ಪಿಲಿಕುಳದಲ್ಲಿ ಸಾಂಪ್ರದಾಯಿಕ ಗಾಳ ಸ್ಪರ್ಧೆ ಶೀಘ್ರ: ಡಾ. ಅರುಣ್‌ ಕುಮಾರ್‌

ಮಂಗಳೂರು : ಮಂಗಳೂರಿನ ಪಿಲಿಕುಳ ನಿಸರ್ಗಧಾಮದ ಲೇಕ್‌ ಗಾರ್ಡನ್‌ನಲ್ಲಿ ಈ ಹಿಂದೆ ಸಾಂಪ್ರದಾಯಿಕ ಗಾಳ ಹಾಕುವ ಸ್ಪರ್ಧೆಯ ಮೂಲಕ ಸಾವಿರಾರು ಸಂಖ್ಯೆಯಲ್ಲಿ ಪ್ರವಾಸಿಗರನ್ನು ಆಕರ್ಷಿಸಲಾಗಿತ್ತು. ಈ ಕಾರ್ಯಕ್ರಮವನ್ನು ಮತ್ತೆ ಶೀಘ್ರದಲ್ಲೇ ನಡೆಸಲು ನಿರ್ಧರಿಸಲಾಗಿದೆ ಎಂದು ಪಿಲಿಕುಳ ಅಭಿವೃದ್ಧಿ ಪ್ರಾಧಿಕಾರದ ಪ್ರಭಾರ ಆಯುಕ್ತ ಡಾ.ಅರುಣ್‌ ಕುಮಾರ್‌ ಶೆಟ್ಟಿ ತಿಳಿಸಿದರು.ಪಿಲಿಕುಳದ ಲೇಕ್‌ ಗಾರ್ಡನ್‌‌ನಲ್ಲಿ ಭಾನುವಾರ ಪಿಲಿಕುಳ ಅಭಿವೃದ್ಧಿ ಪ್ರಾಧಿಕಾರ ಮಂಗಳೂರು, ಪ್ರವಾಸೋದ್ಯಮ ಇಲಾಖೆ, ಮೀನುಗಾರಿಕಾ ಇಲಾಖೆ, ಕರ್ನಾಟಕ ಮೀನುಗಾರಿಕೆ ಅಭಿವೃದ್ಧಿ ನಿಗಮ ಮಂಗಳೂರು ಆಶ್ರಯದಲ್ಲಿ ನಡೆದ ಪಿಲಿಕುಳ ಮತ್ಸ್ಯೋತ್ಸವ ಮತ್ತು ಮೀನು ಆಹಾರ ಮೇಳ 2026 ಕಾರ್ಯಕ್ರಮದ ವೇಳೆ ಅವರು ಸುದ್ದಿಗಾರರಿಗೆ ಈ ಮಾಹಿತಿ ನೀಡಿದರು.ಕರಾವಳಿಯ ಸಂಸ್ಕೃತಿ ಮತ್ತು ಮೀನುಗಾರಿಕಾ ಪರಂಪರೆಯನ್ನು ಜನರಿಗೆ ಪರಿಚಯಿಸುವ ಉದ್ದೇಶದೊಂದಿಗೆ ಈ ಮೇಳವನ್ನು ಪ್ರತಿ ವರ್ಷ ನಡೆಸಲಾಗುತ್ತಿದೆ. ಪಿಲಿಕುಳಕ್ಕೆ ಪ್ರವಾಸಿಗರು ಹೆಚ್ಚಿನ ಸಂಖ್ಯೆಯಲ್ಲಿ ಭೇಟಿ ನೀಡಬೇಕೆಂಬ ನಿಟ್ಟಿನಲ್ಲಿ ಮತ್ಸ್ಯ ಮೇಳ ಆಯೋಜಿಸಲಾಗುತ್ತಿದೆ ಎಂದರು.ಕಳೆದ ವರ್ಷ ಕೆರೆಗೆ ಬಿಟ್ಟಿದ್ದ ಮೀನುಗಳನ್ನು ಈ ವರ್ಷ ಹಿಡಿಯಲು ನುರಿತ ಮೀನುಗಾರರನ್ನು ಶಿವಮೊಗ್ಗದಿಂದ ಕರೆಸಲಾಗಿದ್ದು, ಬೆಳಗ್ಗೆ 10 ಗಂಟೆಯ ಸುಮಾರಿಗೆ 1,000 ಕೆಜಿ ರೋಹು, ಕಾಟ್ಲಾ, ತೆಲಪಿಯ ಮೊದಲಾದ ಜಾತಿಯ ಸಿಹಿ ನೀರಿನ ಮೀನುಗಳನ್ನು ಬಲೆ ಬೀಸಿ ಹಿಡಿಯಲಾಗಿದೆ. ಈ ಬಾರಿ 1,500 ಕೆಜಿ ಮೀನು ಹಿಡಿಯುವ ಗುರಿ ಇರಿಸಲಾಗಿದೆ. ಏಳೆಂಟು ಕೆಜಿ ತೂಗುವ ಮೀನುಗಳಿದ್ದು, ಜೀವಂತ ಮೀನುಗಳನ್ನು ಕೆಜಿಗೆ ತಲಾ 160 ರು. ದರದಲ್ಲಿ ಮಾರಾಟ ಮಾಡಲಾಗುತ್ತಿದೆ. ಕಳೆದ ವರ್ಷ 1,200 ಕೆಜಿ ಮೀನು ದೊರೆತಿದ್ದು, 900 ಕೆಜಿ ಮಾರಾಟವಾಗಿದೆ ಎಂದರು.