ಜಲಜೀವನ್ ಕಾಮಗಾರಿ ಕಳಪೆ: ಭ್ರಷ್ಟಾಚಾರದ ಶಂಕೆ

ಬಿಜೆಪಿ ಮುಖಂಡ, ಕಾಫಿ ಮಂಡಳಿ ಸದಸ್ಯ ಭಾಸ್ಕರ್ ವೆನಿಲ್ಲಾ ಆರೋಪ

ಪ್ರತಿಮನೆಗೂ ಪೈಪ್ ಲೈನ್ ಮಾಡಿ ನೀರು ನೀಡಬೇಕೆನ್ನುವ ಪ್ರಧಾನಿ ನರೇಂದ್ರ ಮೋದಿ ಅವರ ಮಹತ್ವಾಕಾಂಕ್ಷೆ ಯೋಜನೆ ಜಲ ಜೀವನ್ ಯೋಜನೆ ಎನ್.ಆರ್.ಪುರ ತಾಲೂಕಿನಲ್ಲಿ ಕಳಪೆ ಕಾಮಗಾರಿಯಾಗಿದ್ದು ಭ್ರಷ್ಟಾಚಾರದ ಶಂಕೆ ಮೂಡಿದೆ ಎಂದು ದೂರಿದ್ದಾರೆ.

ಈ ಕುರಿತು ಪಿಆರ್‌ಇಡಿ ಇಲಾಖೆಗೆ, ಜಿಲ್ಲಾಧಿಕಾರಿಗಳು ಹಾಗೂ ಕೇಂದ್ರ ಜಲಜೀವನ್ ಮಿಷನ್ ಮುಖ್ಯಸ್ಥರಿಗೆ ದೂರು ನೀಡಲಾಗುವುದು. ಈಗಾಗಲೇ ಪಿಆರ್‌ಇಡಿ ಇಂಜಿನಿಯರ್ ಅವರಿಗೆ ಪೋನ್ ಮೂಲಕ ದೂರು ನೀಡಿದ್ದರೂ ಇದುವರೆಗೂ ಯಾವುದೇ ಕ್ರಮ ಕೈಗೊಳ್ಳದಿರುವುದು ನೋಡಿದರೆ ಇದರಲ್ಲಿ ಅಧಿಕಾರಿಗಳು ಭ್ರಷ್ಟಾಚಾರದಲ್ಲಿ ಭಾಗಿಯಾಗಿರುವ ಶಂಕೆ ವ್ಯಕ್ತವಾಗಿದೆ.

ಮಾಜಿ ಸಚಿವ ಡಿ.ಎನ್.ಜೀವರಾಜ್ ಮತ್ತು ಸಂಸದೆ ಶೋಭಾ ಕರಂದ್ಲಾಜೆಯವರ ಪರಿಶ್ರಮದಿಂದ ತಾಲೂಕಿಗೆ ಒಟ್ಟು 51.87 ಕೋಟಿ ರು. ಯೋಜನೆಗೆ ಬಿಡುಗಡೆಗೊಂಡಿದ್ದು, ಬಾಳೆಹೊನ್ನೂರಿನ ಕೆಇಬಿ ಕಾಲೋನಿಗೆ ರು. 1.95 ಕೋಟಿ, ಹೊಸಮನೆ-ಮಾಗೋಡಿಗೆ ರು.84 ಲಕ್ಷ, ಕಡ್ಲೆಮಕ್ಕಿ, ಮಠದ ಕಾಲೋನಿಗೆ 1.84 ಕೋಟಿ, ಮೆಣಸುಕೊಡಿಗೆ-ತಲವಾನೆಗೆ ರು.62 ಲಕ್ಷ, ಸೀಕೆ-ವಾಟುಕೊಡಿಗೆಗೆ ರು.87 ಲಕ್ಷ, ಕೆಸುವಿನಮನೆ ಮುದುಗುಣಿಗೆ ರು.1.12ಕೋಟಿ ಬಿಡುಗಡೆಯಾಗಿದೆ.