ಬಟ್ಟಲದಷ್ಟು ಬೆಲ್ಲ, ಬೆಟ್ಟದಷ್ಟು ಬೇವು ಕೊಟ್ಟ ವರ್ಷ

ಸೋಮರಡ್ಡಿ ಅಳವಂಡಿ ಕೊಪ್ಪಳ

ತೊಗಲು ಗೊಂಬೆಯಾಡಿಸುತ್ತಲೇ 85 ವಸಂತ ಪೂರೈಸಿರುವ ಭೀಮವ್ವನಿಗೆ ಪದ್ಮಶ್ರೀ ಗೌರವ ಬಂದಿದ್ದು, ಜಿಲ್ಲೆಯ ಜನರ ಸಂತಸ ಹೆಚ್ಚಿಸಿತು ಮತ್ತು ಮೊದಲ ಬಾರಿಗೆ ಜಿಲ್ಲೆಗೆ ಪದ್ಮಶ್ರೀ ಗೌರವ ತಂದುಕೊಟ್ಟ ಕೀರ್ತಿ ಅವರಿಗೆ ಸಲ್ಲುತ್ತದೆ.

ಜತೆಗೆ ಮೆಕ್ಕೆಜೋಳ ಬೆಲೆ ಕುಸಿತ, ಬಾಳೆ ಹಣ್ಣಿನ ಬೆಲೆ ಕುಸಿತ ಸೇರಿದಂತೆ ರೈತರ ಉತ್ಪನ್ನಗಳ ಬೆಲೆ ಕುಸಿತ ಗಾಯಕ್ಕೆ ನೆರೆಯ ಬರೆ ಕೋಟ್ಯಂತರ ಹಾನಿಯಾಗುವಂತಾಯಿತು.

ಸಹಕಾರ ಕ್ಷೇತ್ರದ ಶೇಖರಗೌಡ ಮಾಲಿಪಾಟೀಲ್, ಶಿವರಾಯಪ್ಪ ಚೌಡ್ಕಿ ಹಾಗೂ ದೇವೇಂದ್ರಕುಮಾರ ಪತ್ತಾರ ಅವರಿಗೆ ಪ್ರಸಕ್ತ ಸಾಲಿನ ರಾಜ್ಯೋತ್ಸವ ಪ್ರಶಸ್ತಿ ಬಂದಿರುವುದು ಹೆಮ್ಮೆಯ ಸಂಗತಿ.

₹2500 ಕೋಟಿ ಕಾಮಗಾರಿ: ಸಿಎಂ ಸಿದ್ದರಾಮಯ್ಯ ಕೊಪ್ಪಳ ನಗರದಲ್ಲಿ ನಡೆದ ಕಾರ್ಯಕ್ರಮಕ್ಕೆ ಜಿಲ್ಲಾದ್ಯಂತ ವಿವಿಧ ₹2500 ಕೋಟಿ ಕಾಮಗಾರಿಗೆ ಚಾಲನೆ ನೀಡಿದರು.

ಮಣಿದ ಸಂಸದರು: ಕೊಪ್ಪಳ ನಗರದ ರೈಲ್ವೆ ಗೇಟ್ 63ಕ್ಕೆ ಸೇತುವೆ ನಿರ್ಮಾಣವಾಗಿದ್ದರೂ ಸಂಚಾರ ಮುಕ್ತ ಮಾಡದೆ ಇರುವುದನ್ನು ವಿರೋಧಿಸಿ ಮಹಿಳೆಯರು ಹೋರಾಟ ಮಾಡಿದ ಪರಿಣಾಮ ಸಂಸದ ರಾಜಶೇಖರ ಹಿಟ್ನಾಳ ಸ್ಪಂದಿಸಿ, ಸಂಚಾರ ಮುಕ್ತ ಮಾಡಿದರು.

ಹಿರೇಬೆಣಕಲ್ ಗೆ ಕಾಯಕಲ್ಪ: ಕನ್ನಡ ಪ್ರಭ ಮತ್ತು ಏಷ್ಯಾನೆಟ್ ಸುವರ್ಣ ನ್ಯೂಸ್ ಕರ್ನಾಟಕ ಏಳು ಅದ್ಭುತಗಳ ಪಟ್ಟಿಯಲ್ಲಿರುವ ಹಿರೇಬೆಣಕಲ್ ಅಭಿವೃದ್ಧಿಗೆ ರಾಜ್ಯ ಸರ್ಕಾರ ಕಾಯಕಲ್ಪ ಮಾಡಿ ₹80 ಲಕ್ಷ ಬಿಡುಗಡೆ ಮಾಡಿರುವುದನ್ನು ಖುದ್ದು ಪ್ರವಾಸೋಧ್ಯಮ ಸಚಿವ ಎಚ್.ಕೆ. ಪಾಟೀಲ್ ಅವರೇ ಹೇಳಿದರು. ಅಷ್ಟೇ ಅಲ್ಲ ಈ ಕುರಿತು ಆದೇಶ ಮಾಡಿದ್ದಾರೆ.

ತುಂಗಭದ್ರಾ ನದಿಗೆ ಆರತಿ: ಪ್ರಸಕ್ತ ವರ್ಷ ಶ್ರೀ ಹುಲಿಗೆಮ್ಮ ದೇವಸ್ಥಾನದ ಬಳಿ ತುಂಗಭದ್ರಾ ನದಿಗೆ ಆರತಿ ಮಹೋತ್ಸವ ಪ್ರಾರಂಭಿಸಲಾಯಿತು. ಮೊದಲ ವರ್ಷ ಅತ್ಯಂತ ಯಶಸ್ವಿಯಾಗಿ ನಡೆಯಿತು.

ಕೆಆರ್ ಐಡಿಎಲ್ ಸಿಬ್ಬಂದಿಯ ಮನೆ ಮೇಲೆ ದಾಳಿ ಮಾಡಿದಾಗ ಬರೋಬ್ಬರಿ ₹100 ಕೋಟಿ ಅಂದಾಜು ಅಸ್ತಿಯ ಲೆಕ್ಕಾಚಾರ ನಾಡಿನಾದ್ಯಂತ ದೊಡ್ಡ ಸುದ್ದಿಯಾಯಿತು.ಅದರಲ್ಲೂ ಕಸಗೂಡಿಸುತ್ತಿದ್ದವನ ಬಳಿ ನೂರು ಕೋಟಿ ಆಸ್ತಿ ಎನ್ನುವ ತಲೆಬರಹ ಭಾರಿ ಸದ್ದು ಮಾಡಿದು, ಸೋಷಿಯಲ್ ಮೀಡಿಯಾದಲ್ಲಿ ವೈರಲ್ ಆಯಿತು.

ದಡ್ಡ ವಿದ್ಯಾರ್ಥಿಗಳಿಗೆ ಟೀಸಿ: ದಡ್ಡ ವಿದ್ಯಾರ್ಥಿಗಳಿಗೆ ಟೀಸಿ ಎನ್ನುವ ತಲೆಬಹರದಡಿ ಕನ್ನಡಪ್ರಭ ಪ್ರಕಟಿಸಿದ ವಿಶೇಷ ವರದಿ ರಾಜ್ಯಾದ್ಯಂತ ಭಾರಿ ಸದ್ದು ಮಾಡಲಾಯಿತು. ಕರ್ನಾಟಕ ರಾಜ್ಯ ಮಕ್ಕಳ ಹಕ್ಕುಗಳ ರಕ್ಷಣಾ ಆಯೋಗ ಸ್ವಯಂ ಪ್ರೇರಿತ ದೂರು ದಾಖಲಿಸಿ ತನಿಖೆ ನಡೆಸುತ್ತಿದೆ.

40 ಪ್ಲಸ್ ಎಸ್ಸೆಸ್ಸೆಲ್ಸಿ ವಿದ್ಯಾರ್ಥಿಗಳಿಗೆ ಸಿವಿಸಿ ಫೌಂಡೇಶನ್ ಮತ್ತು ಸಾರ್ವಜನಿಕ ಶಿಕ್ಷಣ ಇಲಾಖೆಯ ಸಹಯೋಗದಲ್ಲಿ ಕುಷ್ಟಗಿಯ ಸರ್ಕಾರಿ ಪ್ರಥಮ ದರ್ಜೆ ಕಾಲೇಜಿನಲ್ಲಿ ಏರ್ಪಡಿಸಿದ ಕಾರ್ಯಾಗಾರದಲ್ಲಿ ಬರೋಬ್ಬರಿ 2 ಸಾವಿರಕ್ಕೂ ಅಧಿಕ ಮಕ್ಕಳು ಭಾಗವಹಿಸಿದ್ದರು. ಇಡೀ ದಿನ ಸನ್ಮಾರ್ಗ ಗೆಳೆಯರ ಬಳಗದಿಂದ ಎಸ್ಸೆಸ್ಸೆಲ್ಸಿ ವಿದ್ಯಾರ್ಥಿಗಳಿಗೆ ಕಾರ್ಯಾಗಾರ ಯಶಸ್ವಿಯಾಗಿ ನಡೆಸಲಾಯಿತು.