ದಶಕದಿಂದ ಪುಟ್ಟರಾಜ ಗವಾಯಿಗಳವರ ಸ್ಮಾರಕ ಭವನ ಅಪೂರ್ಣ!

ಶಿವಕುಮಾರ ಕುಷ್ಟಗಿ

ಗದಗ:ಅಂಧ-ಅನಾಥರ ಬಾಳಿನಲ್ಲಿ ನಿರಂತರ ಜ್ಯೋತಿಯಾಗಿ ಬೆಳಗುತ್ತಿರುವ ಇಲ್ಲಿನ ಲಿಂ.ಪಂ.ಪುಟ್ಟರಾಜ ಗವಾಯಿಗಳವರ ಸ್ಮಾರಕ ಭವನ ದಶಕ ಕಳೆದರೂ ಇನ್ನೂ ಕುಂಟುತ್ತ ಸಾಗಿದೆ.

ಹಿನ್ನೆಲೆ: ಗದಗ ಎಪಿಎಂಸಿಯಲ್ಲಿರುವ ವೀರೇಶ್ವರ ಪುಣ್ಯಾಶ್ರಮಕ್ಕೆ ಹೊಂದಿಕೊಂಡಿರುವ ಈ ಸ್ಮಾರಕ ಭವನ 27 ಗುಂಟೆ ಪ್ರದೇಶದಲ್ಲಿ ನಿರ್ಮಾಣವಾಗುತ್ತಿದೆ. ಡಾ. ಪಂಡಿತ ಪುಟ್ಟರಾಜ ಕವಿ ಗವಾಯಿಗಳು ಲಿಂಗೈಕ್ಯರಾದ ವೇಳೆಯಲ್ಲಿ ಭೇಟಿ ನೀಡಿದ್ದ ಅಂದಿನ ಸಿಎಂ ಯಡಿಯೂರಪ್ಪ ಸ್ಮಾರಕ ನಿರ್ಮಾಣಕ್ಕೆ ₹5 ಕೋಟಿ ಘೋಷಣೆ ಮಾಡಿದ್ದರು. 2010ರಲ್ಲಿ ಸ್ಮಾರಕಭವನ ನಿರ್ಮಾಣಕ್ಕೆ ಸರಕಾರ ಆದೇಶ ಮಾಡಿ, 2014ರಲ್ಲಿ ಕಾಮಗಾರಿ ಆರಂಭಿಸಿದರೂ ಇವರೆಗೂ ಪೂರ್ಣಗೊಂಡಿಲ್ಲ. ಮೊದಲನೆ ಹಂತದಲ್ಲಿ ₹ 5 ಕೋಟಿ ಅನುದಾನದಲ್ಲಿ ಕಾಮಗಾರಿ ಮುಗಿದಿದ್ದು, ಹೆಚ್ಚುವರಿಯಾಗಿ ₹1.24 ಕೋಟಿ ಖರ್ಚಾಗಿದೆ. 2ನೇ ಹಂತದ ಕಾಮಗಾರಿಯಲ್ಲಿ ಪ್ಲೋರಿಂಗ್. ಡಿಸೈನ್ ಮತ್ತು ಪಿನಿಷಿಂಗ್ ಕಾರ್ಯ ಉಳಿದುಕೊಂಡಿದೆ. ಈ ಸ್ಮಾರಕ ಭವನದಲ್ಲಿ ನೆಲಮಾಳಿಗೆಯಲ್ಲಿ ಕಚೇರಿ, ಪಾರ್ಕಿಂಗ್, ವಸತಿಗೆ, ಮೊದಲನೆ ಮಹಡಿಯಲ್ಲಿ ಅಡಿಟೋರಿಯಂ ಮತ್ತು ಬಾಲ್ಕನಿಯಲ್ಲಿ ಪಂ.ಪುಟ್ಟರಾಜ ಗವಾಯಿಗಳು ನುಡಿಸುತ್ತಿದ್ದ ತಂಬೂರಿ ಮಾದರಿಯನ್ನು ವಿನ್ಯಾಸಗೊಳಿಸಲಾಗಿದೆ. ಆದರೆ ನಿರ್ಮಾಣ ಕಾಮಗಾರಿ ಮಾತ್ರ ಪ್ರಾರಂಭವಾಗಿಲ್ಲ.ಹುಸಿಯಾಗಿರುವ ಭರವಸೆ: ಕನ್ನಡ ಮತ್ತು ಸಂಸ್ಕೃತಿ ಇಲಾಖೆ ಸಚಿವ ಶಿವರಾಜ ತಂಗಡಗಿ ಗದಗ ಜಿಲ್ಲೆಗೆ ಆಗಮಿಸಿದ ವೇಳೆಯಲ್ಲಿ ಅವರಿಗೆ ಅಪೂರ್ಣಗೊಂಡ ಪಂ.ಪುಟ್ಟರಾಜ ಗವಾಯಿಗಳವರ ಸ್ಮಾರಕ ಭವನ ಪೂರ್ಣಗೊಳಿಸಲು ಅನುದಾನ ನೀಡುವಂತೆ ವಿನಂತಿಸಲಾಗಿತ್ತು. ಅಂದು ಭರವಸೆ ನೀಡಿದ್ದ ಇಲಾಖೆ ಸಚಿವರ ಭರವಸೆ ಇದುವರೆಗೂ ಭರವಸೆಯೇ ಆಗಿ ಉಳಿದಿದೆ.