ವಿದ್ಯಾರ್ಥಿಗಳಲ್ಲಿ ಶಿಸ್ತು, ನೈತಿಕತೆ, ದೇಶಪ್ರೇಮ ಬೆಳೆಸಿ: ಶೇಷಾದ್ರಿ

ರಾಮನಗರ: ವಿದ್ಯಾರ್ಥಿ ಸಮುದಾಯವನ್ನು ಸರಿದಾರಿಯತ್ತ ಮುನ್ನಡೆಸುವ ಶಕ್ತಿ ಉಪನ್ಯಾಸಕರಿಗಿದೆ ಎಂದು ನಗರಸಭೆ ಅಧ್ಯಕ್ಷ ಕೆ.ಶೇಷಾದ್ರಿ(ಶಶಿ) ಅಭಿಪ್ರಾಯಪಟ್ಟರು.

ಸಂಪನ್ಮೂಲ ವ್ಯಕ್ತಿಗಳಿಂದ ವೃತ್ತಿ ನಿರತ ಉಪನ್ಯಾಸಕರಿಗೆ ತರಬೇತಿ ನೀಡುವುದು ಕೆಲಸದಲ್ಲಿ ನೈತಿಕತೆ, ಏಕಾಗ್ರತೆ ತರಲು, ಆಧುನಿಕ ತಂತ್ರಜ್ಞಾನದ ಅಳವಡಿಕೆ ಮಾಡಿಕೊಳ್ಳಲು, ಜ್ಞಾನದ ಬಳಕೆಯಲ್ಲಿ ನವೀನತೆ ರೂಢಿಸಲು, ಕೌಶಲಗಳನ್ನು ಕಲಿತು ವಿದ್ಯಾರ್ಥಿಗಳಿಗೂ ಕಲಿಸಿ, ಉತ್ತಮ ಫಲಿತಾಂಶ ಪಡೆಯಲು ಹಾಗೂ ಭವಿಷ್ಯದಲ್ಲಿ ಮಾನವ ಸಂಪನ್ಮೂಲವನ್ನು ಸದ್ಬಳಕೆ ಮಾಡಿಕೊಳ್ಳಲು ನೆರವಾಗುತ್ತದೆ. ಈ ದಿಶೆಯಲ್ಲಿ ಶಾಲಾ ಶಿಕ್ಷಣ ಇಲಾಖೆ (ಪದವಿ ಪೂರ್ವ) ಹಾಗೂ ಜಿಲ್ಲಾ ಪ್ರಾಂಶುಪಾಲರ ಸಂಘ ಉಪನ್ಯಾಸಕರಿಗೆ ಒಂದು ದಿನದ ಪುನಃಶ್ಚೇತನ ಕಾರ್ಯಾಗಾರ ಅಯೋಜಿಸಿರುವುದು ಶ್ಲಾಘನೀಯ ಎಂದರು.

ಪ್ರತಿಯೊಬ್ಬ ಉಪನ್ಯಾಸಕರು ವಿದ್ಯಾರ್ಥಿಗಳ ಫಲಿತಾಂಶ ಉತ್ತಮಪಡಿಸುವ ನಿರ್ದಿಷ್ಟ ಗುರಿ ಮತ್ತು ಉದ್ದೇಶ ಹೊಂದಿರಬೇಕು. ಉಪನ್ಯಾಸಕರು ಒಂದು ಗಂಟೆ ಪಾಠ ಮಾಡಲು ಹತ್ತು ಗಂಟೆ ಓದಬೇಕು. ಕಥೆ, ಕಾದಂಬರಿ, ವೃತ್ತ ಪತ್ರಿಕೆಗಳನ್ನು ನಿತ್ಯ ಅಧ್ಯಯನ ಮಾಡಿ, ತಾವು ತಿಳಿದ ವಿಚಾರಗಳನ್ನು ವಿಭಿನ್ನ ಮಾರ್ಗದಲ್ಲಿ ವಿದ್ಯಾರ್ಥಿಗಳಿಗೆ ತಲುಪಿಸುವ ಜಾಣ್ಮೆ ಇರಬೇಕು. ಶಿಕ್ಷಣಕ್ಕೆ ಸಮಾಜವನ್ನು ಉನ್ನತೀಕರಿಸುವ ಶಕ್ತಿ ಇದೆ. ಶಿಕ್ಷಣವನ್ನು ಕಲಿಸಿಕೊಡುವ ಜವಾಬ್ದಾರಿ ನಮ್ಮ ಮೇಲಿದೆ ಎಂಬ ಭಾವನೆ ಪ್ರತೀ ಉಪನ್ಯಾಸಕರಲ್ಲಿ ಇರಬೇಕು ಎಂದು ಹೇಳಿದರು.

ಲೇಖಕ ಡಾ.ಎಚ್.ಆರ್.ಕೃಷ್ಣಯ್ಯಗೌಡ ಮಾತನಾಡಿ, ಭಾರತದ ವಿಶ್ವವಿದ್ಯಾಲಯಗಳ ಪಠ್ಯಕ್ರಮದಲ್ಲಿ ಬದಲಾವಣೆ ತರಬೇಕು. ಪಠ್ಯದಲ್ಲಿ ಕಲಿತ ಜ್ಞಾನವನ್ನು ಆಯಾ ಭೂಪ್ರದೇಶಗಳ ಕೃಷಿ, ಕೈಗಾರಿಕೆ, ಸಾಮಾಜಿಕ ಸಮಸ್ಯೆಗಳ ಪರಿಹಾರಕ್ಕೆ ಪ್ರಯತ್ನಿಸುವಂತೆ ರೂಪಿಸಬೇಕು. ಪ್ರಾಯೋಗಿಕವಾಗಿ ಅನ್ವಯಿಸುವಿಕೆಯ ನೆಲೆಯಲ್ಲಿ ಬೋಧಿಸುವ ಕೆಲಸ ಆಗಬೇಕು. ಪಠ್ಯಕ್ರಮ ಹಳೆಯದಾಗಿ, ಕಲಿತರೂ ಪ್ರಯೋಜನಕ್ಕೆ ಬಾರದಿದ್ದಾಗ ಅಧ್ಯಯನದ ಕಡೆಗೆ ವಿದ್ಯಾರ್ಥಿಗಳು ನಿರಾಸಕ್ತಿ ಹೊಂದುತ್ತಾರೆ. ಅದು ದೇಶದ ಶೈಕ್ಷಣಿಕೆ ಹಿನ್ನಡೆ ಮತ್ತು ಅನಭಿವೃದ್ಧಿಗೆ ಕಾರಣವಾಗುತ್ತದೆ ಎಂದು ಹೇಳಿದರು.

ಶಾಲಾ ಶಿಕ್ಷಣ ಇಲಾಖೆ (ಪದವಿ ಪೂರ್ವ) ಉಪ ನಿರ್ದೇಶಕಿ ಎಂ.ಪಿ.ನಾಗಮ್ಮ ಕಳೆದ ವರ್ಷದ ದ್ವಿತೀಯ ಪಿಯುಸಿ ವಾರ್ಷಿಕ ಪರೀಕ್ಷೆಯ ರಾಜ್ಯಮಟ್ಟದ ಫಲಿತಾಂಶದಲ್ಲಿ ರಾಮನಗರ ಜಿಲ್ಲೆ 16 ನೇ ಸ್ಥಾನದಲ್ಲಿದೆ. ಅದನ್ನು ಈ ವರ್ಷ ಹತ್ತರೊಳಗೆ ತರುವ ಸದುದ್ದೇಶದಿಂದ ಎಲ್ಲಾ ವಿಷಯಗಳ ಉಪನ್ಯಾಸಕರಿಗೆ ಕಾರ್ಯಾಗಾರ ಏರ್ಪಡಿಸಲಾಗಿದೆ ಎಂದರು.

ರಾಮನಗರದ ಗೌಸಿಯಾ ಪದವಿ ಪೂರ್ವ ಕಾಲೇಜಿನಲ್ಲಿ ಉಪನ್ಯಾಸಕರ ವಿಷಾಯಾಧಾರಿತ ಕಾರ್ಯಾಗಾರವನ್ನು ನಗರಸಭೆ ಅಧ್ಯಕ್ಷ ಕೆ.ಶೇಷಾದ್ರಿ ಉದ್ಘಾಟಿಸಿದರು.