ಅಡಕೆ ಬೆಳೆ ಉಳಿಸಲು ಟ್ಯಾಂಕರ್‌ ಮೊರೆ ಹೋದ ಬ್ಯಾಡಗಿ ತಾಲೂಕಿನ ಬೆಳೆಗಾರರು

ಬ್ಯಾಡಗಿ: ಪ್ರಸಕ್ತ ವರ್ಷ ವರುಣದೇವ ಮುನಿಸಿಕೊಂಡ ಬೆನ್ನಲ್ಲೇ ಮುಂಗಾರು ಮತ್ತು ಹಿಂಗಾರು ಸಂಪೂರ್ಣ ಕೈಕೊಟ್ಟಿದೆ. ಯಾವುದೇ ಬೆಳೆಗಳು ನಿರೀಕ್ಷಿತ ಮಟ್ಟದಲ್ಲಿ ರೈತನ ಕೈಹಿಡಿಯಲಿಲ್ಲ, ಕೊಳವೆಬಾವಿ ನೀರಿನಿಂದ ತೋಟಗಾರಿಕೆ ನಡೆಸುತ್ತಿದ್ದ ಕೆಲವರಿಗೂ ಅಂತರ್ಜಲ ಮಟ್ಟ ಕುಸಿತಗೊಂಡಿದ್ದು, ಇದರ ಪರಿಣಾಮವಾಗಿ ಅಡಕೆ ಬೆಳೆಗಾರರು ತಮ್ಮ ಬೆಳೆಗಳನ್ನು ಉಳಿಸಿಕೊಳ್ಳಲು ಟ್ಯಾಂಕರ್ ಮೊರೆ ಹೋಗಿದ್ದಾರೆ.

ದೀರ್ಘಾವಧಿ ಬೆಳೆ ಅಡಕೆ: ಗೋವಿನ ಜೋಳ ತಾಲೂಕಿನ ಪ್ರಮುಖ ಬೆಳೆಯಾಗಿದೆ. ಆದರೆ, ಮಲೆನಾಡಿಗೆ ಸೀಮಿತವಾಗಿದ್ದ ಅಡಕೆ ಬೆಳೆ ತಾಲೂಕಿಗೆ ಕಾಲಿಟ್ಟಿದ್ದು, ಇತ್ತೀಚೆಗೆ ಕೆಲ ರೈತರು ಲಾಭದಾಯಕ ಕೃಷಿ ನಡೆಸುವ ಉದ್ದೇಶದಿಂದ ಅಡಕೆ ಬೆಳೆ ಮೋರೆ ಹೊಗಿದ್ದಾರೆ, ಇದೊಂದು ದೀರ್ಘಾವಧಿ ಬೆಳೆಯಾಗಿದ್ದರೂ ಸಹ ಶಾಶ್ವತ ಆದಾಯ ನೀಡಲಿದೆ ಎಂಬುದು ರೈತರ ಬಲವಾದ ನಂಬಿಕೆ ಹೀಗಾಗಿ ತಾಲೂಕಿನಲ್ಲಿ ಶೇ.5ರಷ್ಟಿದ್ದ ಪ್ರದೇಶ ಶೇ. 20ಕ್ಕೆ ತಲುಪಿದೆ.

ಅಂತರ್ಜಲ ಮಟ್ಟ ಕುಸಿತ: ಪ್ರಾಕೃತಿಕ ವಿಕೋಪದಿಂದ ಇತ್ತೀಚೆಗೆ ಮಳೆಯ ಪ್ರಮಾಣ ಕುಂಟುತ್ತಾ ಸಾಗಿದೆ, ಮೊದಲೆಲ್ಲ ನೂರು ಅಡಿಗೆ ಸಿಗುತ್ತಿದ್ದ ನೀರು ಇದೀಗ 800 ಅಡಿ ಕೊರೆದರೂ ಸಿಗುತ್ತಿಲ್ಲ, ಬೆಳೆದು ನಿಂತ ಅಡಕೆಯನ್ನು ಉಳಿಸಿಕೊಳ್ಳುವುದೇ ದುಸ್ತರವಾಗಿದೆ. ದುಬಾರಿ ಹಣವನ್ನು ತೆತ್ತು ಟ್ಯಾಂಕರ್ ಮೂಲಕ ನೀರು ತರಿಸಿ ಅಡಕೆಗೆ ಬೆಳೆಗೆ ಹಾಕಲು ಮುಂದಾಗಿದ್ದಾರೆ. ಆದರೆ ಇದಕ್ಕೆ ಈ ವರ್ಷ ಮಳೆ ಕೊರತೆಯಿಂದ ಅಡಕೆ ಬೆಳೆಗಳನ್ನ ಉಳಿಸಿಕೊಳ್ಳುವುದು ರೈತರ ಪಾಲಿಗೆ ಕಷ್ಟ ಸಾಧ್ಯವಾಗಿದೆ.ಸರ್ಕಾರ ಸ್ಪಂದಿಸುತ್ತಿಲ್ಲ: ತಾಲೂಕಿನಲ್ಲಿ ಯಾವುದೇ ನದಿ ಹರಿದಿಲ್ಲ, ನೀರಾವರಿ ಯೋಜನೆಗಳು ಕಾಗದಕ್ಕೆ ಮಾತ್ರ ಸೀಮಿತವಾಗಿದೆ, ರೈತರಿಗೆ ಕೊಳವೆ ಬಾವಿಗಳ ನೀರೇ ಗತಿ, ಪ್ರಸಕ್ತ ವರ್ಷ ಮಳೆಯಿಲ್ಲದೇ ಕೊಳವೆಭಾವಿಗಳು ಬತ್ತಿ ಹೋಗಿದ್ದು, ಇಂತಹ ಸಂದರ್ಬದಲ್ಲಿ ಸರಕಾರ ರೈತರ ಕಷ್ಟಕ್ಕೆ ಸ್ಪಂದಿಸಬೇಕಿದೆ ಎನ್ನುತ್ತಾರೆ ಶಿಡೆನೂರಿನ ಅಡಕೆ ಬೆಳೆಗಾರ ಮಲ್ಲಿಕಾರ್ಜುನ ದುರ್ಗದ.