ಶ್ರೀಆಂಜನೇಯಸ್ವಾಮಿಯೊಂದಿಗೆ ಕೆರಗೋಡು ಗ್ರಾಮಸ್ಥರ ಭಾವನಾತ್ಮಕ ಸಂಬಂಧ

ಕನ್ನಡಪ್ರಭ ವಾರ್ತೆ ಮಂಡ್ಯ

ಗ್ರಾಮಕ್ಕೆ ಪ್ರವೇಶ ಪಡೆಯುವ ಮೊದಲೇ ಶ್ರೀಕೋಟೆ ಆಂಜನೇಯಸ್ವಾಮಿ ದೇವಾಲಯ ಸಿಗುತ್ತದೆ. ಈ ದೇವಾಲಯದ ದೇವರ ಮೂರ್ತಿ ಶ್ರೀವೀರಾಂಜನೇಯ ನಿಂತಿರುವ ಭಂಗಿಯಲ್ಲಿ ವಿಗ್ರಹ ಕಾಣುತ್ತದೆ. ಇದರ ಬಾಲದಲ್ಲಿ ಗಂಟೆಯಿರುವ ಲಾಂಛನವಿದ್ದು, ಇದು ವ್ಯಾಸರಾಜರ ಪ್ರತಿಷ್ಠಾಪನೆ ಎಂದು ಹೇಳಲಾಗಿದೆ. ಈ ದೇವಾಲಯದ ಕಂಬದ ಮೇಲೂ ಮಹಿಳಾ ಲಾಂಛನವನ್ನು ಗಮನಿಸಿದರೆ ಇದು ಸಹ ಕ್ರಿ.ಶ.೧೬೧೯ರಲ್ಲಿ ಬೆಣ್ಣೆಹೊನ್ನಮ್ಮ ಆಳ್ವಿಕೆಯಲ್ಲಿ ನಿರ್ಮಿಸಿರುವ ಉಲ್ಲೇಖವಿದೆ.

ಅಡಿಕೆಮರದ ಧ್ವಜಸ್ತಂಭ ಶಿಥಿಲಗೊಂಡ ನಂತರ ಒಂದು ಕಬ್ಬಿಣದ ೨೫ ಅಡಿಗೂ ಹೆಚ್ಚು ಇರುವ ಕಂಬ ನಿರ್ಮಿಸಿ ಹನುಮಧ್ವಜ ಹಾರಿಸುತ್ತಾರೆ. ಇದರ ಜೊತೆಯಲ್ಲೇ ಸ್ವಾತಂತ್ರ್ಯ ದಿನಾಚರಣೆ ಮತ್ತು ಗಣರಾಜ್ಯೋತ್ಸವ ದಿನ ರಾಷ್ಟ್ರಧ್ವಜವನ್ನು ಹಾರಿಸಿ ಗೌರವ ನೀಡುತ್ತಾ ಬಂದಿದ್ದಾರೆ.

ಹಾಲಿ ಇರುವ ಧ್ವಜಸ್ತಂಭದಲ್ಲಿ ಹನುಮ ಧ್ವಜ ಹಾರಾಡಬೇಕು. ರಾಷ್ಟ್ರೀಯ ಹಬ್ಬ, ನಾಡಹಬ್ಬದಂದು ರಾಷ್ಟ್ರಧ್ವಜ ಮತ್ತು ಕನ್ನಡ ಧ್ವಜ ಹಾರಾಟಕ್ಕೆ ನಮ್ಮ ಸಹಮತವಿದೆ. ಉಳಿದ ದಿನಗಳಲ್ಲಿ ಶ್ರೀಆಂಜನೇಯಸ್ವಾಮಿ ಧ್ವಜ ಹಾರಾಡಬೇಕು. ಇದು ಒಬ್ಬರ ಭಾವನೆಯಲ್ಲ. ಇಡೀ ಊರಿನವರೆಲ್ಲರ ಒಮ್ಮತದ ಭಾವನೆಯಾಗಿದೆ. ಅದಕ್ಕೆ ವಾರ್ಷಿಕ ಕಿಮ್ಮತ್ತನ್ನು ನೀಡಲು ಸಿದ್ಧರಿದ್ದೇವೆ.

೩೦ ವರ್ಷದಿಂದಲೂ ಈ ಧ್ವಜಸ್ತಂಭ ಇದೆ. ರಾಷ್ಟ್ರಧ್ವಜ ಹಾಗೂ ಕನ್ನಡರಾಜ್ಯೋತ್ಸವ ಜೊತೆಗೆ ಹನುಮಧ್ವಜ ಹಾರಾಡುತ್ತಿತ್ತು, ಪ್ರತಿ ಶನಿವಾರ ಆಂಜನೇಯ ದೇವಾಲಯದಲ್ಲಿ ಭಜನೆ ನಡೆಯುತ್ತಿತ್ತು, ವಿಷ್ಣು ಸಹಸ್ರನಾಮ ಪಾರಾಯಣ, ಯಥಾಪ್ರಕಾರ ಗ್ರಾಮದಲ್ಲಿ ಶಾಂತಿ ಲೆಸುವಂತೆ ಅಧಿಕಾರಿಗಳು ಮಾಡಲಿ.

ಹನುಮಧ್ವಜ ಹಾರಿಸಿ ಇಳಿಸಿದ್ದು ನೋವುಂಟಾಗಿದೆ. ಹೈಟೆಕ್ ಬಸ್ ನಿಲ್ದಾಣ ಮಾಡುತ್ತೇವೆ ಎಂದು ಹೇಳುತ್ತಾರೆ. ಗ್ರಾಮದಲ್ಲಿ ವೈದ್ಯರ ಕೊರತೆಯಿದೆ, ಚರಂಡಿ ವ್ಯವಸ್ಥೆ ಸೇರಿದಂತೆ ರಸ್ತೆ ಸರಿಯಿಲ್ಲ, ಇಂತಹ ಅಭಿವೃದ್ಧಿ ಕೆಲಸದ ಕಡೆ ಗಮನಹರಿಸದೇ ಶ್ರೀರಾಮ ಮತ್ತು ಹನುಮ ಭಕ್ತರನ್ನು ಟಾರ್ಗೆಟ್ ಮಾಡಿಕೊಂಡು ಇಂತಹ ಅಶಾಂತಿ ವಾತಾವರಣವನ್ನು ಗ್ರಾಮದಲ್ಲಿ ಉಂಟು ಮಾಡುವುದು ಶಾಸಕರಿಗೆ ಶೋಭೆ ತರುವುದಿಲ್ಲ.

ಊರಿನವರ ಭಾವನೆಗಳಿಗೆ ಬೆಲೆ ಕೊಡಿ. ನಾವೆಲ್ಲರೂ ಒಟ್ಟಾಗಿದ್ದೇವೆ. ಗ್ರಾಮದಲ್ಲಿರುವ ಶಾಂತಿಯ ವಾತಾವರಣವನ್ನು ಕದಡಬೇಡಿ. ಪ್ರಚೋದನೆಗೆ ಒಳಗಾಗುವಷ್ಟು ಮೂರ್ಖರು ನಾವಲ್ಲ. ನಾವು ಜಿಲ್ಲಾಡಳಿತಕ್ಕೂ ಮನವಿ ಮಾಡುವುದಿಷ್ಟೇ. ಧ್ವಜಸ್ತಂಭದಲ್ಲಿ ಹನುಮಧ್ವಜ ಹಾರಾಟಕ್ಕೆ ಅವಕಾಶ ಮಾಡಿಕೊಡಿ.