ವಿದ್ಯಾರ್ಥಿಗಳಲ್ಲಿ ಸಾಹಿತ್ಯಾಭಿರುಚಿ ಹೆಚ್ಚಿಸಿ: ಡಾ.ಬೋರೇಗೌಡ

ಕನ್ನಡಪ್ರಭ ವಾರ್ತೆ ಮಂಡ್ಯ

ಬುಧವಾರ ನಗರದ ಪತ್ರಕರ್ತರ ಭವನದಲ್ಲಿ ಹಮ್ಮಿಕೊಳ್ಳಲಾಗಿದ್ದ ವಾರದ ಸಾಹಿತ್ಯ ಅತಿಥಿ ಸಂವಾದ ಕಾರ್ಯಕ್ರಮದಲ್ಲಿ ಭಾಗವಹಿಸಿ ಮಾತನಾಡಿ, ಸಮ್ಮೇಳನದಲ್ಲಿ ವಿದ್ಯಾರ್ಥಿಗಳಿಗಾಗಿಯೇ ಒಂದು ವಿಭಾಗವನ್ನು ತೆರೆದು ಅವರಲ್ಲಿ ಸಾಹಿತ್ಯಾಸಕ್ತಿ ಮೂಡಿಸುವ ಕೆಲಸ ಮಾಡಬೇಕು. ಅವರಿಗಾಗಿಯೇ ಗೋಷ್ಠಿಗಳು, ಪ್ರಶ್ನೋತ್ತರ ವಿಭಾಗವನ್ನು ಸೃಷ್ಟಿಸಬೇಕು. ಇದು ವಿದ್ಯಾರ್ಥಿಗಳಲ್ಲಿ ಸಾಹಿತ್ಯಾಭಿರುಚಿ ಹೆಚ್ಚಿಸಲು ಅನುಕೂಲವಾಗಲಿದೆ ಎಂದು ಸಲಹೆ ನೀಡಿದರು.

ಸಾಹಿತ್ಯೇತರರಿಗೆ ಸಮ್ಮೇಳನಾಧ್ಯಕ್ಷ ಸ್ಥಾನ ಬೇಡ:

ಮಠಾಧೀಶರು, ರಾಜಕೀಯ ವ್ಯಕ್ತಿಗಳು ಸಾಹಿತ್ಯ ಕ್ಷೇತ್ರಕ್ಕೆ ಕೊಡುಗೆ ನೀಡಿದ್ದರೆ, ಸಾಧನೆ ಮಾಡಿದ್ದರೆ ಅಂತಹವರನ್ನು ಸಮ್ಮೇಳನಾಧ್ಯಕ್ಷರನ್ನಾಗಿ ಮಾಡಿದರೆ ಅಭ್ಯಂತರವಿಲ್ಲ. ಸಾಹಿತ್ಯಕ್ಕಾಗಿ ತಮ್ಮ ಜೀವಮಾನವನ್ನೇ ತೊಡಗಿಸಿಕೊಂಡವರನ್ನು ಸಮ್ಮೇಳನಾಧ್ಯಕ್ಷರನ್ನಾಗಿ ಮಾಡಿದರೆ ಹೆಚ್ಚು ಸೂಕ್ತ ಎನ್ನುವುದು ನನ್ನ ಅಭಿಪ್ರಾಯ ಎಂದರು.

ಸಮ್ಮೇಳನಕ್ಕೆ ಕೋಟ್ಯಂತರ ರು. ಹಣ ವ್ಯಯಿಸುವ ಬದಲಿಗೆ, ಸಾಹಿತಿಗಳನ್ನು ಅಭಿವೃದ್ಧಿಪಡಿಸುವ, ನಾಡು- ನುಡಿಯ ಏಳಿಗೆಗೆ ರಚನಾತ್ಮಕ ಕಾರ್ಯಗಳನ್ನು ಕೈಗೊಳ್ಳುವ ಬದ್ಧತೆಯನ್ನು ಸರ್ಕಾರ ಪ್ರದರ್ಶಿಸಬೇಕು. ಸಾಹಿತ್ಯ ಸಮ್ಮೇಳನ ಅದ್ಧೂರಿ, ವೈಭವ ಪೂರಿತವಾಗಿ ನಡೆಯಬೇಕೆ ಎಂಬ ಪ್ರಶ್ನೆ ಅನೇಕ ಕನ್ನಡಿಗರು, ಸಾಹಿತ್ಯಾಸಕ್ತರಲ್ಲಿದ್ದು, ಈ ಭಾವನೆ ನನ್ನಲ್ಲಿಯೂ ಇದೆ. ಆದರೆ, ಸಮ್ಮೇಳನದ ಹೆಸರಿನಲ್ಲಿ ದುಂದುವೆಚ್ಚ ಮಾಡುವ ಬದಲಿಗೆ ಕನ್ನಡಕ್ಕೆ ವಿಶಿಷ್ಟ ಕೊಡುಗೆ ನೀಡಿ ಸಾಧನೆ ಮಾಡಿದ ಹಿರಿಯ ಮುತ್ಸದ್ದಿ ಲೇಖಕರನ್ನು ಸಮ್ಮೇಳನಾಧ್ಯಕ್ಷರನ್ನಾಗಿ ಮಾಡಿ ಅವರ ಸಾಕ್ಷಿಯಲ್ಲಿ ಪ್ರಚಲಿತ ವಿದ್ಯಮಾನಗಳ ಕುರಿತಂತೆ ರಚನಾತ್ಮಕ ಚರ್ಚೆಗಳಾಗಿ ಸಾಹಿತ್ಯದ ಮುನ್ನಡೆಗೆ ಮಾರ್ಗಸೂಚಿಸಿ ಮೂಡಿಸುವ ಚರ್ಚಾಗೋಷ್ಠಿ ನಡೆಸಲಿ ಎಂಬುದು ನನ್ನ ಉದ್ದೇಶ ಎಂದು ಹೇಳಿದರು.

ಸಾರ್ವಜನಿಕ, ವಿಜ್ಞಾನ, ಶಿಕ್ಷಣ, ಆಡಳಿತ, ಸಂಶೋಧನಾ ಕ್ಷೇತ್ರಗಳಲ್ಲಿ ಭಾಷೆಯ ಬಳಕೆ ಕಡಿಮೆಯಾಗುತ್ತಿದೆ ಎಂಬುದು ಒಪ್ಪಿಕೊಳ್ಳುವಂತಹ ವಿಷಯ. ಆದರೆ ಕನ್ನಡ ಭಾಷೆಗೆ ತನ್ನದೇ ಆದ ಪಾರಂಪರಿಕ ಶಕ್ತಿಯಿದೆ. ಒಂದು ಜನಭಾಷೆಯಾಗಿ, ಆಡು ನುಡಿಯಾಗಿ ನಶಿಸಿಹೋಗಲು ಸಾಧ್ಯವಿಲ್ಲ. ಭಾಷೆಗೆ ಧಕ್ಕೆಯಾಗುವಂತಹ ಒತ್ತಡಗಳಿದ್ದು, ಬೇರೆ ಭಾಷೆಗಳ ವಲಸೆಯಿಂದ ಕನ್ನಡಿಗರಿಗೆ ಅವಕಾಶ ದೊರೆಯುತ್ತಿಲ್ಲ ಎನ್ನುವುದು ಒಪ್ಪತಕ್ಕ ವಿಚಾರವಾಗಿದೆ. ಆಡಳಿತ ವ್ಯವಸ್ಥೆ ಮಾತೃಭಾಷೆಗೆ, ಭಾಷಿಗರಿಗೆ ತೊಂದರೆಯಾಗದಂತೆ ಕ್ರಮ ವಹಿಸಬೇಕು ಎಂದು ಒತ್ತಾಯಿಸಿದರು.

ಸ್ಮರಣ ಸಂಚಿಕೆಯಲ್ಲಿ ಮುಖ್ಯವಾಗಿ ಐದು ಭಾಗಗಳನ್ನು ರೂಪಿಸಿಕೊಳ್ಳಲಾಗಿದ್ದು, ಮೊದಲನೆಯದಾಗಿ ಮಂಡ್ಯ ಪರಿಚಯಿಸುವ ದಿಕ್ಕಿನಲ್ಲಿ ಮಧುರ ಮಂಡ್ಯ ಎಂಬ ಭಾಗದಲ್ಲಿ ಇಲ್ಲಿನ ಸಾಹಿತ್ಯ, ಕೃಷಿ, ಆರೋಗ್ಯ ಇತ್ಯಾದಿಗಳ ಸಾಕ್ಷತಾ ಆಂದೋಲನ, ಕೋವಿಡ್ ಸಂದರ್ಭದ ಸಮಸ್ಯೆಗಳು ಸೇರಿದಂತೆ ಹಲವು ಲೇಖನಗಳು, ಎರಡನೆಯದಾಗಿ ಕರ್ನಾಟಕ ಭಾರತ ಭಾಗದಲ್ಲಿ ರಾಜ್ಯದ ಸಂಬಂಧ ಸಾಹಿತ್ಯಿಕ ವಿದ್ಯಮಾನ, ಸಾಧನೆಗಳು, ಅಭಿವೃದ್ಧಿ ಸಂಬಂಧ ಲೇಖನಗಳು, ಮೂರನೇದಾಗಿ ವಿಶ್ವ ಕರ್ನಾಟಕ ಎಂಬ ಭಾಗದಲ್ಲಿ ಕರ್ನಾಟಕದ ಹೊರಬಾಗದ, ಅನಿವಾಸಿ ಕನ್ನಡಿಗರ ಸಾಧನೆಗಳ, ಹೋರಾಟಗಳ ಪರಿಚಯ ಸಂಬಂಧ ಲೇಖನಗಳು, ನಾಲ್ಕನೆಯದಾಗಿ ಅಭಿವೃದ್ಧಿ ಭಾರತ ಎಂಬ ಭಾಗದಡಿ ದೇಶ- ವಿದೇಶಗಳಲ್ಲಿ ಕನ್ನಡಗರಿಂದಾದ ಅಭಿವೃದ್ಧಿ ಕಾರ್ಯಗಳ ಹಾಗೂ ಅವುಗಳ ಇತಿಮಿತಿಗಳ ಸಂಬಂಧ ಲೇಖನಗಳು, ಐದನೇಯದಾಗಿ ಚಿತ್ರ ಸಂಪುಟ ಭಾಗದಲ್ಲಿ ಮಂಡ್ಯ ಜಿಲ್ಲೆಯ ಸಾಂಸ್ಕೃತಿಕ ಮಹತ್ವ ತಿಳಿಸುವ ಘಟನಾವಳಿಗಳಿಗೆ ಸಂಬಂಧಿಸಿದ ಭಾವಚಿತ್ರಗಳ ಸಂಗ್ರಹದ ಸಂಚಿಕೆ ನಿರ್ಮಿಸಲಾಗುವುದು ಎಂದು ಹೇಳಿದರು.