ನರೇಗಾ ಯೋಜನೆಯಡಿ ಕಲ್ಯಾಣಿ ಅಭಿವೃದ್ಧಿ

ಎಸ್.ಎಂ,ಸೈಯದ್ ಗಜೇಂದ್ರಗಡ

೨೦೨೨-೨೩ನೇ ಸಾಲಿನಲ್ಲಿ ಮಹಾತ್ಮ ಗಾಂಧಿ ರಾಷ್ಟ್ರೀಯ ಗ್ರಾಮೀಣ ಉದ್ಯೋಗ ಖಾತ್ರಿ ಯೋಜನೆಯಡಿ ದಕ್ಷಿಣ ಕಾಶಿ ಎಂದೇ ಪ್ರಸಿದ್ಧಿಯಾಗಿರುವ ಕಾಲಕಾಲೇಶ್ವರ ದೇವಸ್ಥಾನದ ಭಕ್ತರು ಸ್ನಾನ ಮಾಡಲು ಸ್ಥಾಪಿಸಲಾಗಿದ್ದ ಕಲ್ಯಾಣಿ ಹೊಂಡದ ಪುನಶ್ಚೇತನ ಕಾಮಗಾರಿಯನ್ನು ಕೈಗೊಂಡು ಅಂದಾಜು ₹ ೫ ಲಕ್ಷ ವೆಚ್ಚದಲ್ಲಿ ಅಭಿವೃದ್ಧಿ ಪಡಿಸಲಾಗಿದೆ. ಇದಕ್ಕಾಗಿ ಮಾನವ ದಿನಗಳು ಸೃಜನೆಯಾಗಿದ್ದು, ಅಕುಶಲ ಕಾರ್ಮಿಕರಿಗೆ ₹೧.೧೫ ಲಕ್ಷ ಕೂಲಿ ಪಾವತಿಯಾಗಿದೆ.

ನರೇಗಾ ಅಡಿ ಅಭಿವೃದ್ಧಿ: ಕಾಲಕಾಲೇಶ್ವರ ಗ್ರಾಮದಲ್ಲಿರುವ ಜಳಕದ ಹೊಂಡ (ಕಲ್ಯಾಣಿ)ಯ ಸುತ್ತುಲೂ ಮುಳ್ಳುಕಂಟಿ ಬೆಳೆದು, ಸಂಪೂರ್ಣ ಹೂಳು ತುಂಬಿಕೊಂಡು ನೀರು ಗಲೀಜಾಗಿ ಸ್ನಾನಕ್ಕೆ ಬರದಂತಾಗಿತ್ತು. ಇದನ್ನು ಗ್ರಾಮಸ್ಥರು ನರೇಗಾ ಯೋಜನೆಯಡಿ ಕಲ್ಯಾಣಿ ಅಭಿವೃದ್ಧಿ ಪಡಿಸಲು ಗ್ರಾಪಂಗೆ ಅರ್ಜಿ ಸಲ್ಲಿಸಿದರು. ನಂತರ ಗ್ರಾಮದ ಸದಸ್ಯರು ಅಧ್ಯಕ್ಷರ ಮತ್ತು ಪಿಡಿಒಗಮನಕ್ಕೆ ತಂದು ೨೦೨೨-೨೩ ನೇ ಸಾಲಿನಲ್ಲಿ ಕ್ರಿಯೋಜನೆಯಲ್ಲಿ ಸೇರ್ಪಡೆ ಮಾಡಿಸಿ ಕಲ್ಯಾಣಿ ಅಭಿವೃದ್ಧಿ ಕಾಮಗಾರಿ ಪ್ರಾರಂಭಿಸಿ ಮುಳ್ಳುಕಂಟಿ ಸ್ವಚ್ಛಗೊಳಿಸಿ, ಕೂಲಿಕಾರರಿಂದ ಹೂಳು ಎತ್ತಿಸಿ, ಕಲ್ಯಾಣಿ ಒಳಗೆ ಮಣ್ಣು ಬಿಳದಂತೆ ಸುತ್ತಲೂ ಕಂಪೌಂಡ ಕಟ್ಟಿಸಲಾಗಿದೆ. ಪರಿಣಾಮ ದೇವಸ್ಥಾನದ ಭಕ್ತ ಸಮೂಹಕ್ಕೆ ಜಳಕದ ಹೊಂಡ ಕಲ್ಯಾಣಿಗೆ ಮರುಜೀವ ಸಿಕ್ಕಿದೆ.

ಮುಳ್ಳುಕಂಟಿ, ವಿಷ ಜಂತುಗಳು, ಕೆಸರು ತುಂಬಿ ತೆಪ್ಪೆ ಗುಂಡಿಯಂತ್ತಾಗಿದ್ದ ಜಳಕದ ಕಲ್ಯಾಣಿಗೆ ನರೇಗಾ ಯೋಜನೆಯಡಿ ಅಭಿವೃದ್ಧಿ ಪಡಿಸುವ ಮೂಲಕ ಕಲ್ಯಾಣಿಗೆ ಮರು ಜೀವನ ನೀಡಲಾಗಿದೆ. ಕಾಲಕಾಲೇಶ್ವರ ದೇವಸ್ಥಾನ ಇರುವ ಕಾರಣ ಜಳಕದ ಕಲ್ಯಾಣಿ ಅಭಿವೃದ್ಧಿ ಪಡಿಸಿರುವುದರಿಂದ ಲಕ್ಷಾಂತರ ಭಕ್ತರ ಸ್ನಾನಕ್ಕೆ ಅನೂಕೂಲವಾಗಿದೆ ಎಂದು ತಾಪಂ ಕಾರ್ಯನಿರ್ವಾಹಕ ಅಧಿಕಾರಿ ಬಸವರಾಜ ಬಡಿಗೇರ ತಿಳಿಸಿದ್ದಾರೆ.