ಕೆಎಚ್‌ಬಿ ನಿವಾಸಿಗಳ ಸಮಸ್ಯೆಗೆ ಸಿಗದ ಪರಿಹಾರ

ಬಸವರಾಜ ಸರೂರ

ನಗರದ ಮಾಗೋಡ ರಸ್ತೆಯಲ್ಲಿ ಕರ್ನಾಟಕ ಗೃಹ ಮಂಡಳಿ (ಕೆಎಚ್‌ಬಿ) ನಿರ್ಮಿಸಿರುವ ಮನೆಗಳಲ್ಲಿ ವಾಸಿಸುವವರಿಗೆ ಒಂದೂವರೆ ದಶಕ ಕಳೆದರೂ ಸಮಸ್ಯೆಯಲ್ಲೇ ಒದ್ದಾಡುವಂತಾಗಿದೆ.

ಈ ಬಡಾವಣೆಯಲ್ಲಿ ಒಳಚರಂಡಿ ವ್ಯವಸ್ಥೆ ಹಾಳಾಗಿ ಹೋಗಿದ್ದು, ಕೆಲವು ಕಡೆ ವಿಲೇವಾರಿ ಚೆಂಬರ್‌ಗಳು ಬಾಯಿ ತೆರೆದುಕೊಂಡಿವೆ. ಟ್ರಾನ್ಸ್‌ಫಾರ್ಮರ್‌ಗಳು ತುಕ್ಕು ಹಿಡಿದಿದ್ದು ಅಪಾಯಕ್ಕೆ ಆಹ್ವಾನ ನೀಡುವಂತಿವೆ.

ಹಸ್ತಾಂತರಕ್ಕೆ ಅಸಮ್ಮತಿ:

ಕರ್ನಾಟಕ ಗೃಹ ಮಂಡಳಿಯ ಮೇಲೆ ನಂಬಿಕೆಯಿಟ್ಟು ನಿವೇಶನ ಖರೀದಿಸಿ ಮನೆಗಳನ್ನು ನಿರ್ಮಿಸಿಕೊಂಡಿದ್ದೇವೆ. ಆದರೆ ನಮ್ಮ ನಂಬಿಕೆ ಹುಸಿಯಾಗಿದ್ದು ಇದುವರೆಗೂ ನಾವು ಅನುಭವಿಸುತ್ತಿರುವ ತೊಂದರೆಗಳಿಗೆ ಪರಿಹಾರ ಸಿಕ್ಕಿಲ್ಲ. ಹಾವೇರಿಯಲ್ಲಿ ಜರುಗಿದ ಜನತಾ ದರ್ಶನದಲ್ಲಿ ಜಿಲ್ಲಾ ಉಸ್ತುವಾರಿ ಸಚಿವರಿಗೆ ಮನವಿ ಸಲ್ಲಿಸಿ ಎರಡು ತಿಂಗಳು ಗತಿಸಿದರೂ ಪರಿಹಾರ ಮಾತ್ರ ಶೂನ್ಯವಾಗಿದೆ ಎಂದು ನಿವಾಸಿಗಳಾದ ಬಸವರಾಜ ಬಡಿಗೇರ, ವಿರೂಪಾಕ್ಷಪ್ಪ ಅರವಂಟಿಗಿ, ಅಶೋಕ ಸುರಗೊಂಡರ, ಲಿಂಗರಾಜ ಹನಗೋಡಿಮಠ, ಅಶೋಕರೆಡ್ಡಿ ಜಟ್ಟಪ್ಪನವರ, ಮಹಾಲಿಂಗಯ್ಯ ಸಾಲಿಮಠ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.