ಉದ್ಯೋಗ ಅರಸಿ ಗುಳೆ ಹೊರಟ ಸಾವಿರಾರು ಕಾರ್ಮಿಕರು!

ಕನ್ನಡಪ್ರಭ ವಾರ್ತೆ ಔರಾದ್‌

ಸಾಲದ ಸುಳಿಯಲ್ಲಿ ಸಿಲುಕಿ ಸಾವಿರಾರು ಕಾರ್ಮಿಕರು ಪ್ರತಿ ವರ್ಷ ಜೀತದಾಳುಗಳಂತೆ ಒಲ್ಲದ ಮನಸ್ಸಿಂದ ಕಬ್ಬು ಕಟಾವಿಗೆ ಗುಳೆ ಹೋಗುವಂಥ ದುರಂತದ ಸ್ಥಿತಿ ನಿರ್ಮಾಣವಾಗಿದೆ. ಕಾರ್ಖಾನೆಗಳು ಲಾರಿ ಮಾಲೀಕರಿಗೆ ಮುಂಗಡ ಹಣ ಕೊಡ್ತಾರೆ. ಲಾರಿ ಮಾಲೀಕರು ಕಾರ್ಮಿಕ ಮುಖ್ಯಸ್ಥನ ಮೂಲಕ ಕಾರ್ಮಿಕರಿಗೆ ಒಂದು ಜೋಡಿಗೆ ತಲಾ ಒಂದು ಲಕ್ಷ ರು. ಮುಂಗಡ ಪಡೆದು ಕೊಡುತ್ತಾರೆ.

ಕಾರ್ಮಿಕರ ಮಕ್ಕಳು ಶಿಕ್ಷಣದಿಂದ ದೂರ:

ಯಾದಗಿರಿ, ಕಲಬುರಗಿ, ವಿಜಯಪುರ, ಮಹಾರಾಷ್ಟ್ರದ ಲಾತೂರ, ಧಾರಾಶಿವ ಜಿಲ್ಲೆಗಳಲ್ಲಿನ ಸಕ್ಕರೆ ಕಾರ್ಖಾನೆಗಳ ಕಬ್ಬು ಕಟಾವಿಗೆ ಹೋಗ್ತಾರೆ. ಚಳಿ, ಮಳೆ ಎನ್ನದೆ ಕಷ್ಟಪಟ್ಟು ಕೆಲಸ ಮಾಡ್ತಾರೆ. ಈ ವೇಳೆಯಲ್ಲಿ ಜೊತೆಯಲ್ಲಿ ತಮ್ಮ ಮಕ್ಕಳನ್ನು ಕರಕೊಂಡು ಹೋಗ್ತಾರೆ ಇದರಿಂದ ಮಕ್ಕಳು ಶಾಲೆಯಿಂದ ದೂರವಾಗಿ ಶಿಕ್ಷಣದಿಂದ ವಂಚಿತರಾಗಿ ಅನಕ್ಷರಸ್ಥರಾಗುತ್ತಿರುವ ದುರದೃಷ್ಟಕರ ಸಂಗತಿ ಕೂಡ ಬೆಳೆದುಕೊಂಡು ಬಂದಿದೆ.

ಸಕ್ಕರೆ ಕಾರ್ಖಾನೆಗಳು ಕಬ್ಬು ಕಟಾವು ಮಾಡುವ ಕಾರ್ಮಿಕರಿಗೆ ನೀಡುವ ಮುಂಗಡ ಹಣದಲ್ಲಿ ಉಳಿದುಕೊಂಡ ಬಾಕಿ ಹಣ ವಾಪಸ್‌ ಪಡೆಯಲು ತಿಂಗಳುಗಟ್ಟಲೇ ಕಾರ್ಮಿಕರನ್ನು ಕೂಡಿ ಹಾಕಿ ವಸೂಲಿ ಮಾಡಿದ ಹಲವು ಪ್ರಕರಣಗಳು ಪೊಲೀಸ್‌ ಠಾಣೆ ಮೆಟ್ಟಿಲೇರಿ ಮುಗಿದಿವೆ. ಮಹಿಳೆಯರು ಮಕ್ಕಳೆನ್ನದೆ ಬಡ ಕಾರ್ಮಿಕ ಕುಟುಂಬಗಳನ್ನು ಸಂಕಷ್ಟಕ್ಕೆ ಸಿಲುಕಿಸಿ ಶೋಷಣೆ ಮಾಡುವ ಘಟನೆಗಳು ಕೇಳಿ ಬಂದಿವೆ.