ಉಪ್ಪಿರಲಾರದೇ ಉರಿದರೆ ಹೀಗೆಯೇ ಆಗೋದು: ಕಾಶಪ್ಪನವರ

ಕನ್ನಡಪ್ರಭ ವಾರ್ತೆ ಬಾಗಲಕೋಟೆ

ಬಾಗಲಕೋಟೆ ಜಿಲ್ಲೆಯ ಹುನಗುಂದ ತಾಲೂಕಿನ ಕೂಡಲಸಂಗಮದಲ್ಲಿ ಗುರುವಾರ ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, ಯಾರೇ ಆಗಲಿ ಇತಿಮಿತಿ ದಾಟಿದಾಗ ಪಕ್ಷ ಇಂತಹ ನಿರ್ಣಯ ಕೈಗೊಳ್ಳಬೇಕಾಗುತ್ತದೆ, ಯತ್ನಾಳ ಅವರ ವಿರುದ್ಧ ಬಿಜೆಪಿ ತೆಗೆದುಕೊಂಡ ನಿರ್ಣಯ ಸರಿಯಾಗಿದೆ. ಅವರು ಪಕ್ಷ, ಪಕ್ಷದ ನಾಯಕರು, ಕುಟುಂಬದ ಬಗ್ಗೆ ಇಲ್ಲ ಸಲ್ಲದ ಆರೋಪ ಮಾಡಿದ್ರು, ಪಕ್ಷದ ಬಗ್ಗೆ, ಧರ್ಮದ ಬಗ್ಗೆನೂ ಮಾತನಾಡೋದು ಬಿಡಲಿಲ್ಲ, ಇವ್ರು ಯಾವ ಧರ್ಮದಲ್ಲಿ ಜನಿಸಿದ್ದಾರನ್ನೋದನ್ನೇ ಮರೆತಿದ್ದಾರೆ ಎಂದು ಕುಟುಕಿದರು.

ಪಂಚಮಸಾಲಿ ಶಾಸಕರು ಬಿಜೆಪಿ ಬಿಟ್ಟು ಬರುವಂತೆ ಪಂಚಮಸಾಲಿ ಜಯಮೃತ್ಯುಂಜಯ ಶ್ರೀಗಳು ಕರೆ ನೀಡಿರುವ ಬಗ್ಗೆ ಪ್ರತಿಕ್ರಿಯಿಸಿದ ಶಾಸಕ ಕಾಶಪ್ಪನವರ, ಗುರುಗಳಾದಂತವರು ಸಲಹೆ ಕೊಡಬಾರದು ಅಂತ ನಾನು ಅಂದುಕೊಂಡಿದ್ದೇನೆ. ನಾನು ಸಮಾಜದಲ್ಲಿ ಜನಿಸಿದವನು, ಪಂಚಮಸಾಲಿ ಸಮಾಜದ ರಾಷ್ಟ್ರೀಯ ಅಧ್ಯಕ್ಷನಾದವನು, ಇಂತಹ ಕರೆ, ನಿರ್ಧಾರ ತೆಗೆದುಕೊಳ್ಳುವುದು ಯಾರನ್ನ ಕೇಳಿ ಮಾಡ್ತಾರೆ? ಎಂದು ಪ್ರಶ್ನಿಸಿದ ಅವರು, ಅವರು ಗುರುಗಳು ಆಗಿರಬಹುದು, ಹಾಗಂತ ಗುರುಗಳೇ ನಿರ್ಧಾರ ಮಾಡಂಗಿಲ್ಲ, ಎಲ್ಲರೂ ಸೇರಿ ಅವ್ರನ್ನ ಗುರುಗಳನ್ನಾಗಿ ಮಾಡಿದ್ದೇವೆ, ಸಮುದಾಯವನ್ನು ಆಹ್ವಾನಿಸಿ ಚರ್ಚೆ ಮಾಡಬೇಕು, ಚರ್ಚೆ ಮಾಡದೆಯೇ ಏಕಾಏಕಿ ನಿರ್ಣಯ ತೆಗೆದುಕೊಂಡ್ರೆ, ರಾಜೀನಾಮೆ ಕೊಡೋದಿಕ್ಕೆ ನಮಗೇನು ತಲೆಗಿಲೆ ಕೆಟ್ಟಿದಿಯಾ? ಸ್ವಾಮೀಜಿ ಮಾತು ಕೇಳಿ ರಾಜೀನಾಮೆ ಕೋಡೊಕೆ ಬಿಜೆಪಿವ್ರಿಗೆ ತಲೆ ಕೆಟ್ಟಿದೆಯಾ? ಯಾರೊಬ್ರೂ ರಾಜೀನಾಮೆ ಕೊಡಲ್ಲ ಎಂದು ಹರಿಹಾಯ್ದರು.

ಸ್ವಾಮೀಜಿ ಸಮುದಾಯಗಳ ಸಭೆ ಕೂಡ ಮಾಡ್ತಿದಾರೆ ಎಂಬ ಪ್ರಶ್ನೆಗೆ ಉತ್ತರಿಸದ ಪಂಚಮಸಾಲಿ ರಾಷ್ಟ್ರೀಯ ಅಧ್ಯಕ್ಷ ವಿಜಯಾನಂದ ಕಾಶಪ್ಪನವರ, ಸ್ವಾಮೀಜಿಗಳ ಮೇಲೆಯೇ ರಾಜಕೀಯ ಸಿದ್ಧಾಂತಗಳು ನಿಂತಿವೆಯೇ? ಅವರವರ ಶಕ್ತಿ, ಸ್ವಂತ ಬಲದ ಮೇಲೆ ರಾಜಕಾರಣ ನಿರ್ಣಯ ಆಗುತ್ತೆ, ಸ್ವಾಮೀಜಿಗಳನ್ನು ಕೇಳಿ ರಾಜಕಾರಣ ನಡೆದಿಲ್ಲ, ಇದು ಪ್ರಜಾಪ್ರಭುತ್ವ ದೇಶ, ಪ್ರಜೆಗಳಿಂದಲೇ ನಿರ್ಣಯ ಆಗಬೇಕು, ಸುಮ್ನೆ ಬೆದರಿಕೆ ಹಾಕೋದು, ಲಿಂಗಾಯತ ವಿರೋಧಿ ಸರ್ಕಾರ ಅನ್ನೋದು, ಬಿಜೆಪಿ ಸ್ವಾಮೀಜಿ ಆಗಿ ಇವರು ಮಾತನಾಡ್ತಿದಾರೆ ಎಂದು ಅಸಮಾಧಾನ ವ್ಯಕ್ತಪಡಿಸಿದರು.

ಮೀಸಲಾತಿ ಕೊಡಿಸುವ ಕೆಲಸ ಮುಂದುವರಿಯುತ್ತದೆ, ಇಂತಹ ಗೊಳ್ಳು ನಿರ್ಣಯಕ್ಕೆ ನಾವ್ಯಾರು ತಲೆ ಬಾಗಲ್ಲ, ಸಮಾಜದವರು ಇದಕ್ಕೆ ತಲೆ ಕೆಡಿಸಿಕೊಳ್ಳುವುದರಲ್ಲಿ ಅರ್ಥವಿಲ್ಲ, ಇದು ಅವರ ಪಕ್ಷದ ನಿರ್ಣಯ, ಸಮುದಾಯದ ನಿರ್ಣಯ ಅಲ್ಲ, ಸುಮ್ನೆ ಸಮಾಜದವರನ್ನು ದಾರಿ ತಪ್ಪಿಸುತ್ತಿದ್ದಾರೆ, ಮೊನ್ನೆ ಹೀಗೆಯೇ ದಾರಿ ತಪ್ಪಿಸಿ ಬೆಳಗಾವಿಯಲ್ಲಿ ಪ್ರತಿಭಟನೆ ವೇಳೆ ಆರ್ ಎಸ್ ಎಸ್ ನವರಿಂದ ಕಲ್ಲು ಒಗಿಸಿದ್ರು, ನನ್ನ ಕಡೆ ವಿಡಿಯೋ ಪ್ರೂಫ್ ಇವೆ, ಚಪ್ಪಲಿ, ಕಲ್ಲು ತಾವೇ ತೂರಿಕೊಂಡಿದ್ದಾರೆ, ತಾವೇ ತೂರಿಕೊಂಡು ಸರ್ಕಾರಕ್ಕೆ, ಪೊಲೀಸರ ಮೇಲೆ ಆರೋಪ ಮಾಡಿದ್ರು, ಸರ್ಕಾರ ಲಿಂಗಾಯತ ವಿರೋಧಿ ಅಂದ್ರು, ಸ್ವಾಮೀಜಿಗಳು ಇಂತಹ ದೊಡ್ಡ ದೊಡ್ಡ ಮಾತು ಆಡೋದನ್ನ ಬಿಡಬೇಕು, ಎಲ್ಲರನ್ನೂ ಸಮಾನವಾಗಿ ಕಾಣುವ ಲಿಂಗಾಯತ ಧರ್ಮದಲ್ಲಿ ಜನಿಸಿದ್ದೀವಿ, ಅಂತಹ ಧರ್ಮದಲ್ಲಿ ಜನಿಸಿದವರು ವೈಯಕ್ತಿಕ ಬೆಂಬಲ ಸೂಚಿಸವುದು ಸರಿಯಲ್ಲ ಎಂದು ಆಕ್ರೋಶ ವ್ಯಕ್ತಪಡಿಸಿದರು.