ಬಿಸಿಲ ಬೇಗೆ, ನೀರಿನ ಬವಣೆ ಮೀರಿಸಿದ ಚುನಾವಣೆ ಕಾವು!

ಕನ್ನಡಪ್ರಭ ವಾರ್ತೆ, ಬೆಂಗಳೂರು

ಮೊದಲ ಹಂತದ ಮತದಾನಕ್ಕೆ ಮೂರು ದಿನ ಮಾತ್ರ ಬಾಕಿಯಿದೆ. 48 ಗಂಟೆ ಮೊದಲೇ ಬಹಿರಂಗ ಪ್ರಚಾರ ಅಂತ್ಯಗೊಳ್ಳುವ ಹಿನ್ನೆಲೆಯಲ್ಲಿ ಅಭ್ಯರ್ಥಿಗಳ ಪ್ರಚಾರ, ತಂತ್ರಗಾರಿಕೆ, ಮನವೊಲಿಕೆಗಳು ಹರಿಬರಿಯಲ್ಲಿ ಸಾಗಿವೆ. ಹಿಂದಿನಂತೆ ಕಂಡಲ್ಲೆಲ್ಲ ಕಟೌಟ್‌, ಫ್ಲೆಕ್ಸ್‌, ಪಕ್ಷಗಳ ಚಿಹ್ನೆಗಳ ತೋರಣ ರಾರಾಜಿಸದಿದ್ದರೂ ಅಭ್ಯರ್ಥಿಗಳ ಪ್ರಚಾರ ಜೋರಾಗಿದೆ. ಇನ್ನೊಂದೆಡೆ ಜನತೆಯ ಚಿತ್ತವೂ ಚುನಾವಣೆಯತ್ತಲೇ ಕೇಂದ್ರೀಕೃತವಾಗಿದೆ.

ಸಾಮಾನ್ಯವಾಗಿ ಬಹುತೇಕ ಅಭ್ಯರ್ಥಿಗಳು ಬೆಳಗ್ಗೆ ದೇವಸ್ಥಾನ, ಪ್ರಾರ್ಥನಾ ಸ್ಥಳಗಳ ಮೂಲಕವೇ ಪ್ರಚಾರ ಆರಂಭಿಸುತ್ತಿದ್ದಾರೆ. ಹರಕೆ ಕಟ್ಟಿಕೊಳ್ಳುತ್ತಿದ್ದಾರೆ. ಮುಖ್ಯ ರಸ್ತೆಯಿಂದ ಹಿಡಿದು ಗಲ್ಲಿಗಳ ನಿವಾಸಿಗಳನ್ನು ಭೇಟಿಯಾಗಿ ಕರಪತ್ರ ಕೊಟ್ಟು ಮತ ಕೇಳುತ್ತಿದ್ದಾರೆ. ಕಬ್ಬನ್‌ ಪಾರ್ಕ್‌, ಲಾಲ್ ಬಾಗ್, ಸ್ಯಾಂಕಿಟ್ಯಾಂಕ್‌ ಸೇರಿ ಉದ್ಯಾನಗಳಿಗೆ ನಸುಕಿನ, ಸಂಜೆಯ ವಾಯುವಿಹಾರದಲ್ಲಂತೂ ಪ್ರಧಾನಿ ಮೋದಿ, ರಾಹುಲ್‌ ಗಾಂಧಿಯಿಂದ ಹಿಡಿದು ಮಾಜಿ ಕಾರ್ಪೋರೇಟರ್‌ಗಳ ಕೆಲಸದ ಬಗ್ಗೆಯೂ ಚರ್ಚೆಯಾಗುತ್ತಿದೆ. ಸಂಜೆ ಹೊತ್ತು ಸೇರುವ ನಿವೃತ್ತರು ಮಾತುಗಳಲ್ಲಿ ಅಭ್ಯರ್ಥಿಗಳ ಪರ ವಿರೋಧ ಬ್ಯಾಟಿಂಗ್‌ ತಾರಕಕ್ಕೇರಿ ಇಳಿಯುತ್ತಿವೆ.

ವಿಜಯನಗರದ ಪ್ರೊ. ಎಂ.ಎನ್‌.ಶ್ರೀಹರಿ ಮಾತನಾಡಿ, ಚುನಾವಣೆ ಬಿಸಿ, ಮಾತುಕತೆಗಳು ಜೋರಾಗಿಯೆ ಇರುತ್ತವೆ. ನಗರದಲ್ಲಿ ಮಳೆನೀರು, ಟ್ರಾಫಿಕ್‌, ಕುಡಿಯುವ ನೀರಿನ ಸಮಸ್ಯೆ ಆದಾಗ ರಾಷ್ಟ್ರೀಯ ಮಟ್ಟದಲ್ಲಿ ಗಮನ ಸೆಳೆವ ಟೆಕ್ಕಿಗಳು ತಮ್ಮ ಜವಾಬ್ದಾರಿಯನ್ನು ಎಷ್ಟರ ಮಟ್ಟಿಗೆ ನಿಭಾಯಿಸುತ್ತಾರೆ ಎಂಬುದು ಅಷ್ಟೇ ಮುಖ್ಯ ಎಂದು ಹೇಳುತ್ತಾರೆ.