ಸಮಾನತೆ ತತ್ವ ಸಾರಿದ ಬಸವಣ್ಣ: ವಕೀಲ ಕರುಣಾನಿಧಿ

ಹೊಸಪೇಟೆ: ಜಗಜ್ಯೋತಿ ಬಸವಣ್ಣನವರು ಕಾಯಕ ತತ್ವದ ಮೂಲಕ ಸಮಾಜದಲ್ಲಿ ಸಮಾನತೆ ಸಾರಿ, ಜಾತಿ ವ್ಯವಸ್ಥೆ ತೊಡೆದು ಹಾಕಲು ಶ್ರಮಿಸಿದರು ಎಂದು ಸಮುದಾಯ ಸಂಚಾಲಕ ಎ.ಕರುಣಾನಿಧಿ ಹೇಳಿದರು.ಬಸವ ಜಯಂತಿ ಪ್ರಯುಕ್ತ ಸಮುದಾಯ ಕರ್ನಾಟಕ ಹೊಸಪೇಟೆಯಿಂದ ಕಾಯಕ ತತ್ವ ಕುರಿತ ಸಂವಾದ ಕಾರ್ಯಕ್ರಮದಲ್ಲಿ ಮಾತನಾಡಿದ ಅವರು, ಕೈಗಾರಿಕಾ ಕ್ರಾಂತಿಯ ಸಂದರ್ಭದಲ್ಲಿ ಕಾರ್ಲ್ ಮಾರ್ಕ್ಸ್ ಬಂಡವಾಳದಾರರು ದುಡಿಮೆಯ ದೋಚುವಿಕೆ ಕುರಿತು ತಿಳಿ ಹೇಳಿದರು. ಇದನ್ನು ತಡೆಯಲು ಉತ್ಪಾದನಾ ಸಾಧನಗಳ ಒಡೆತನವನ್ನು ಸಾಮಾಜೀಕರಣ ಮಾಡುವ ಮೂಲಕ ಸಮಾಜವಾದಿ ವ್ಯವಸ್ಥೆಯ ಮೂಲಕ ಸಾಧ್ಯವಾಗಿದೆ ಎಂದರು.

ಇತಿಹಾಸದುದ್ದಕ್ಕೂ ಕಾಯಕ ಎನ್ನುವುದು ಉಲ್ಲೇಖಿತವಾಗಿದೆಯಾದರೂ ಕಾಲ ಸಂದರ್ಭಗಳ ಬದಲಾವಣೆಯಲ್ಲಿ ಅದನ್ನು ಬೇರೆ ಬೇರೆ ರೀತಿಯಲ್ಲಿ ನಿರ್ವಚಿಸಲಾಗಿದೆ. ವೇದಗಳ ಕಾಲದಲ್ಲಿ ಕರ್ಮಣ್ಯೇವಾಧಿಕಾರಸ್ಥೆ ಎಂದು ಕಾಯಕವನ್ನು ಮಾಡುವುದಕ್ಕಷ್ಟೇ ಸೀಮಿತಗೊಳಿಸಿ ಅದರ ಪ್ರತಿಫಲವನ್ನು ನಿರಾಕರಿಸಿದ್ದರು ಮತ್ತು ಸಮಾಜವನ್ನು ಶ್ರೇಣೀಕರಿಸಿದ್ದರು. ಆದರೆ ಬಸವಣ್ಣನವರು ಕಾಯಕ ತತ್ತ್ವದ ಮೂಲಕ ಸಮಾನತೆ ಸಾರಿದರು ಎಂದರು.

ವಿಚಾರವಾದಿ ಸೌಭಾಗ್ಯ ಲಕ್ಷ್ಮಿ ಮಾತನಾಡಿ, ಕಾಯವನ್ನು ದಂಡಿಸಿ ದುಡಿಯುವುದೇ ಕಾಯಕ ಎಂದರಲ್ಲದೇ ದಾಸೋಹ ಅಂದಿನ ಕಾಲದಲ್ಲಿ ಜನರ ಬದ್ದತೆಯಾಗಿತ್ತು ಎಂದರು.