ಬಹಿರಂಗ ಪ್ರಚಾರಕ್ಕೆ ಇಂದು ತೆರೆ: ಸುಗಮ ಚುನಾವಣೆಗೆ ಜಿಲ್ಲಾಡಳಿತ ಸನ್ನದ್ಧ

ಹಾವೇರಿ: ಹಾವೇರಿ ಲೋಕಸಭಾ ಕ್ಷೇತ್ರದ ಸಾರ್ವತ್ರಿಕ ಚುನಾವಣೆಗೆ ಜಿಲ್ಲಾಡಳಿತ ಸನ್ನದ್ಧವಾಗಿದೆ. ಅಭ್ಯರ್ಥಿಗಳ ಬಹಿರಂಗ ಪ್ರಚಾರಕ್ಕೆ ಮೇ ೫ರ ಸಂಜೆ ೬ ಗಂಟೆಗೆ ತೆರೆ ಬೀಳಲಿದೆ. ಮೇ ೭ರ ಬೆಳಗ್ಗೆ ೭ರಿಂದ ಸಂಜೆ ೬ ಗಂಟೆವರೆಗೆ ಮತದಾನ ನಡೆಯಲಿದೆ. ಸುಗಮ ಮತದಾನಕ್ಕಾಗಿ ೧೯೮೨ ಮತಗಟ್ಟೆಗಳನ್ನು ಸ್ಥಾಪಿಸಲಾಗಿದೆ ಎಂದು ಜಿಲ್ಲಾಧಿಕಾರಿ ಹಾಗೂ ಜಿಲ್ಲಾ ಚುನಾವಣಾಧಿಕಾರಿ ರಘುನಂದನ್ ಮೂರ್ತಿ ತಿಳಿಸಿದ್ದಾರೆ.ಲೋಕಸಭಾ ಚುನಾವಣೆಯ ಮತದಾನ ಪ್ರಕ್ರಿಯೆ ಸಿದ್ಧತೆ ಹಾಗೂ ಮತದಾನ ಮುಕ್ತಾಯದ ಪೂರ್ವದ ೪೮ ತಾಸಿನ ಮಾದರಿ ನೀತಿ ಸಂಹಿತೆ ಕುರಿತಾಗಿ ಶನಿವಾರ ಮಾಧ್ಯಮಗೋಷ್ಠಿ ನಡೆಸಿ ಮಾಹಿತಿ ನೀಡಿದ ಅವರು, ಕ್ಷೇತ್ರ ವ್ಯಾಪ್ತಿಯಲ್ಲಿ ಸ್ಥಾಪಿಸಲಾಸದ ೧೯೮೨ ಮತಗಟ್ಟೆಗಳ ಪೈಕಿ ೩೭೦ ಮತಗಟ್ಟೆಗಳು ಸೂಕ್ಷ್ಮ, ೩೭ ದುರ್ಬಲ ಮತಗಟ್ಟೆಗಳು, ೧೨ ಆರ್ಥಿಕ ಸೂಕ್ಷ್ಮತೆ ಒಳಗೊಂಡ ಮತಗಟ್ಟೆಗಳೆಂದು ಗುರುತಿಸಲಾಗಿದ್ದು, ಈ ಮತಗಟ್ಟೆಗಳ ಮೇಲೆ ತೀವ್ರ ನಿಗಾವಹಿಸಲಾಗಿದೆ ಎಂದು ತಿಳಿಸಿದರು.ಕ್ಷೇತ್ರ ವ್ಯಾಪ್ತಿಗೆ ಒಳಪಡುವ ಉಭಯ ಜಿಲ್ಲೆಗಳ ವಿಧಾನಸಭಾ ಕ್ಷೇತ್ರಗಳಲ್ಲಿ ೧೯೮೨ ಮತಗಟ್ಟೆಗಳನ್ನು ಸ್ಥಾಪಿಸಲಾಗಿದ್ದು, ೧೬೧೪ ಮತಗಟ್ಟೆಗಳಲ್ಲಿ ವೆಬ್‌ಕಾಸ್ಟಿಂಗ್ ಅಳವಡಿಸಲಾಗಿದೆ. ೩೮೪ ಸೂಕ್ಷ್ಮ ಮತಗಟ್ಟೆಗಳಲ್ಲಿ ಸೂಕ್ಷ್ಮ ವೀಕ್ಷಕರ ನೇಮಕಮಾಡಿ ನಿಗಾವಹಿಸಲಾಗಿದೆ. ೯೯ ಸೆಕ್ಟರ್ ಮೊಬೈಲ್‌ಗಳನ್ನು ರಚಿಸಲಾಗಿದೆ. ೨೫ ಪೊಲೀಸ್ ವೃತ್ತ ನಿರೀಕ್ಷಕರು ಹಾಗೂ ಎಂಟು ಪೊಲೀಸ್ ಉಪಾಧೀಕ್ಷಕರ ಮೇಲ್ವಿಚಾರಣೆಯಲ್ಲಿ ನಿಗಾ ವಹಿಸಲಾಗಿದೆ ಎಂದರು.ವಿದ್ಯುನ್ಮಾನ ಮತಯಂತ್ರಗಳ ಸಾಗಾಣಿಕೆ, ಮತಗಟ್ಟೆಗಳಿಗೆ ಭದ್ರತಾ ವ್ಯವಸ್ಥೆ, ಸುಗಮ ಮತದಾನ ಪ್ರಕ್ರಿಯೆಗೆ ಹಾವೇರಿ ಜಿಲ್ಲೆಯಲ್ಲಿ ಆರು ಜನ ಡಿವೈಎಸ್‌ಪಿಗಳು, ೧೯ ಜನ ಸಿಪಿಐಗಳು, ೪೫ ಜನ ಪಿಎಸ್‌ಐ, ೧೦೧ ಎಎಸ್‌ಐ, ೩೭೧ ಎಚ್.ಸಿ., ೯೬೩ ಪಿಸಿ, ೧೦೦೦ ಹೋಮ್ ಗಾರ್ಡ್, ೧೮ ಫಾರೆಸ್ಟ್ ಗಾರ್ಡ್ ಒಳಗೊಂಡಂತೆ ೨೫೨೫ ಹಾಗೂ ಮೂರು ಕೇರಳ ರಾಜ್ಯದ ಶಸ್ತ್ರಪಡೆಯ ಮೂರು ತುಕಡಿ, ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ ಹಾಗೂ ಹೆಚ್ಚುವರಿ ಪೊಲೀಸ್ ವರಿಷ್ಠಾಧಿಕಾರಿಗಳ ನೇತೃತ್ವದಲ್ಲಿ ಸುರಕ್ಷತೆ ಹಾಗೂ ಭದ್ರತಾ ಕಾರ್ಯ ನಿರ್ವಹಿಸಲಿದೆ. ಇದೇ ಮಾದರಿಯಲ್ಲಿ ಗದಗ ಜಿಲ್ಲೆಯ ಮೂರು ವಿಧಾನಸಭಾ ಕ್ಷೇತ್ರದಲ್ಲಿ ನಾಲ್ಕು ಜನ ಡಿವೈಎಸ್, ೧೨ ಸಿಪಿಐ, ೩೧ ಜನ ಪಿಎಸ್‌ಐ, ೫೨ ಎ.ಎಸ್‌ಐ, ೩೯೬ ಜನ ಎಚ್.ಸಿ., ೪೮೭ ಜನ ಪಿಸಿ, ೫೪೭ ಹೋಮ್ ಗಾರ್ಡ್, ೧೦ ಜನ ಫಾರೆಸ್ಟ್ ಗಾರ್ಡ್ ಒಳಗೊಂಡಂತೆ ೧೫೨೯ ಜನ ಹಾಗೂ ಕೇರಳ ರಾಜ್ಯ ಶಸ್ತ್ರ ಪಡೆಯ ಮೂರು ಕಂಪನಿಗಳು ಸುರಕ್ಷಾ ಹಾಗೂ ಭದ್ರತಾ ಕಾರ್ಯವನ್ನು ನಿರ್ವಹಿಸಲಿವೆ ಎಂದು ಮಾಹಿತಿ ನೀಡಿದರು.

ಮನೆಯಿಂದ ೧೭೭೦ ಜನ ಮತದಾನ: ಹಾವೇರಿ ಲೋಕಸಭಾ ಕ್ಷೇತ್ರ ವ್ಯಾಪ್ತಿಯಲ್ಲಿ ೬೦೯ ಜನ ವಿಶೇಷಚೇತನರು ಹಾಗೂ ೮೫ ವರ್ಷಕ್ಕಿಂತ ಮೇಲ್ಪಟ್ಟ ೧೧೬೧ ಹಿರಿಯ ಮತದಾರರು ಮನೆಯಿಂದಲೇ ಮತ ಚಲಾಯಿಸಿದ್ದಾರೆ. ಜಿಲ್ಲೆಯಲ್ಲಿ ಒಟ್ಟಾರೆ ೧೫,೫೩೧ ಹಿರಿಯ ಮತದಾರರ ಪೈಕಿ ೧೨೨೦ ಜನ ಮನೆಯಿಂದ ಮತದಾನ ಮಾಡಲು ಒಪ್ಪಿಗೆ ನೀಡಿದ್ದರು. ಈ ಪೈಕಿ ೧೧೬೧ ಜನ ಮತ ಚಲಾಯಿಸಿದ್ದಾರೆ. ೨೭,೫೯೨ ವಿಶೇಷಚೇತನ ಮತದಾರರ ಪೈಕಿ ೬೨೨ ಜನ ಮನೆಯಲ್ಲೇ ಮತದಾನಕ್ಕೆ ಒಪ್ಪಿಗೆ ಸೂಚಿಸಿ ೬೦೯ ಜನ ಮಾತ್ರ ಮತದಾನ ಮಾಡಿರುವುದಾಗಿ ತಿಳಿಸಿದರು.