ಅಲಂಕಾರಿಕ ಮೀನುಗಳಿಗೆ ಬೇಡಿಕೆ ಹೆಚ್ಚು: ಡೀನ್ ಡಾ.ಮಂಜಪ್ಪ.ಕೆ

ಕನ್ನಡಪ್ರಭ ವಾರ್ತೆ ಹಿರಿಯೂರು

ರಾಷ್ಟ್ರೀಯ ಮೀನುಗಾರಿಕೆ ಅಭಿವೃದ್ಧಿ ಮಂಡಳಿ, ಹೈದರಬಾದ್ ಪ್ರಾಯೋಜಕತ್ವದಲ್ಲಿ ತಾಲೂಕಿನ ಬಬ್ಬೂರು ಫಾರಂನ ವಲಯ ಕೃಷಿ ಮತ್ತು ತೋಟಗಾರಿಕೆ ಸಂಶೋಧನಾ ಕೇಂದ್ರದ ಶತಮಾನೋತ್ಸವ ಭವನದಲ್ಲಿ 3 ದಿನದ ಮೀನುಕೃಷಿ, ಸಿಹಿನೀರು ಅಲಂಕಾರಿಕ ಮೀನು ಉತ್ಪಾದನೆ ಮತ್ತು ಮಾರಾಟ ಕುರಿತ ತರಬೇತಿ ಕಾರ್ಯಕ್ರಮ ಉದ್ಘಾಟಿಸಿ ಮಾತನಾಡಿದರು.

ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸಿದ್ದ ವಲಯ ಕೃಷಿ ಮತ್ತು ತೋಟಗಾರಿಕೆ ಸಂಶೋಧನಾ ಕೇಂದ್ರದ ಸಹ ಸಂಶೋಧನಾ ನಿರ್ದೇಶಕ ಡಾ. ಸುರೇಶ್ ಏಕಬೋಟೆ ಮಾತನಾಡಿ, ಕೇವಲ ಶ್ರೀಮಂತರಿಗೆ ಸೀಮಿತವಾಗಿದ್ದ ಅಲಂಕಾರಿಕ ಮೀನುಗಳು ಇಂದು ಸರ್ವ ಜನಾಂಗದವರು ವಾಸ್ತು ಹಾಗೂ ಅಲಂಕಾರಕ್ಕಾಗಿ ಬಳಸುತ್ತಿದ್ದು, ಅಲಂಕಾರಿಕ ಮೀನುಗಳಿಗೆ ಬೇಡಿಕೆ ಹೆಚ್ಚಿಸಿದೆ. ರೈತರು 3 ದಿನದ ಈ ತರಬೇತಿ ಕಾರ್ಯಕ್ರಮದ ಮೂಲಕ ಪರಿಣಿತಿ ಹೊಂದಿ ಮೀನು ಕೃಷಿಯನ್ನು ಮನೆಯ ಹತ್ತಿರವಿರುವ ಅಂಗಳದಲ್ಲಿ ಅಥವಾ ಹಿತ್ತಲಿನಲ್ಲಿ ಸಿಮೆಂಟ್ ತೊಟ್ಟಿ ನಿರ್ಮಿಸಿಕೊಂಡು ಮಾಡಬಹುದಾಗಿದೆ. ಸುಮಾರು 400 ಲೀಟರ್ ಸಾಮರ್ಥ್ಯದ 10 ಸಿಮೆಂಟ್ ತೊಟ್ಟಿಗಳಿಗೆ ಪ್ರತಿ ತೊಟ್ಟಿಗೆ 100ರಂತೆ 1000 ಮೀನು ಮರಿ ಬಿತ್ತನೆ ಮಾಡಿದಾಗ ಶೇ.80ರಷ್ಟು ಅಂದರೆ 800 ಮೀನು ಬದುಕುಳಿಯುತ್ತವೆ. ಉತ್ತಮ ಪೋಷಣೆ ಹಾಗೂ ನೀರಿನ ಗುಣಮಟ್ಟ ಕಾಪಾಡಿದಲ್ಲಿ ಶೇ.90ರಷ್ಟು ಮೀನು ಬದುಕುಳಿಯುತ್ತವೆ. ಪ್ರತಿ ಮೀನನ್ನು 5 ರೂನಂತೆ ಮಾರಾಟ ಮಾಡಿದರೂ ಕನಿಷ್ಟ 4 ಸಾವಿರ ರು. ದೊರೆಯುತ್ತದೆ. ಇದರ ಉತ್ಪಾದನೆಗೆ ಬೇಕಾದ ಮೀನುಮರಿಗಳು, ಆಹಾರ, ಗೊಬ್ಬರದ ಖರ್ಚು ಸೇರಿ 810 ರು. ಗಳಾಗುತ್ತದೆ. ಅಲ್ಲಿಗೆ ನಿವ್ವಳವಾಗಿ 3,190 ರೂ ಲಾಭ ಪಡೆಯಬಹುದು. ಅಲ್ಲದೇ ವರ್ಷಕ್ಕೆ 4-5 ಬೆಳೆ ತೆಗೆಯಬಹುದು. ಇದರಿಂದ ರೈತರ ಆರ್ಥಿಕತೆ ಸುಧಾರಿಸುತ್ತದೆ ಎಂದರು.