವರಾಜ ಸಜ್ಜನರ ಕಿಡಿ

ಕನ್ನಡಪ್ರಭ ವಾರ್ತೆ ಹಾನಗಲ್ಲ

ಬುಧವಾರ ಹಾನಗಲ್ಲಿನ ಮಹಾತ್ಮಾಗಾಂಧಿ ವೃತ್ತದಲ್ಲಿ, ಪೆಟ್ರೋಲ್, ಡೀಸೆಲ್ ಹಾಗೂ ಇತರೆ ಎಲ್ಲ ಬೆಲೆ ಏರಿಕೆ ಖಂಡಿಸಿ ಬಿಜೆಪಿ ಆಯೋಜಿಸಿದ್ದ ಪ್ರತಿಭಟನಾ ಸಭೆಯಲ್ಲಿ ಮಾತನಾಡಿದರು. ಅಧಿಕಾರ ಕೊಡಿ ಬೆಲೆ ಇಳಿಸುತ್ತೇವೆ ಎಂದ ಸಿದ್ಧರಾಮಯ್ಯ ಲೋಕಸಭೆ ಚುನಾವಣೆಯ ಹಿಂದೆ ಮುಂದೆ ಕೇವಲ ಬೆಲೆ ಏರಿಕೆಯ ದೊಡ್ಡ ಆಂದೋಲನವನ್ನೇ ಕೈಕೊಂಡಿದ್ದಾರೆ. ಪೆಟ್ರೋಲ್ ಡೀಸೆಲ್ ಬೆಲೆ ಏರಿಕೆಯಿಂದ ಎಲ್ಲ ಅಗತ್ಯ ವಸ್ತುಗಳ ಬೆಲೆಯೂ ಗಗನಕ್ಕೇರಲಿದೆ. ಇದು ರಾಜ್ಯದ ಜನತೆಗೆ ಮಾಡಿದ ಮೋಸ. ನಿತ್ಯ ಹಗರಣಗಳ ಸುಳಿಯಲ್ಲಿರುವ ಕಾಂಗ್ರೆಸ್ ಬೆಲೆ ಏರಿಕೆ ಮೂಲಕ ರಾಜ್ಯದ ಜನತೆಯನ್ನು ಸುಲಿಗೆ ಮಾಡುತ್ತಿದೆ. ಸಾಮಾಜಿಕ ವ್ಯವಸ್ಥೆಯನ್ನು ಅಸ್ಥಿರಗೊಳಿಸುತ್ತಿದೆ. ರಾಜ್ಯದ ಜನತೆ ನಂಬಿ ಮೋಸ ಹೋಗಿದ್ದಾರೆ ಎಂದರು.

ನ್ಯಾಯವಾದಿ ಸೋಮಶೇಖರ ಕೋತಂಬರಿ ಮಾತನಾಡಿ, ಈ ರಾಜ್ಯದಲ್ಲಿ ಮಹಿಳೆಯರಿಗೆ ರಕ್ಷಣೆ ಇಲ್ಲ. ನಿತ್ಯ ಕೊಲೆ ಸುಲಿಗೆಗಳೇ ಈ ಸರಕಾರದ ಭಾಗ್ಯಗಳಾಗಿವೆ. ರೈತರ ಹಿತ ಕಾಯುವ ಗ್ಯಾರಂಟಿ, ಆರೋಗ್ಯ ಗ್ಯಾರಂಟಿ, ಅಭಿವೃದ್ಧಿ ಗ್ಯಾರಂಟಿ ನೀಡಬೇಕಾದ ಸರಕಾರ ಸುಳ್ಳು ಗ್ಯಾರಂಟಿಗಳ ಮೂಲಕ ಕಾಲ ದೂಡುತ್ತಿದೆ. ರಾಜ್ಯದ ಸರಕಾರ ತಮ್ಮ ಅನುಕೂಲಕ್ಕಾಗಿರುವ ಅಕ್ರಮ ಸಕ್ರಮ ಸರಕಾರ. ಆದರೆ, ರೈತರ ಪಂಪಸೆಟ್ ಅಕ್ರಮ ಸಕ್ರಮಕ್ಕೆ ದೊಡ್ಡ ಬೆಲೆ ನಿಗದಿಪಡಿಸಿ ರೈತರ ಗೋಳಿಗೆ ಕಾರಣವಾಗಿದೆ. ರೈತರ ಶಾಪಕ್ಕೆ ಈ ಸರಕಾರ ಗುರಿಯಾಗಿದೆ ಎಂದರು.