ಹೊಂಬಾಳಮ್ಮನ ಕೆರೆಗೆ ಕಾಯಕಲ್ಪ ನೀಡುವಂತೆ ಸಾರ್ವಜನಿಕರ ಆಗ್ರಹ

ಎಚ್.ಆರ್.ಮಾದೇಶ್

ಪಟ್ಟಣದ ಚರಂಡಿ ನೀರು ಕೆರೆಗೆ ಸೇರಿ ಕಲುಷಿತಗೊಂಡಿರುವ ನಾಡಪ್ರಭು ಕೆಂಪೇಗೌಡರು ಕಟ್ಟಿಸಿರುವ ಐತಿಹಾಸಿಕ ಹೊಂಬಾಳಮ್ಮನಕೆರೆಗೆ ಕಾಯಕಲ್ಪ ನೀಡಬೇಕಿದೆ. ಹೊಂಬಾಳಮ್ಮನಪೇಟೆಗೆ ಮೊದಲು ಚೆಲುವರಾಯಪಟ್ಟಣ ಎಂಬ ಹೆಸರಿತ್ತು. ಚೆಲುವರಾಯಸ್ವಾಮಿ ಪ್ರಸಿದ್ಧ ದೇವಸ್ಥಾನ ಇರುವುದರಿಂದ ಚೆಲುವರಾಯಪಟ್ಟಣ ಎಂಬ ಹೆಸರು ಬಂದಿತ್ತು. ಕ್ರಮೇಣ ಹೊಂಬಾಳಮ್ಮನಪೇಟೆಯಾಗಿ ಬದಲಾಗಿ ಈಗ ಹೊಂಬಾಳಮ್ಮನ ಕೆರೆ ಎಂಬ ಹೆಸರು ಬಂದಿದೆ.

ಹಲವು ವರ್ಷಗಳ ಹಿಂದೆ ಹೊಂಬಾಳಮ್ಮನಕೆರೆ ಅಭಿವೃದ್ಧಿಗಾಗಿ ಭೂಮಿಪೂಜೆ ನೆರವೇರಿಸಲಾಗಿತ್ತು. ಆದರೆ ಮಾಗಡಿ- ಬೆಂಗಳೂರು ನಾಲ್ಕು ಪಥದ ಕೆಶಿಫ್ ರಸ್ತೆ ಕಾಮಗಾರಿ ಆರಂಭವಾದ ನಂತರ ರಸ್ತೆಗೆ ಕೆರೆಯ ಎಷ್ಟು ಭಾಗ ಹೋಗುತ್ತದೆಯೋ, ನಂತರ ಅಭಿವೃದ್ಧಿ ಮಾಡೋಣ ಎಂದು ಕಳೆದ ಮೂರು ವರ್ಷಗಳಿಂದಲೂ ಕೆರೆ ಅಭಿವೃದ್ಧಿ ಮಾಡಿಲ್ಲ. ಈಗ ರಸ್ತೆ ಅಗಲೀಕರಣ ಮಾಡುತ್ತಿದ್ದು ರಸ್ತೆ ಜಾಗ ಗುರುತಿಸಲಾಗಿದೆ, ಕೂಡಲೇ ಹೊಂಬಾಳಮ್ಮನ ಕೆರೆ ಅಭಿವೃದ್ಧಿ ಮಾಡುವಂತೆ ಪಟ್ಟಣ ನಾಗರಿಕರಿಂದ ಒತ್ತಾಯ ಕೇಳಿ ಬಂದಿದೆ.

ಅಂತರ್ಜಲದ ಹೆಚ್ಚಳಕ್ಕೆ ಸಹಕಾರಿ:

‘ಹಲ ವರ್ಷಗಳ ಹಿಂದೆಯೇ ಸರ್ಕಾರಿ ಬಸ್ ನಿಲ್ದಾಣ ಮಾಡಲು ಕೆರೆ ಮುಚ್ಚುವ ಹುನ್ನಾರ ನಡೆದಿತ್ತು. ಅಂದಿನ ಜಿಲ್ಲಾಧಿಕಾರಿಗಳಿಗೆ ಕೆರೆಯ ಮಹತ್ವದ ಬಗ್ಗೆ ತಿಳಿಸಿ, ಹೋರಾಟ ಮಾಡಿದ ಪರಿಣಾಮ ಕೆಂಪೇಗೌಡರ ಐತಿಹಾಸಿಕ ಕೆರೆ ಉಳಿದಿದೆ. ಈ ಹಿಂದೆ ಹೊಂಬಾಳಮ್ಮನ ಪೇಟೆಯ ಹಲವು ಬಾವಿಗಳಿಗೆ ಹೊಂಬಾಳಮ್ಮನ ಕೆರೆ ಅಂತರ್ಜಲವೇ ಮೂಲವಾಗಿತ್ತು. ಈಗ ಕೆರೆ ಅಭಿವೃದ್ಧಿಪಡಿಸಿ ಗತವೈಭವ ಸ್ಥಾಪಿಸಬೇಕಿದೆ’.

‘ಅಂತರ್ಜಲ ಹೆಚ್ಚಾದಾಗ ಮಾತ್ರ ಬಾವಿ, ಬೋರ್ ವೆಲ್ ಗಳಲ್ಲಿ ನೀರು ಬರಲು ಸಾಧ್ಯ. ಚರಂಡಿ ನೀರು. ಕಳೆ ಗಿಡಗಳು ಬೆಳೆದು ಕೆರೆ ಅಂದವನ್ನೇ ಕಳೆದುಕೊಂಡಿದೆ, ಕೂಡಲೇ ಸರ್ಕಾರ ಕೆರೆಯ ಅಭಿವೃದ್ಧಿಪಡಿಸಿ ಅಂತರ್ಜಲ ಮಟ್ಟ ವೃದ್ಧಿಸಬೇಕಿದೆ. ಈ ಬಗ್ಗೆ ಹಲವು ಬಾರಿ ಶಾಸಕರಿಗೆ, ತಹಸೀಲ್ದಾರ್ ಅವರಿಗೆ ಕೆರೆ ಅಭಿವೃದ್ಧಿಗಾಗಿ ಮನವಿ ಸಲ್ಲಿಸಲಾಗಿದೆ’.

‘ಕೆರೆ ಉಳಿಸಿದಾಗ ಮಾತ್ರ ಅಂತರ್ಜಲ ವೃದ್ಧಿಯಾಗಿ ಪ್ರಾಣಿ ಪಕ್ಷಿಗಳಿಗೆ ಕುಡಿಯುವ ನೀರು ಸಿಗುತ್ತದೆ. ಪಟ್ಟಣದ ಹೃದಯ ಭಾಗದಲ್ಲಿರುವ ಹೊಂಬಾಳಮ್ಮನಪೇಟೆ ಕೆರೆ ಅಭಿವೃದ್ಧಿಪಡಿಸಿ ಸಾರ್ವಜನಿಕರಿಗೆ ಅನುಕೂಲ ಮಾಡಿಕೊಡಬೇಕು. ಹೇಮಾವತಿ ನೀರಿಗಾಗಿ ಹೋರಾಟ ಮಾಡುತ್ತಿದ್ದೇವೆ. ಕೆರೆ ಅಭಿವೃದ್ಧಿಪಡಿಸಿದಾಗ ಮಾತ್ರ ನೀರು ಉಳಿಸಿಕೊಳ್ಳಲು ಸಾಧ್ಯ. ಕೂಡಲೇ ಕೆರೆ ಅಭಿವೃದ್ಧಿಗೆ ಮುಂದಾಗಿ’.