ಪೂರ್ವಜನ್ಮದ ದುಷ್ಕರ್ಮ ಫಲ ರೋಗ: ರಾಘವೇಶ್ವರ ಶ್ರೀ

ಗೋಕರ್ಣ: ಪೂರ್ವಜನ್ಮದಲ್ಲಿ ಮಾಡಿದ ದುಷ್ಕರ್ಮಗಳ ಫಲವೇ ರೋಗ. ನಮ್ಮ ಪಾಪವನ್ನು ಪ್ರಕೃತಿ ಕೀಳುವ ಪ್ರಯತ್ನ ಮಾಡುತ್ತದೆ. ಅದು ರೋಗವಾಗಿ ನಮಗೆ ಬಾಧೆ ಕೊಡುತ್ತದೆ. ಇವುಗಳನ್ನು ಔಷಧಿ, ಅರ್ಚನೆ, ಹೋಮ, ಅರ್ಚನೆ ವಿಧಿಗಳಿಂದ ಗುಣಪಡಿಸಬಹುದು ಎಂದು ರಾಘವೇಶ್ವರ ಭಾರತೀ ಸ್ವಾಮೀಜಿ ನುಡಿದರು. ಅಶೋಕೆಯ ಗುರುದೃಷ್ಟಿಯಲ್ಲಿ ಚಾತುರ್ಮಾಸ್ಯ ಕೈಗೊಂಡಿರುವ ಶ್ರೀಗಳು 41ನೇ ದಿನವಾದ ಶುಕ್ರವಾರ ಕಾಲ ಪ್ರವಚನ ಸರಣಿಯಲ್ಲಿ ಆಶೀರ್ವಚನ ಅನುಗ್ರಹಿಸಿದರು.ಜ್ಯೋತಿಷ್ಯಶಾಸ್ತ್ರದಲ್ಲಿ ಔಷಧ ತಯಾರಿಸುವ ವಿಧಾನವನ್ನು ಕೂಡಾ ವಿವರಿಸಲಾಗಿದೆ. ಗೃಹಗಳು ಪ್ರಕೃತಿ. ಇದರ ಮೂಲಕ ರೋಗನಿರ್ಣಯ ಮತ್ತು ಚಿಕಿತ್ಸಾ ನಿರ್ಣಯವನ್ನೂ ಮಾಡಬಹುದು. ಶಾಸ್ತ್ರವನ್ನು ಧರ್ಮೋಕ್ತವಾಗಿ ಬಳಸಬೇಕೇ ವಿನಾ ಸ್ವಾರ್ಥಕ್ಕಾಗಿ ಬಳಸಿಕೊಳ್ಳಬಾರದು ಎಂದರು.ಶಾರೀರಿಕ ರೋಗಕ್ಕಿಂತ ಮಾನಸಿಕ ರೋಗಗಳಿಗೆ ಚಿಕಿತ್ಸೆ ಕಷ್ಟ. ಎಂಟು ಬಗೆಯ ಉನ್ಮಾದರೋಗಗಳಿವೆ. ಜ್ಞಾನಕಾರಕ ಗುರು. ಚಂದ್ರ ಪಾಪಕಾರಕ ಗ್ರಹಗಳ ಜತೆ ಸೇರಿದರೆ ಆ ವ್ಯಕ್ತಿಯ ಮನಸ್ಸಿನ ಸ್ವಾಸ್ಥ್ಯ ಕೆಡುತ್ತದೆ. ಉನ್ಮಾದರೋಗ ಲಕ್ಷಣ ರಾಮನ ಜಾತಕದಲ್ಲೂ ಕಾಣಸಿಗುತ್ತದೆ. ಸೀತಾಪಹರಣದ ಸಂದರ್ಭದಲ್ಲಿ ಸ್ವತಃ ರಾಮ ಉನ್ಮಾದಕ್ಕೊಳಗಾಗುತ್ತಾನೆ. ಸೀತೆಯ ಬಗೆಗೆ ರಾಮನಿಗೆ ಇದ್ದ ಪ್ರೀತಿಯನ್ನು ಇದು ಸೂಚಿಸುತ್ತದೆ. ಅರಣ್ಯಕಾಂಡದ 60ನೇ ಸರ್ಗದ ಶೀರ್ಷಿಕೆಯೇ ರಾಮೋನ್ಮಾದಃ ಎಂದು ಬಣ್ಣಿಸಿದರು.

ಪ್ರಾಣಿಗಳಲ್ಲಿಯೂ ಶೂರರು, ಧರ್ಮಕ್ಕೆ ರಕ್ಷಣೆ ಕೊಡುವವರು ಇದ್ದಾರೆ ಎಂದು ಲಕ್ಷ್ಮಣನನ್ನು ಕುರಿತು ರಾಮ, ಸೀತಾಪಹರಣ, ಜಟಾಯು ಮೋಕ್ಷದ ಬಳಿಕ ಆತನ ಬಗ್ಗೆ ಹೇಳುತ್ತಾನೆ. ಅಷ್ಟರ ಮಟ್ಟಿಗೆ ಜಟಾಯು ರಾಮನಿಗೆ ಪ್ರಿಯವಾಗಿತ್ತು. ರಾಮಚಂದ್ರಾಪುರ ಮಠದ ಆನೆ ರಾಮಭದ್ರ ಕೂಡಾ ಈ ಸಾಲಿಗೆ ಸೇರುತ್ತಾನೆ. ಆತನ ಸೇವೆ ಇಂದಿಗೂ ದಂತಸಿಂಹಾಸನದ ರೂಪದಲ್ಲಿ ಸಲ್ಲುತ್ತಿದೆ. ಅಷ್ಟಮ ರಾಘವೇಶ್ವರರು ಮಹಾಪ್ರಸ್ಥಾನಕ್ಕೆ ಹೊರಟ ಬಳಿಕ ಆಹಾರ ನೀರು ಬಿಟ್ಟು ಪ್ರಾಣ ಬಿಟ್ಟ ರಾಮಭದ್ರನ ಸೇವಾನಿಷ್ಠೆ ಬಣ್ಣಿಸಲಸದಳ ಎಂದರು.ಬೆಳ್ತಂಗಡಿ ಶಾಸಕ ಮತ್ತು ಬಿಜೆಪಿ ರಾಜ್ಯ ಯುವ ಮೋರ್ಚಾ ಕಾರ್ಯದರ್ಶಿ ಹರೀಶ್ ಪೂಂಜಾ ಭೇಟಿ ನೀಡಿ ಶ್ರೀಗಳಿಂದ ಆಶೀರ್ವಾದ ಪಡೆದರು. ರಾಮಭದ್ರನ ಮಹತಿಯ ಅನಾವರಣವನ್ನು ಶ್ರೀಪರಿವಾರದ ಅನಂತ ಅವರು ನೆರವೇರಿಸಿದರು. ಪಟ್ಟೇಗಾರ ಸಮಾಜದ ವತಿಯಿಂದ ಸುವರ್ಣಪಾದುಕಾ ಪೂಜೆ ನೆರವೇರಿತು.