ಆನಿಕೆರೆಗೆ ಬಂತು ಧರ್ಮಾ ಜಲಾಶಯದ ನೀರು

ಮಾರುತಿ ಶಿಡ್ಲಾಪೂರ

ಹಾನಗಲ್ಲ ಕುಡಿಯುವ ನೀರಿನ ಬವಣೆ ನೀಗಿಸಲು ಬಂತು ಧರ್ಮಾ ಜಲಾಶಯದ ನೀರು. ಇನ್ನೆರಡು ತಿಂಗಳು ಪಟ್ಟಣಕ್ಕೆ ನೀರಿನ ಕೊರತೆ ಇಲ್ಲ. ಹಿತ ಮಿತ ನೀರು ಬಳಕೆ ಮೂಲಕ ಜೀವ ಜಲ ರಕ್ಷಿಸಿಕೊಳ್ಳುವುದು ಸಾರ್ವಜನಿಕರ ಜವಾಬ್ದಾರಿಯಾಗಿದೆ.

ಧರ್ಮಾ ಜಲಾಶಯದಿಂದ ಧರ್ಮಾ ನದಿಯ ಮೂಲಕ ೨೩ ಕಿಮೀಯಷ್ಟು ದೂರದಿಂದ ನೀರು ಹರಿದು ಬರುತ್ತಿರುವ ಸಂದರ್ಭದಲ್ಲಿ ಈ ನೀರನ್ನು ಯಾರೂ ಕೂಡ ಜಮೀನಿಗೆ ಯಾವುದೇ ರೀತಿ ಪಡೆಯುವಂತಿಲ್ಲ. ಇದಕ್ಕಾಗಿ ಪೊಲೀಸ್, ನೀರಾವರಿ ಇಲಾಖೆ ಹಾಗೂ ಪುರಸಭೆ ಸಿಬ್ಬಂದಿಯ ಕಾವಲಿದೆ. ಜಿಲ್ಲಾಧಿಕಾರಿಗಳ ಹಾಗೂ ಸವಣೂರು ಉಪವಿಭಾಗಾಧಿಕಾರಿಗಳ ಅದೇಶದಂತೆ ಇಂದು ನೀರು ಹರಿಸಲಾಗಿದೆ.

ಇಂತಹ ಬೇಸಿಗೆಯಲ್ಲಿ ಹಾನಗಲ್ಲಿಗೆ ಕುಡಿಯುವ ನೀರು ಒದಗಿಸುವ ಏಕೈಕ ಜಲ ಮೂಲ ಧರ್ಮಾ ಜಲಾಶಯ. ಅಲ್ಲಿರುವ ನೀರು ಹಾನಗಲ್ಲಗಾಗಿ ಕಾಯ್ದಿರಿಸಿದೆಯಾದರೂ ನೀರನ್ನು ಮಿತವಾಗಿ ಪೋಲಾಗದಂತೆ ಬಳಸುವ ಅಗತ್ಯವಿದೆ. ಇದಕ್ಕಾಗಿ ಡಂಗುರವನ್ನೂ ಸಾರಿಸಲಾಗುತ್ತಿದೆ. ಏಪ್ರಿಲ್ ಅಂತ್ಯದವರೆಗೆ ಈ ನೀರು ಪೂರೈಸಬಹುದು. ಮತ್ತೆ ಧರ್ಮಾ ಜಲಾಶಯದ ನೀರನ್ನೆ ಅವಲಂಬಿಸಬೇಕು. ಆ ನಂತರ ನಮಗೆ ನೀರೇ ಇಲ್ಲ. ಕೊಳವೆಬಾವಿಗಳ ನೀರು ತೀರ ಕಡಿಮೆ ಆಗಿದೆ. ನೀರು ಉಳಿಸಿ ಬಳಸೋಣ ಎಂದು ಪುರಸಭೆ ಮುಖ್ಯಾಧಿಕಾರಿ ವೈ.ಕೆ. ಜಗದೀಶ ಹೇಳಿದರು.