ವೀರಶೈವ ಸಂಸ್ಥೆಗಳು ಜಾಗೃತಿ ಮೂಡಿಸಲು ಮುಂದಾಗಿ

ಕನ್ನಡಪ್ರಭ ವಾರ್ತೆ ಹೊಸಕೋಟೆ

ನಗರದ ಮಾತೃಶ್ರೀ ವೀರಮ್ಮನವರ ಮಠದ ಆವರಣದಲ್ಲಿ ತಾಲೂಕು ವೀರಶೈವ ಆಗಮಿಕರು, ಪುರೋಹಿತರು ಹಾಗೂ ಅರ್ಚಕರ ಸಂಘ ಏರ್ಪಡಿಸಿದ್ದ 10ನೇ ವರ್ಷದ ರೇಣುಕಾಚಾರ್ಯರ ಜಯಂತಿ ಕಾರ್ಯಕ್ರಮದಲ್ಲಿ ಮಾತನಾಡಿದ ಅವರು, ಪರಂಪರೆಯನ್ನು ಉಳಿಸಿ ಬೆಳೆಸಬೇಕಾದ್ದು ಪ್ರತಿಯೊಬ್ಬ ವೀರಶೈವರ ಆದ್ಯ ಕರ್ತವ್ಯ. ಕಳೆದ ೧೦ ವರ್ಷಗಳಿಂದ ಸಂಘ ನಿರಂತರವಾಗಿ ರೇಣುಕಾಚಾರ್ಯರ ಜಯಂತಿ ಆಚರಿಸುತ್ತಿರುವುದು ಅಭಿನಂದನಾರ್ಹ. ವಿಶ್ವಗುರು ರೇಣುಕಾಚಾರ್ಯರು ಜಗದ್ವಿಖ್ಯಾತಿ ಪಡೆದುಕೊಂಡಿರುವ ಬಸವಣ್ಣನವರಂತೆ ವೀರಶೈವ ಸಮುದಾಯದ ಎರಡು ಕಣ್ಣುಗಳಿದ್ದಂತೆ. ಇಡೀ ಜಗತ್ತಿನಲ್ಲಿ ಅಗಸ್ತ್ಯ ಮಹರ್ಷಿಗಳಿಗೆ ಶಿವವೈಶಿಷ್ಟಾಂತದ್ವೈತವನ್ನು ಬೋಧಿಸುವ ಮೂಲಕ ವೀರಶೈವ ಧರ್ಮದ ಸಂಸ್ಥಾಪಕರಾಗಿದ್ದಾರೆ. ಅಷ್ಟಾವರ್ಣದಂತಹ ಪೂಜಾ ವಿಧಿ ವಿಧಾನಗಳನ್ನು ಒಳಗೊಂಡ ಆಚರಣೆ ವೀರಶೈವ ಸಮುದಾಯದಲ್ಲಿ ವಿಶಿಷ್ಟವಾಗಿದೆ. ಸಮಾಜದಲ್ಲಿ ಎಲ್ಲಾ ಸಮುದಾಯದವರನ್ನು ಒಗ್ಗೂಡಿಸಿಕೊಂಡು ಸಂಸ್ಕಾರ ನೀಡುವಂತಹ ವೀರಶೈವ ಧರ್ಮ ಹಾಗೂ ರೇಣುಕಾಚಾರ್ಯರ ಬಗ್ಗೆ ಧರ್ಮ ಜಾಗೃತಿ ಮೂಡಿಸುವಲ್ಲಿ ಮಠಾಧೀಶರಷ್ಟೇ ಅಲ್ಲದೆ ಇಂತಹ ವೀರಶೈವ ಸಂಘಟನೆಗಳ ಸಹಭಾಗಿತ್ವ ಅಗತ್ಯ. ಅರ್ಚಕರು ಭಕ್ತಾದಿಗಳಿಗೆ ದೇವರ ನಡುವಿನ ಕೊಂಡಿಯಂತಿದ್ದು ನಿಸ್ವಾರ್ಥ ಸೇವಾ ಮನೋಭಾವದಿಂದ ಕಾರ್ಯ ನೆರವೇರಿಸುವ ಮೂಲಕ ಜನಮನ್ನಣೆ ಪಡೆಯಬೇಕು ಎಂದು ಹೇಳಿದರು.

ತಾಲೂಕು ವೀರಶೈವ ಆಗಮಿಕರು, ಪುರೋಹಿತರು, ಅರ್ಚಕರ ಸಂಘದ ಅಧ್ಯಕ್ಷ ನಟರಾಜ ಶಾಸ್ತ್ರಿಗಳು ಮಾತನಾಡಿ, ಕಳೆದ ೧೦ ವರ್ಷಗಳಿಂದ ಮಾತೃಶ್ರೀ ವೀರಮ್ಮನವರ ಮಠದ ಆವರಣದಲ್ಲಿ ರೇಣುಕಾಚಾರ್ಯರ ಜಯಂತಿ ಕಾರ್ಯಕ್ರಮವನ್ನು ಏರ್ಪಡಿಸಲಾಗುತ್ತಿದೆ. ಈ ಬಾರಿ ಲೋಕಸಭಾ ಚುನಾವಣೆಯ ನೀತಿ ಸಂಹಿತೆ ಜಾರಿಯಲ್ಲಿರುವ ಕಾರಣದಿಂದಾಗಿ ಸರಳವಾಗಿ ಆಚರಿಸಲಾಗುತ್ತಿದೆ. ಬೆಳಿಗ್ಗೆ ರುದ್ರಾಭಿಷೇಕ, ವಿಶೇಷ ಪೂಜೆ ನೆರವೇರಿಸಲಾಗಿದೆ. ಮುಂದಿನ ವರ್ಷದ ಆಚರಣೆಯನ್ನು ಐವರು ಮಠಾಧೀಶರ ಸಮ್ಮುಖದಲ್ಲಿ ವಿಜೃಂಭಣೆಯಿಂದ ಆಚರಿಸಲು ಸಂಕಲ್ಪ ಮಾಡಲಾಗಿದೆ ಎಂದು ತಿಳಿಸಿದರು.