ನಾಯಿ ಸಾಕುವುದಕ್ಕೆ ಎಷ್ಟೆಲ್ಲಾ ಖರ್ಚು! ತಳಿ ನಾಯಿ ತರಬಯಸುವವರು ಈ ಲೆಕ್ಕ ನೋಡಿಕೊಳ್ಳಿ

1. ಆರಂಭಿಕ ವೆಚ್ಚಗಳು ಆಶ್ರಯ ಕೇಂದ್ರದಿಂದ ಸಾಕುಪ್ರಾಣಿಯನ್ನು ದತ್ತು ತೆಗೆದುಕೊಂಡರೆ ಖರ್ಚು ಇರುವುದಿಲ್ಲ. ಆದರೆ ಖರೀದಿ ಮಾಡುವುದಾದರೆ ತಳಿ ಪ್ರಕಾರವನ್ನು ಅವಲಂಬಿಸಿ ₹5,000 ರಿಂದ ₹1,50,000 ಅಥವಾ ಅದಕ್ಕಿಂತಲೂ ಹೆಚ್ಚು ದುಡ್ಡು ಕೊಡಬೇಕಾಗಬಹುದು. ಅದಕ್ಕೆ ಆಹಾರ ಮತ್ತು ನೀರಿನ ಬಟ್ಟಲುಗಳು, ಕಾಲರ್ ಮತ್ತು ಲೀಶ್, ಕ್ರೇಟ್ ಅಥವಾ ಬೆಡ್, ಲಿಟರ್ ಬಾಕ್ಸ್, ಆಟಿಕೆಗಳು ಇತ್ಯಾದಿಗಳಿಗೆ ₹3,000 ರಿಂದ ₹10,000ವರೆಗೆ ಖರ್ಚಾಗಬಹುದು. ಆರಂಭಿಕ ಹಂತದ ವೈದ್ಯಕೀಯ ತಪಾಸಣೆಗೆ ಮೊದಲ ತಿಂಗಳಲ್ಲಿ ಅಂದಾಜು ₹3,000 ರಿಂದ ₹5,000 ವರೆಗೆ ಖರ್ಚಾಗಬಹುದು.

2. ವೈದ್ಯಕೀಯ ಖರ್ಚು ವೆಚ್ಚ ಲಸಿಕೆಗಳು, ಆಗಾಗ್ಗೆ ಬೂಸ್ಟರ್‌ಗಳನ್ನು ಕೊಡಲು ವರ್ಷಕ್ಕೆ ₹2,000 ರಿಂದ ₹4,000 ಖರ್ಚಾಗಬಹುದು. ಹುಳು ಹುಪ್ಪಟೆ ಕೀಟಗಳಿಂದ ರಕ್ಷಣೆ ಒದಗಿಸುವ ಔಷಧಕ್ಕೆ ತಿಂಗಳಿಗೆ ₹200 ರಿಂದ ₹600 ವರೆಗೆ ಖರ್ಚಾಗಬಹುದು. ಕೆಲವು ಕಡ್ಡಾಯ ಚಿಕಿತ್ಸೆಗಳನ್ನು ಪಡೆಯಬೇಕಿರುತ್ತದೆ. ಇದಕ್ಕೆ ₹2,000 ರಿಂದ ₹10,000 ವರೆಗೆ ಖರ್ಚಾಗಬಹುದು. ಜೊತೆಗೆ ತುರ್ತು ಸಂದರ್ಭಗಳು, ಗಾಯಗಳು, ಅಥವಾ ಕರುಳಿನ ಸಮಸ್ಯೆ, ಕಿಡ್ನಿ ಕಾಯಿಲೆ ಇತ್ಯಾದಿ ಸಮಸ್ಯೆಗಳ ಚಿಕಿತ್ಸೆಗೆ ₹10,000 ದಾಟಬಹುದು.

3. ಆಹಾರ ಖರ್ಚುಗಳು ಆಹಾರ ವೆಚ್ಚವು ತಿಂಗಳಿಗೆ ₹1,500 ರಿಂದ ₹5,000 ದವರೆಗೆ ಇರಬಹುದು. ತಳಿ, ಅಲರ್ಜಿಗಳು, ಅಥವಾ ವೈದ್ಯಕೀಯ ಸ್ಥಿತಿಗೆ ಅನುಗುಣವಾಗಿ ವಿಶೇಷ ಆಹಾರದ ಅಗತ್ಯವಿದ್ದರೆ ₹3,000 ರಿಂದ ₹7,000 ವರೆಗೆ ಖರ್ಚಾಗಬಹುದು. ಕೆಲವೊಮ್ಮೆ ವಿಟಮಿನ್‌/ ಸಪ್ಲಿಮೆಂಟ್‌ಗಳನ್ನು ಕೊಡಬೇಕಾಗಿ ಬರಬಹುದು. ಅದಕ್ಕಾಗಿ ತಿಂಗಳ ಖರ್ಚಿನ ಮೇಲೆ ₹300 ರಿಂದ ₹1,000 ಎತ್ತಿಡಬೇಕು.

4. ತರಬೇತಿ ಖರ್ಚು ತರಬೇತಿ ನೀಡಲು ₹5,000 ರಿಂದ ₹15,000 ವರೆಗೆ ಖರ್ಚಾಗಬಹುದು. ನಿರ್ದಿಷ್ಟ ಸಮಸ್ಯೆಯನ್ನು ಪರಿಹರಿಸಲು ಉದಾಹರಣೆಗೆ ಜಾಸ್ತಿ ಆಕ್ರಮಣ ಮನೋಭಾವ ಇದ್ದರೆ ಅದನ್ನು ಪರಿಹರಿಸಲು ತಜ್ಞರಿಗೆ ಪ್ರತೀ ಸೆಷನ್‌ಗೆ ₹1,000 ರಿಂದ ₹2,500 ವರೆಗೆ ಕೊಡಬೇಕು. ಆಟಿಕೆಗಳು, ಪಜಲ್‌ಗಳು, ಅಗಿಯುವ ಐಟಂಗಳು ಇತ್ಯಾದಿಗಳಿಗೆ ತಿಂಗಳಿಗೆ ₹500 ರಿಂದ ₹1,000 ವರೆಗೆ ಖರ್ಚಾಗಬಹುದು.

5. ಪ್ರಯಾಣ ಕಾಲದ ವೆಚ್ಚ ನಾಯಿಗೆ ವಾಕಿಂಗ್ ಮಾಡಿಸುವ ಸೇವೆಗಳೂ ಈಗ ಲಭ್ಯವಾಗುತ್ತದೆ. ನೀವು ಬ್ಯುಸಿ ಇದ್ದ ಸಂದರ್ಭದಲ್ಲಿ ಈ ಸೇವೆ ಪಡೆಯಬಹುದು. ಅದಕ್ಕೆ ತಿಂಗಳಿಗೆ ₹2,000 ರಿಂದ ₹6,000 ವರೆಗೆ ಖರ್ಚಾಗಬಹುದು. ಪ್ರವಾಸ ಹೋಗುವಾಗ ನಾಯಿಗೆ ಪೆಟ್ ಬೋರ್ಡಿಂಗ್ ವ್ಯವಸ್ಥೆ ಕಲ್ಪಿಸಬೇಕೆಂದರೆ ಪ್ರತೀ ರಾತ್ರಿಗೆ ₹500 ರಿಂದ ₹2,000 ವರೆಗೆ ಬೇಕಾಗಬಹುದು. ಪ್ರವಾಸಕ್ಕೆ ನಾಯಿಯನ್ನು ಕರೆದೊಯ್ಯುತ್ತೀರಿ ಎಂದಾದರೆ ಅದಕ್ಕೆ ಬೇಕಾದ ವ್ಯವಸ್ಥೆ ಮಾಡಬೇಕು. ಆ ಶುಲ್ಕ, ಈ ಶುಲ್ಕ ಅಂತ ಸೇರಿ ₹2,000 ರಿಂದ ₹10,000 ವೆಚ್ಚ ಉಂಟಾಗಬಹುದು.

ಇವೆಲ್ಲಾ ಅಂದಾಜು ವೆಚ್ಚಗ‍ಳಷ್ಟೇ. ಇದರ ಜೊತೆ ಸೋಫಾ ಹರಿದರೆ, ಸ್ವಚ್ಛತೆಗೆ ಇತ್ಯಾದಿಗೆ ಒಂದಷ್ಟು ದುಡ್ಡು ಎತ್ತಿಡಬೇಕು. ನಾಯಿ ಸಾಕುವ ಸಂತೋಷ ಸುಮ್ಮನೆ ಸಿಗುವುದಿಲ್ಲ.