ಸಿದ್ದು ಘೋಷಿಸಿದ ಗಜೇಂದ್ರಗಡ ತಾಲೂಕಿಗೆ ಬೇಕಿದೆ ಹಲವು ಸೌಲಭ್ಯ

ಎಸ್.ಎಂ. ಸೈಯದ್

ಗಜೇಂದ್ರಗಡ ತಾಲೂಕು ಕೇಂದ್ರವಾಗಬೇಕು ಎಂದು ಮೂರುವರೆ ದಶಕಗಳ ಕಾಲ ಹೋರಾಟ ನಡೆದಿತ್ತು. ಈ ಹಿಂದಿನ ಅವಧಿಯಲ್ಲಿ ಸಿದ್ದರಾಮಯ್ಯ ಮುಖ್ಯಮಂತ್ರಿಯಾಗಿದ್ದಾಗ ತಾಲೂಕು ಕೇಂದ್ರ ಘೋಷಿಸಿದರು. ಆದರೆ ತಾಲೂಕು ಕೇಂದ್ರವಾದ ಮೇಲೆ ಜನರ ನಿರೀಕ್ಷೆಯಂತೆ ಅಭಿವೃದ್ಧಿ ಕಾರ್ಯಗಳು ಆಗದಿರುವುದು ಜನರಲ್ಲಿ ಬೇಸರ ಮೂಡಿಸಿದೆ. ಐದು ವರ್ಷಗಳಲ್ಲಿ ಎಲ್ಲ ತಾಲೂಕು ಮಟ್ಟದ ಕಚೇರಿಗಳು ಆರಂಭವಾಗಿಲ್ಲ. ಹೀಗಾಗಿ ಈ ಬಾರಿ ಬಜೆಟ್‌ನಲ್ಲಿ ಸಿದ್ದರಾಮಯ್ಯ ಅವರು ತಾಲೂಕಿನ ಅಭಿವೃದ್ಧಿಗೆ ಹೆಚ್ಚಿನ ಅನುದಾನ ನೀಡುವರೇ ಎಂದು ಜನ ಕಾಯುತ್ತಿದ್ದಾರೆ.ಗಜೇಂದ್ರಗಡ ತಾಲೂಕು ವ್ಯಾಪ್ತಿಯಲ್ಲಿ ಒಟ್ಟು ೪೨ ಗ್ರಾಮಗಳಿವೆ. ಎರಡು ಹೋಬಳಿ ಕ್ಷೇತ್ರಗಳಿವೆ. ೧೩ ಗ್ರಾಪಂ, ೧ ಪುರಸಭೆ, ೧ ಪಪಂ ಮತ್ತು ತಹಸೀಲ್ದಾರ್ ಕಚೇರಿ, ಉಪನೋಂದಣಿ ಕಾರ್ಯಾಲಯ, ಉಪ ಖಜಾನೆ, ಕೇಂದ್ರ ಸರ್ಕಾರದ ೧ ಅಂಚೆ ಕಚೇರಿ, ತಾಪಂ ಕಾರ್ಯಾಲಯ ಕಾರ್ಯ ನಿರ್ವಹಿಸುತ್ತಿವೆ. ೨೦೧೧ರಲ್ಲಿ ನಡೆದ ಜನಗಣತಿ ಆಧಾರದ ಮೇಲೆ ಒಟ್ಟು ಪುರುಷರು ೮೫,೬೮೭, ಮಹಿಳೆಯರು ೮೫,೧೭೮ ಜನಸಂಖ್ಯೆಯನ್ನು ಹೊಂದಿದೆ. ಸರ್ಕಾರಿ ಹಾಗೂ ಅನುದಾನಿತ ಮತ್ತು ಅನುದಾನಿತ ರಹಿತ ೧೨೭ ಪ್ರಾಥಮಿಕ ಶಾಲೆಗಳು, ೨೯ ಪ್ರೌಢಶಾಲೆಗಳು, ೧೩ ಪದವಿ ಪೂರ್ವ ಕಾಲೇಜುಗಳು, ೪ ಪ್ರಥಮ ದರ್ಜೆ ಕಾಲೇಜು, ೩ ಉಪ ಅಂಚೆ ಕಚೇರಿಗಳು, ೧೨೦ ಅಂಗನವಾಡಿ ಕೇಂದ್ರಗಳು, ೧೧ ಬ್ಯಾಂಕ್‌ಗಳು, ೧ ಕೃಷಿ ಉತ್ಪನ್ನ ಮಾರುಕಟ್ಟೆ, ೩ ಪಶು ವೈದ್ಯಕೀಯ ಆಸ್ಪತ್ರೆ, ೫ ಪ್ರಾಥಮಿಕ ಆರೋಗ್ಯ ಕೇಂದ್ರಗಳಿವೆ.

ಪಟ್ಟಣ ಸೇರಿ ಸುತ್ತಲಿನ ಗ್ರಾಮಗಳ ಕೆರೆಗಳನ್ನು ತುಂಬಿಸುವ ಮೂಲಕ ಈ ಭಾಗದಲ್ಲಿ ನೀರಾವರಿಗೆ ಆದ್ಯತೆ ನೀಡುವ ಜತೆಗೆ ಇಲ್ಲಿನ ಐತಿಹಾಸಿಕ ಸ್ಥಳಗಳನ್ನು ಅಭಿವೃದ್ಧಿಪಡಿಸಿ ಪ್ರವಾಸೋದ್ಯಮಕ್ಕೆ ಒತ್ತು ನೀಡಿದರೆ ಉದ್ಯೋಗ ಸೃಷ್ಟಿಗೆ ನೆರವಾಗಲಿದೆ ವರ್ತಕ ನಾಗರಾಜ ಸವದಿ ಹೇಳುತ್ತಾರೆ.