ಕೊಳ್ಳೇಗಾಲ ನಗರಸಭೆಯ ಕಾಂಗ್ರೆಸ್ ಸಭೇಲಿ ಇಬ್ಬರು ಬಿಜೆಪಿ ನಗರಸಭಾ ಸದಸ್ಯರು ಹಾಜರ್!

ಕನ್ನಡಪ್ರಭ ವಾರ್ತೆ ಕೊಳ್ಳೇಗಾಲ

ಕುಗ್ಗಿದ ಬಿಜೆಪಿ ಸಂಖ್ಯಾಬಲ: ಕಾಂಗ್ರೆಸ್ ಸದಸ್ಯರೊಡನೆ ಇಬ್ಬರು ನಗರಸಭಾ ಸದಸ್ಯರು ತೆರಳಿರುವುದನ್ನು ಗಮನಿಸಿದರೆ 13 ಸಂಖ್ಯೆಗಿದ್ದ ಸಂಖ್ಯಾಬಲ ಕುಗ್ಗಿದಂತಾಗಿದೆ. ಈಗಾಗಲೇ ಅನೇಕಾನೇಕ ಕಾರಣಗಳಿಗಾಗಿ ಬಿಜೆಪಿ ಚಿಹ್ನೆಯಡಿ ಗೆಲುವು ಸಾಧಿಸಿದ್ದ ಜಿಪಿ ಶಿವಕುಮಾರ್, ಮಾನಸ ಪ್ರಭುಸ್ವಾಮಿ, ನಾಗೇಂದ್ರ, ಧರಣೀಶ್ ಸೇರಿದಂತೆ 4ಮಂದಿ ಪಕ್ಷದ ಸಭೆಗಳಿಂದ ದೂರ ಉಳಿದಿದ್ದು ಬಹುತೇಕ ಬಿಜೆಪಿ ಸದಸ್ಯರು ಕಾಂಗ್ರೆಸ್‌ನಲ್ಲಿ ಗುರುತಿಸಿಕೊಂಡಿದ್ದಾರೆ. ಹಾಗಾಗಿಯೇ ಇಂದು ನಾಗೇಂದ್ರ, ಧರಣೀಶ್ ಮಾತ್ರ ಪ್ರವಾಸ ತೆರಳಿದ್ದು ಇನ್ನಿಬ್ಬರು ಏಕೆ ತೆರಳಿಲ್ಲ ಎಂಬುದು ಚರ್ಚೆಯ ಕೇಂದ್ರ ಬಿಂದುವಾಗಿದೆ. ಸುಮೇರ ಬೇಂಗ ಪರವಾಗಿ ಪತ್ನಿ, ಮಾನಸ ಪರವಾಗಿ ಆಯ್ಕೆಯ ಪತಿ ಪ್ರಭುಸ್ವಾಮಿ ಪ್ರವಾಸದ ವೇಳೆ ಮೈಸೂರಿನಲ್ಲಿ ಸೇರಿಕೊಂಡರು ಎನ್ನಲಾಗಿದೆ.

ಇಬ್ಬರು ಬಿಜೆಪಿ, 4 ಪಕ್ಷೇತರ ಸದಸ್ಯರು ಕೊಳ್ಳೇಗಾಲ ನಗರಸಭೆ ಅಧ್ಯಕ್ಷ ಗಾದಿಗಾಗಿ ಕಾಂಗ್ರೆಸ್ ಸದಸ್ಯರು ಕೈಗೊಂಡಿರುವ ಪ್ರವಾಸದಲ್ಲಿ 4 ಮಂದಿ ಪಕ್ಷೇತರರು, ಇಬ್ಬರು ಬಿಜೆಪಿ ಸದಸ್ಯರು ತೆರಳಿರುವ ಘಟನೆ ಜರುಗಿದೆ. ಸೋಮವಾರ ಮಧ್ಯಾಹ್ನ ಕಾಂಗ್ರೆಸ್ ಪಕ್ಷ ಚಿಹ್ನೆಯಡಿ ಆಯ್ಕೆಯಾದ ಜಿಎಂ ಸುರೇಶ್, ರೇಖಾ ರಮೇಶ್, ಸುಶೀಲ ಶಾಂತರಾಜು, ಪುಷ್ಪಲತಾ ಶಾಂತರಾಜು, ಭಾಗ್ಯಮ್ಮ, ಮಾಜಿ ಉಪಾಧ್ಯಕ್ಷ ಅಕ್ಮಲ್ ಪಾಶಾ ಸೇರಿದಂತೆ 10ಮಂದಿ ತೆರಳಿದ್ದಾರೆ. ಕಾಂಗ್ರೆಸ್‌ನ ಸುಮ ಸುಬ್ಬಣ್ಣ ಮತ್ತು ಮುಡಿಗುಂಡ ಮಹದೇವಮ್ಮ ಅವರು ಪ್ರವಾಸಕ್ಕೆ ತೆರಳಿಲ್ಲ, ಅದೇ ರೀತಿಯಲ್ಲಿ ಪಕ್ಷೇತರರರಾಗಿ ಆಯ್ಕೆಯಾದ ಮನೋಹರ್, ಎಪಿ ಶಂಕರ್, ಕವಿತಾ ರಾಜೇಶ್, ಶಂಕರ ನಾರಾಯಣ ಗುಪ್ತ ಪ್ರವಾಸದಲ್ಲಿ ಜೊತೆಗಿದ್ದಾರೆ. ಉಳಿದಂತೆ ಬಿಜೆಪಿ ಚಿಹ್ನೆಯಡಿ ಆಯ್ಕೆಯಾದ ನಾಗೇಂದ್ರ (ನಾಗ), ಧರಣೀಶ್ ಇಬ್ಬರು ಬಿಜೆಪಿ ಚಿಹ್ನೆಯಡಿ ಆಯ್ಕೆಯಾಗಿದ್ದು ಅವರು ಕಾಂಗ್ರೆಸ್ ಸದಸ್ಯರ ಪ್ರವಾಸದಲ್ಲಿ ಜೊತೆಗಿದ್ದಾರೆ. ಪ್ರವಾಸಕ್ಕೆ ತೆರಳಿದ ಸದಸ್ಯರಿಗೆ ಬ್ಲಾಕ್ ಅಧ್ಯಕ್ಷ ಆಲಹಳ್ಳಿ ತೋಟೇಶ್, ಕಾರ್ಯದರ್ಶಿ ಬಸ್ತಿಪುರ ರವಿ ಶುಭಕೋರಿದರು.