ಮುದ್ರಾ ಯೋಜನೆಗೆ 10 ವರ್ಷ : ಆರ್ಥಿಕತೆ ಮರು ರೂಪಿಸುತ್ತಿರುವ ಮುದ್ರಾ ಯೋಜನೆ - ಮಹಿಳೆಯರಿಗೆ ಹೆಚ್ಚು ಪ್ರಯೋಜನ

-ಡಾ। ಸೌಮ್ಯ ಕಾಂತಿ ಘೋಷ್, ಸಮೂಹ ಮುಖ್ಯ ಆರ್ಥಿಕ ಸಲಹೆಗಾರ, ಎಸ್‌ಬಿಐ.

ʻಮುದ್ರಾʼ ಸಾಲಗಳು ಆರ್ಥಿಕ ಒಳಗೊಳ್ಳುವಿಕೆಯನ್ನು ಸುಧಾರಿಸುವುದಲ್ಲದೆ ಆರ್ಥಿಕವಾಗಿ ದುರ್ಬಲ ರಾಜ್ಯಗಳನ್ನು ತಲುಪಲು ನೆರವಾಗುತ್ತಿವೆ ಎಂಬುದನ್ನು ಸೂಚಿಸುತ್ತವೆ. ಈ ಅವಳಿ ಪುರಾವೆಗಳು, ಆರ್ಥಿಕ ಸಂಪನ್ಮೂಲಗಳನ್ನು ಹೆಚ್ಚು ಅಗತ್ಯವಿರುವ ಪ್ರದೇಶಗಳತ್ತ ಹರಿಸುವುದನ್ನು ಖಚಿತಪಡಿಸಿಕೊಳ್ಳುವ ಮೂಲಕ ಎಲ್ಲರನ್ನೂ ಒಳಗೊಂಡ ಬೆಳವಣಿಗೆಯನ್ನು ಉತ್ತೇಜಿಸಲು ಯೋಜನೆಯ ಕಾರ್ಯತಂತ್ರವನ್ನು ಒತ್ತಿಹೇಳುತ್ತವೆ.

2015ರ ಏಪ್ರಿಲ್ 08ರಂದು ಗೌರವಾನ್ವಿತ ಪ್ರಧಾನಿಯವರು ಪ್ರಾರಂಭಿಸಿದ ʻಪ್ರಧಾನ ಮಂತ್ರಿ ಮುದ್ರಾ ಯೋಜನೆʼಗೆ (ಪಿಎಂಎಂವೈ) ಒಂದು ದಶಕ ಸಂದಿದೆ. ʻಶಿಶುʼ, ʻಕಿಶೋರ್ʼ, ʻತರುಣ್ʼ ಮತ್ತು 2024-25ರಲ್ಲಿ ಪರಿಚಯಿಸಲಾದ ʻತರುಣ್ ಪ್ಲಸ್ʼ ಎಂಬ ನಾಲ್ಕು ವರ್ಗಗಳಡಿ ʻಪಿಎಂಎಂವೈʼ ಒಟ್ಟು ₹20 ಲಕ್ಷಗಳವರೆಗೆ ಮೇಲಾಧಾರ ರಹಿತ ಸಾಂಸ್ಥಿಕ ಸಾಲವನ್ನು ಖಾತರಿಪಡಿಸಿದೆ. ಈ ಹಿಂದೆ ಸಾಲಗಳನ್ನು ಪಡೆದುಕೊಂಡ ಮತ್ತು ಸಕಾಲಿಕ ಮರುಪಾವತಿ ಮೂಲಕ ತಮ್ಮ ಸಾಲ ಯೋಗ್ಯತೆಯನ್ನು ಸಾಬೀತುಪಡಿಸಿದ ʻತರುಣ್‌ʼ ವರ್ಗಕ್ಕಾಗಿ ʻತರುಣ್ ಪ್ಲಸ್ʼ ವರ್ಗವನ್ನು ವಿಶೇಷವಾಗಿ ವಿನ್ಯಾಸಗೊಳಿಸಲಾಗಿದೆ.

ಈ ಕ್ರಾಂತಿಕಾರಿ ಯೋಜನೆಯ ದಕ್ಷತೆ ಮತ್ತು ಪರಿಣಾಮಕಾರಿತ್ವವನ್ನು ಹೆಚ್ಚಿಸುವ ನಿಟ್ಟಿನಲ್ಲಿ, ಭಾರತ ಸರ್ಕಾರವು ಹಲವು ಕ್ರಮಗಳನ್ನು ಕೈಗೊಂಡಿದ್ದು ಅವುಗಳಲ್ಲಿ

(i) ಸಾಲದ ಅರ್ಜಿಗಳನ್ನು ಸಲ್ಲಿಸಲು ಅನುಕೂಲವಾಗುವಂತೆ ಬೆಂಬಲ,

(ii) ʻಪಿಎಸ್‌ಬಿʼ ಮತ್ತು ʻಜನಸಮರ್ಥ್ʼ ಪೋರ್ಟಲ್ ಮೂಲಕ ಆನ್‌ಲೈನ್ ಅರ್ಜಿಗಳು ಹಾಗೂ

(iii) ʻಶಿಶುʼ ಸಾಲಗಳ ಸಕಾಲಿಕ ಮರುಪಾವತಿಗೆ 2% ಬಡ್ಡಿ ರಿಯಾಯಿತಿಯಂತಹ ಹಲವಾರು ಉಪಕ್ರಮಗಳು ಸೇರಿವೆ.

ಯೋಜನೆಯ ಪ್ರಾರಂಭದಿಂದಲೂ, ಇದು ಭಾರಿ ಆಕರ್ಷಣೆಯನ್ನು ಪಡೆಯುತ್ತಿದ್ದು, ಈ ನಿಟ್ಟಿನಲ್ಲಿ ಪ್ರಗತಿಯು ಸಾಕಷ್ಟು ಅದ್ಭುತವಾಗಿದೆ ಮತ್ತು ಇದರ ಪರಿಣಾಮವು ಬಹಳ ವ್ಯಾಪಕವಾಗಿದೆ.

ಒಟ್ಟಾರೆಯಾಗಿ (ಫೆಬ್ರವರಿ 2025 ರವರೆಗೆ), 52 ಕೋಟಿಗೂ ಹೆಚ್ಚು ʻಪಿಎಂಎಂವೈʼ ಖಾತೆಗಳನ್ನು ತೆರೆಯಲಾಗಿದ್ದು, ಒಟ್ಟು ₹32.4 ಲಕ್ಷ ಕೋಟಿಗಳ ಸಾಲ ವಿತರಣೆಯಾಗಿದೆ. ಇದರಲ್ಲಿ ʻಅತಿಸಣ್ಣ, ಸಣ್ಣ ಮತ್ತು ಮಧ್ಯಮ ಗಾತ್ರದ ಉದ್ಯಮʼಗಳಿಗೆ (ಎಂಎಸ್ಎಂ) ನೀಡಿದ ಸಾಲದ ಪಾಲು ಸುಮಾರು ಶೇಕಡ 20 ರಷ್ಟಿದೆ. ಆದ್ಯತಾ ವಲಯದ ಪೈಕಿ 2024ರ ಹಣಕಾಸು ವರ್ಷದಲ್ಲಿ ಸಾರ್ವಜನಿಕ ವಲಯದ ಬ್ಯಾಂಕ್‌ʼಗಳ (ʻಎಸ್‌ಸಿಬಿ) ಸರಿಹೊಂದಿಸಿದ ʻನಿವ್ವಳ ಬ್ಯಾಂಕ್ ಸಾಲʼದಲ್ಲಿ(ಎಎನ್‌ಬಿಸಿ) ʻಎಂಎಸ್ಎಂಇʼಗಳಿಗೆ ನೀಡಿದ ಸಾಲವು ಶೇ.19.3 ರಷ್ಟಿದೆ. ಈ ಪ್ರಮಾಣವು ಹಣಕಾಸು ವರ್ಷ 2014ರಲ್ಲಿ ಕೇವಲ ಶೇ.15.8ರಷ್ಟಿತ್ತು.

ಎಂಎಸ್‌ಎಂಇ ಘಟಕಗಳಿಗೆ ಆರ್ಥಿಕ ಸ್ವಾತಂತ್ರ್ಯ

ಮೊದಲನೆಯದಾಗಿ, ಈ ಸಾಲ ಒದಗುವ ʻಎಂಎಸ್ಎಂಇʼ ಘಟಕಗಳನ್ನು ಆರ್ಥಿಕವಾಗಿ ಸ್ವತಂತ್ರಗೊಳಿಸುವುದಲ್ಲದೆ, ಅವುಗಳ ಗಾತ್ರವೂ ಬೆಳೆಯುತ್ತಿದೆ. ದತ್ತಾಂಶದ ವಿಶ್ಲೇಷಣೆಯ ಪ್ರಕಾರ, ಒಟ್ಟು ʻಪಿಎಂಎಂವೈʼ ಖಾತೆಗಳಲ್ಲಿ ʻಶಿಶುʼ ವರ್ಗದ ಪಾಲು 2016ನೇ ಆರ್ಥಿಕ ವರ್ಷದಲ್ಲಿ 93% ಇದ್ದದ್ದು 2025 ರಲ್ಲಿ 51.7% ಕ್ಕೆ ಇಳಿದಿದೆ. ಆದರೆ ಇದೇ ವೇಳೆ, ʻಕಿಶೋರ್ʼ ವರ್ಗದ ಪಾಲು 2016 ರಲ್ಲಿದ್ದ 5.9% ಮಟ್ಟದಿಂದ 2025ರಲ್ಲಿ ಶೇ. 44.7ಕ್ಕೆ ಏರಿದೆ. ಅನೇಕ ʻಶಿಶುʼ ಖಾತೆಗಳು ಬೆಳವಣಿಗೆ ಕಂಡಿವೆ ಮತ್ತು ಹೆಚ್ಚಿನ ಸಾಲದ ಮಿತಿಯ ʻಕಿಶೋರ್ʼ ಸಾಲಗಳನ್ನು ಪಡೆದುಕೊಂಡಿವೆ. ಆ ಮೂಲಕ ದೊಡ್ಡ ʻಎಂಎಸ್ಎಂಇʼ ಘಟಕಗಳಾಗಿ ಮಾರ್ಪಟ್ಟಿವೆ ಎಂಬುದನ್ನು ಇದು ಸ್ಪಷ್ಟವಾಗಿ ಸೂಚಿಸುತ್ತದೆ. ವಿತರಿಸಲಾದ ಸಾಲದ ಸರಾಸರಿ ಗಾತ್ರವು ಸುಮಾರು ಮೂರು ಪಟ್ಟು ಹೆಚ್ಚಾಗಿದೆ; 2016ರಲ್ಲಿ ₹39,000 ಗಳಷ್ಟಿದ್ದ ಈ ಪ್ರಮಾಣವು 2025ರಲ್ಲಿ ₹1.05 ಲಕ್ಷಕ್ಕೆ ಏರಿಕೆಯಾಗಿದೆ.

ಎರಡನೆಯದಾಗಿ, ʻಪಿಎಂಎಂವೈʼನ ಮತ್ತೊಂದು ಸಾಧನೆಯೆಂದರೆ, ಮಹಿಳೆಯರು ಮತ್ತು ಸಾಮಾನ್ಯವಲ್ಲದ ಸಾಮಾಜಿಕ ವರ್ಗಗಳ (ಎಸ್ಸಿ/ ಎಸ್ಟಿ/ ಒಬಿಸಿ) ಸಬಲೀಕರಣ. 52 ಕೋಟಿ ʻಪಿಎಂಎಂವೈʼ ಖಾತೆಗಳಲ್ಲಿ, 50% ಎಸ್ಸಿ/ಎಸ್ಟಿ ಮತ್ತು ಒಬಿಸಿ ಸಾಮಾಜಿಕ ವರ್ಗಕ್ಕೆ ಸೇರಿವೆ. ಈ ವರ್ಗಗಳು, ವಿತರಿಸಿದ ಒಟ್ಟು ಸಾಲದ ಮೊತ್ತದಲ್ಲಿ 35% ಪಾಲನ್ನು ಹೊಂದಿವೆ.

ಮೂರನೆಯದಾಗಿ, ಮಹಿಳಾ ಉದ್ಯಮಿಗಳ ಸಾಮಾಜಿಕ ಮತ್ತು ಆರ್ಥಿಕ ಪರಿಸ್ಥಿತಿಗಳನ್ನು ʻಪಿಎಂಎಂವೈʼ ಬದಲಾಯಿಸುತ್ತಿದೆ. ಏಕೆಂದರೆ ಒಟ್ಟು ʻಪಿಎಂಎಂವೈʼ ಖಾತೆಗಳಲ್ಲಿ 68% ಮಹಿಳಾ ಉದ್ಯಮಿಗಳಿಗೆ ಸೇರಿವೆ. ರಾಜ್ಯವಾರು ಪ್ರವೃತ್ತಿಯೂ ಉತ್ತೇಜನಕಾರಿಯಾಗಿದೆ. ರಾಜ್ಯಗಳ ಪೈಕಿ, ಬಿಹಾರದಲ್ಲಿ ಅತಿ ಹೆಚ್ಚು ʻಪಿಎಂಎಂವೈʼ ಮಹಿಳಾ ಉದ್ಯಮಿಗಳು (4.2 ಕೋಟಿ) ಇದ್ದಾರೆ. ತಮಿಳುನಾಡು (4.0 ಕೋಟಿ) ಮತ್ತು ಪಶ್ಚಿಮ ಬಂಗಾಳ (3.7 ಕೋಟಿ) ನಂತರದ ಸ್ಥಾನದಲ್ಲಿವೆ. ಒಟ್ಟು ಖಾತೆಗಳಲ್ಲಿ ಮಹಾರಾಷ್ಟ್ರವು ಮಹಿಳಾ ಖಾತೆದಾರರ ಪಾಲನ್ನು (79%) ಹೊಂದಿದೆ. ಜಾರ್ಖಂಡ್ (75%) ಮತ್ತು ಪಶ್ಚಿಮ ಬಂಗಾಳ (73%) ನಂತರದ ಸ್ಥಾನಗಳಲ್ಲಿವೆ.

ಮಹಿಳಾ ನೇತೃತ್ವದಲ್ಲಿ ಸಬಲೀಕರಣ

ನಾಲ್ಕನೆಯದಾಗಿ, 2020ರ ಜುಲೈ 1ರಂದು ʻಉದ್ಯೋಗ್ ಪೋರ್ಟಲ್‌ʼ ಪ್ರಾರಂಭವಾದಾಗಿನಿಂದ ಅಲ್ಲಿ ನೋಂದಾಯಿಸಲಾದ ಒಟ್ಟು ʻಎಂಎಸ್ಎಂಇʼಗಳ ಸಂಖ್ಯೆಯಲ್ಲಿ ಮಹಿಳಾ ಮಾಲೀಕತ್ವದ ʻಎಂಎಸ್ಎಂಇʼಗಳು 20.5% ರಷ್ಟಿವೆ. ಒಟ್ಟು ʻಉದ್ಯೋಗ್ʼ ನೋಂದಾಯಿತ ಘಟಕಗಳಿಂದ ಸೃಷ್ಟಿಯಾದ ಉದ್ಯೋಗಾವಕಾಶಗಳಿಗೆ ಈ ಮಹಿಳಾ ಮಾಲೀಕತ್ವದ ʻಎಂಎಸ್ಎಂಇʼಗಳ ಕೊಡುಗೆ 18.7% ರಷ್ಟಿದೆ. ಮಹಿಳಾ ನೇತೃತ್ವದ ʻಎಂಎಸ್ಎಂಇʼಗಳಲ್ಲಿ ತಮಿಳುನಾಡಿನಲ್ಲಿ ಅತಿ ಹೆಚ್ಚು (15.7%) ಉದ್ಯೋಗ ಸೃಷ್ಟಿಯಾಗಿದೆ. ಮಹಾರಾಷ್ಟ್ರ (12.1%), ಕರ್ನಾಟಕ ಮತ್ತು ಉತ್ತರ ಪ್ರದೇಶ (8%) ನಂತರದ ಸ್ಥಾನಗಳಲ್ಲಿವೆ. ಹೀಗಾಗಿ, ʻಪಿಎಂಎಂವೈʼನಂತಹ ಆರ್ಥಿಕ ಒಳಗೊಳ್ಳುವಿಕೆ ಯೋಜನೆಗಳು ಮಹಿಳಾ ನೇತೃತ್ವದ ʻಎಂಎಸ್ಎಂಇʼಗಳನ್ನು ಸಬಲೀಕರಣಗೊಳಿಸುವಲ್ಲಿ ಪ್ರಮುಖ ಪಾತ್ರ ವಹಿಸುತ್ತವೆ.

ಐದನೆಯದಾಗಿ, ಮಹಿಳೆಯರಿಗೆ ಹೆಚ್ಚಿನ ಸಾಲವನ್ನು ವಿತರಿಸಿದ ರಾಜ್ಯಗಳಲ್ಲಿ ಮಹಿಳಾ ನೇತೃತ್ವದ ʻಎಂಎಸ್ಎಂಇʼಗಳ ಮೂಲಕ ಉದ್ಯೋಗ ಸೃಷ್ಟಿ ಗಮನಾರ್ಹವಾಗಿ ಹೆಚ್ಚಾಗಿರುವುದನ್ನು ನಮ್ಮ ಸಂಶೋಧನೆ ಸೂಚಿಸುತ್ತದೆ. ಇದು ಆರ್ಥಿಕ ಸಬಲೀಕರಣ ಮತ್ತು ಕಾರ್ಮಿಕ ಮಾರುಕಟ್ಟೆ ಭಾಗವಹಿಸುವಿಕೆಯನ್ನು ಉತ್ತೇಜಿಸುವಲ್ಲಿ ಉದ್ದೇಶಿತ ಹಣಕಾಸು ಒಳಗೊಳ್ಳುವಿಕೆ ನೀತಿಗಳ ಪರಿಣಾಮಕಾರಿತ್ವವನ್ನು ಬಲಪಡಿಸುತ್ತದೆ.

ಆರನೆಯದಾಗಿ, ನಿರ್ದಿಷ್ಟ ಉದ್ದೇಶದ ʻಮುದ್ರಾʼ ಸಾಲ ವಿತರಣೆಗಳು ರಾಜ್ಯಗಳ ಹಣಕಾಸು ಸೇರ್ಪಡೆ ಸ್ಥಿತಿಗತಿಯ ಮೇಲೆ ವಿವಿಧ ಹಂತಗಳಲ್ಲಿ ಹೇಗೆ ಪರಿಣಾಮ ಬೀರಿವೆ ಎಂಬುದನ್ನು ನಾವು ಅನ್ವೇಷಿಸಿದ್ದೇವೆ. ʻಹಣಕಾಸು ಲಭ್ಯತೆʼ (ತೆರೆಯಲಾದ ಬ್ಯಾಂಕ್ ಖಾತೆಗಳ ಸಂಖ್ಯೆ ಮತ್ತು ʻರುಪೇ ಕಾರ್ಡ್ʼಗಳ ವಿತರಣೆಯ ಮೂಲಕ ಗಣನೆ ಮಾಡಲಾಗಿದೆ), ʻಬಳಕೆʼ (ಫಲಾನುಭವಿ ಖಾತೆಗಳಲ್ಲಿನ ಬ್ಯಾಲೆನ್ಸ್ ಮೂಲಕ ಗಣನೆ ಮಾಡಲಾಗಿದೆ) ಹಾಗೂ ʻಸಬಲೀಕರಣʼವನ್ನು (ಮಹಿಳಾ ಮಾಲೀಕತ್ವದ ʻಎಂಎಸ್‌ಎಂಇʼಗಳು) ಅಳೆಯುವ ಸೂಚ್ಯಂಕಗಳನ್ನು ಒಳಗೊಂಡಿರುವ ʻಸಂಯೋಜಿತ ಹಣಕಾಸು ಸೇರ್ಪಡೆ ಸೂಚ್ಯಂಕʼದ ಆಧಾರದ ಮೇಲೆ ಈ ವಿಶ್ಲೇಷಣೆ ಮಾಡಲಾಗಿದೆ.

ಯೋಜನೆಯ ಸಕರಾತ್ಮಕ ಪರಿಣಾಮ

ಅಲ್ಪಸಂಖ್ಯಾತ ಮತ್ತು ಮಹಿಳಾ ಉದ್ಯಮಿಗಳಿಗೆ ಮೀಸಲಾದ ನಿಧಿಗಳಿಂದ ಕಡಿಮೆ ಆರ್ಥಿಕ ಒಳಗೊಳ್ಳುವಿಕೆ ಮಟ್ಟವನ್ನು ಹೊಂದಿರುವ ರಾಜ್ಯಗಳು ಹೆಚ್ಚಿನ ಪ್ರಯೋಜನ ಪಡೆಯುತ್ತವೆ ಎಂಬುದನ್ನು ಈ ವಿಶ್ಲೇಷಣೆ ಬಹಿರಂಗಪಡಿಸುತ್ತದೆ. ಇದು ಕಡಿಮೆ ಸೇವೆಯ ಪ್ರದೇಶಗಳಲ್ಲಿ ಯೋಜನೆಯ ಸಕಾರಾತ್ಮಕ ಪರಿಣಾಮವನ್ನು ಎತ್ತಿ ತೋರಿಸುತ್ತದೆ.

ಏಳನೆಯದಾಗಿ, ಕಳೆದ 10 ವರ್ಷಗಳಲ್ಲಿ, ರಾಜ್ಯಗಳಿಗೆ ಸಾಲ ನಿಧಿ ಹಂಚಿಕೆಯಲ್ಲಿ ಹೆಚ್ಚಳವಾಗಿರುವುದನ್ನು ಪ್ರಾದೇಶಿಕ ವಿತರಣೆ ವಿಶ್ಲೇಷಣೆಯು ತೋರಿಸುತ್ತದೆ. ಮುಖ್ಯವಾಗಿ, ಈ ಹೆಚ್ಚಳವು ಕಾರ್ಯತಂತ್ರದ ಬದಲಾವಣೆಯನ್ನು ಸೂಚಿಸುತ್ತದೆ: ಅಭಿವೃದ್ಧಿ ಹೊಂದಿದ ಪ್ರದೇಶಗಳಿಗೆ ನಿಗದಿಪಡಿಸಿದ ನಿಧಿಯ ಪಾಲು ಇಳಿಕೆಯಾಗಿದೆ. ಆದರೆ ಬಿಹಾರ, ಉತ್ತರ ಪ್ರದೇಶ, ಒಡಿಶಾ ಮತ್ತು ಈಶಾನ್ಯದಂತಹ ಹಿಂದುಳಿದ ಪ್ರದೇಶಗಳಿಗೆ ನಿಧಿಯ ವಿತರಣೆ ಪಾಲು ಹೆಚ್ಚಾಗಿದೆ.

ಈ ಎಲ್ಲಾ ಸಂಶೋಧನೆಗಳು ಒಟ್ಟಾಗಿ ʻಮುದ್ರಾʼ ಸಾಲಗಳು ಆರ್ಥಿಕ ಒಳಗೊಳ್ಳುವಿಕೆಯನ್ನು ಸುಧಾರಿಸುವುದಲ್ಲದೆ ಆರ್ಥಿಕವಾಗಿ ದುರ್ಬಲ ರಾಜ್ಯಗಳನ್ನು ತಲುಪಲು ನೆರವಾಗುತ್ತಿವೆ ಎಂಬುದನ್ನು ಸೂಚಿಸುತ್ತವೆ. ಈ ಅವಳಿ ಪುರಾವೆಗಳು, ಆರ್ಥಿಕ ಸಂಪನ್ಮೂಲಗಳನ್ನು ಹೆಚ್ಚು ಅಗತ್ಯವಿರುವ ಪ್ರದೇಶಗಳತ್ತ ಹರಿಸುವುದನ್ನು ಖಚಿತಪಡಿಸಿಕೊಳ್ಳುವ ಮೂಲಕ ಎಲ್ಲರನ್ನೂ ಒಳಗೊಂಡ ಬೆಳವಣಿಗೆಯನ್ನು ಉತ್ತೇಜಿಸಲು ಯೋಜನೆಯ ಕಾರ್ಯತಂತ್ರವನ್ನು ಒತ್ತಿಹೇಳುತ್ತವೆ.

ಅಲ್ಲದೆ, ʻಅಕೌಂಟ್‌ ಅಗ್ರಿಗೇಟರ್ ನೀತಿಯ ಬಳಕೆʼ ಮುಂತಾದ ʻಎನ್‌ಬಿಎಫ್‌ಸಿʼಗಳ ''''ಡಿಜಿಟಲ್ ಮೊದಲು'''' ಕಾರ್ಯವಿಧಾನವು, ʻಎಂಎಸ್ಎಂಇʼಗಳಿಗೆ ಸಾಲದ ಹರಿವಿಗೆ ಮತ್ತಷ್ಟು ಸಹಾಯ ಮಾಡುತ್ತದೆ. ʻಆರ್‌ಬಿಐʼನ ʻಉದ್ದೇಶಿತ ಏಕೀಕೃತ ಸಾಲ ವ್ಯವಸ್ಥೆʼ (ಯುಎಲ್ಐ) ಉಪಕ್ರಮದಿಂದ ಇದು ಉತ್ತೇಜನ ಪಡೆಯುವ ನಿರೀಕ್ಷೆಯಿದೆ. ʻಯುಎಲ್ಐʼನ ಪ್ರಾಯೋಗಿಕ ಜಾರಿ ವೇಳೆ, ʻಎಂಎಸ್ಎಂಇʼಗಳಿಗೆ ವಿತರಿಸಲಾದ ಸಾಲಗಳ ಸರಾಸರಿ ಗಾತ್ರವು ₹9 ಲಕ್ಷಗಳಾಗಿದೆ. ಆದ್ದರಿಂದ ಇದು ವೆಚ್ಚ-ಪರಿಣಾಮಕಾರಿ ರೀತಿಯಲ್ಲಿ ಪ್ರಕ್ರಿಯೆಯ ಸಮಯವನ್ನು ಗಮನಾರ್ಹವಾಗಿ ಕಡಿಮೆ ಮಾಡುತ್ತದೆ.

(ಲೇಖಕರು 16ನೇ ಹಣಕಾಸು ಆಯೋಗದ ಸದಸ್ಯರು. ಲೇಖಕರ ಅಭಿಪ್ರಾಯಗಳು ವೈಯಕ್ತಿಕವಾದವು)