ಕಳಚಿತು ಪರಂಪರೆಯ ಯಕ್ಷಗಾನ ಹಾಸ್ಯ ಕೊಂಡಿ: ಹೃದಯಾಘಾತದಿಂದ ಬಂಟ್ವಾಳ ಜಯರಾಮ ಆಚಾರ್ಯ ನಿಧನ

ಕನ್ನಡಪ್ರಭ ವಾರ್ತೆ ಬಂಟ್ವಾಳ

ಇದರೊಂದಿಗೆ ಸುಮಾರು ಐದು ದಶಕಗಳ ಕಾಲ ಯಶಸ್ವಿ ತಿರುಗಾಟ ನಡೆಸಿದ ಪರಂಪರೆಯ ಹಾಸ್ಯದ ಕೊಂಡಿ ಕಳಚಿದಂತಾಗಿದೆ.

ಆಸ್ಪತ್ರೆಯಿಂದ ಮೃತದೇಹವನ್ನು ಬೆಂಗಳೂರಿನ ಕಲಾ ಪೋಷಕ ಆರ್.ಕೆ ಭಟ್ಟರ ಮನೆಗೆ ಕರೆದೊಯ್ದು ಬಳಿಕ ಆಂಬುಲೆನ್ಸ್ ಮೂಲಕ ಬಂಟ್ವಾಳದ ಮನೆಗೆ ತರಲಾಯಿತು. ಅಪರಾಹ್ನ ಬಂಟ್ವಾಳರ ಮನೆಯಲ್ಲಿ ಅಪಾರ ಸಂಖ್ಯೆ ಅಭಿಮಾನಿಗಳು ಅಂತಿಮ ನಮನ ಸಲ್ಲಿಸಿದರು. ಬಳಿಕ ಅಂತ್ಯ ಸಂಸ್ಕಾರ ನಡೆಯಿತು.

ಬಂಟ್ವಾಳರ ಕಲಾ ಪಯಣ:ಬಂಟ್ವಾಳದಲ್ಲಿ 1957 ಅ. 12ರಂದು ಬಂಟ್ವಾಳ ಗಣಪತಿ ಆಚಾರ್ಯ, ಭವಾನಿ ಅಮ್ಮ ಪುತ್ರನಾಗಿ ಜನಿಸಿದ ಜಯರಾಮ ಆಚಾರ್ಯ, ಬಂಟ್ವಾಳ ಸರ್ಕಾರಿ ಹಿರಿಯ ಪ್ರಾಥಮಿಕ ಶಾಲೆಯಲ್ಲಿ (ಬೋರ್ಡ್ ಶಾಲೆ)ಯಲ್ಲಿ ವಿದ್ಯಾಭ್ಯಾಸ ನಡೆಸಿದರು. ತಂದೆಯವರ ಪ್ರೇರಣೆಯಿಂದ ಅಮ್ಟಾಡಿ, ಸೊರ್ನಾಡು ಮೇಳಗಳಲ್ಲಿ ತಿರುಗಾಟ ನಡೆಸಿ ವೇಷವನ್ನೂ ಮಾಡಿದ್ದರು. ಬಳಿಕ ಶ್ರೀ ಕ್ಷೇತ್ರ ಧರ್ಮಸ್ಥಳದಿಂದ ನಡೆಸಲ್ಪಡುತ್ತಿದ್ದ ‘ಲಲಿತ ಕಲಾ ಕೇಂದ್ರ’ಕ್ಕೆ ಸೇರಿ ಯಕ್ಷಗಾನ ಹೆಜ್ಜೆಗಾರಿಕೆ ಕಲಿತರು. ಬಳಿಕ ಕಟೀಲು ಮೇಳದಲ್ಲಿ 4 ವರ್ಷ, ಪುತ್ತೂರು ಮೇಳ, ಕದ್ರಿ ಮೇಳ, ಕುಂಬಳೆ ಮೇಳದಲ್ಲಿ ತಿರುಗಾಟ ನಡೆಸಿದರು. ಮತ್ತೆ ಕಟೀಲು ಮೇಳ, ಎಡನೀರು ಮೇಳ, ಹೊಸನಗರ ಮೇಳ, ಬಳಿಕ ಹನುಮಗಿರಿ ಮೇಳ ಸೇರಿದಂತೆ ಸುಮಾರು 50 ವರ್ಷಗಳ ಕಾಲ ವ್ಯಾವಸಾಯಿಕ ಕಲಾವಿದರಾಗಿ ದುಡಿದಿದ್ದಾರೆ.

ಶುದ್ಧ ಹಾಸ್ಯ ಮೂಲಕ ಪ್ರೇಕ್ಷಕರನ್ನು ರಂಜಿಸುತ್ತಿದ್ದ ಜಯರಾಮ ಆಚಾರ್ಯ ಕೆಲ ಸಿನಿಮಾಗಳಲ್ಲಿಯೂ ಗಮನೀಯ ಪಾತ್ರ ನಿರ್ವಹಿಸಿದವರು. ವಿಜಯ, ಮಕರಂದ, ದಾರುಕ, ಬಾಹುಕ, ರಕ್ಕಸ, ದೂತ, ನಾರದ, ಮಾಲಿಂಗ, ವೃದ್ಧ ಬ್ರಾಹ್ಮಣ, ಪಾಪಣ್ಣ, ತ್ರಿಪುರ ಮಥನದ ಭಾಗವತ, ಬಿಲ್ಲಹಬ್ಬದ ಜಗಜಟ್ಟಿ, ನಳದಮಯಂತಿಯ ಬಾಹುಕ, ದೇವಿಮಹಾತ್ಮೆಯ ಮಾಲಿನಿದೂತ, ಪಾತ್ರಿ, ಪುರೋಹಿತ ಸಹಿತ ಅನೇಕ ವಿಶಿಷ್ಟ ಪಾತ್ರಗಳಿಂದ ಅವರು ಹೆಸರುವಾಸಿ. ತುಳು ಯಕ್ಷಗಾನ ಪ್ರಸಂಗಗಳಲ್ಲೂ ತನ್ನ ವಿಶಿಷ್ಟ ಅಭಿನಯದಿಂದ ಪ್ರೇಕ್ಷಕರನ್ನು ರಂಜಿಸಿದ್ದರು. . ಅನೇಕ ಬಾರಿ ವಿದೇಶದಲ್ಲೂ ಯಕ್ಷಗಾನ ಪ್ರದರ್ಶನಗಳಲ್ಲಿ ಪಾಲ್ಗೊಂಡಿದ್ದ ಇವರು ನಾಟಕಗಳಲ್ಲಿಯೂ ಹಾಸ್ಯ ಪಾತ್ರಗಳಲ್ಲಿ ಮಿಂಚಿ ಪ್ರೇಕ್ಷಕರ ಮನಗೆದ್ದವರು.

-ವಳಕುಂಜ ರವಿಶಂಕರ ಭಟ್‌, ಕಟೀಲು ಮೇಳದ ಹಿರಿಯ ಹಾಸ್ಯಗಾರ.