ಯಮನೂರ ಬಳಿ ಬೆಣ್ಣಿಹಳ್ಳಕ್ಕೆ ಸ್ನಾನಘಟ್ಟ!

ಶಿವಾನಂದ ಗೊಂಬಿ

ಯಮನೂರು ಚಾಂಗದೇವರ ಭಕ್ತರಿಗೆ ಸಿಹಿ ಸುದ್ದಿ. ಬೆಣ್ಣಿಹಳ್ಳದಲ್ಲಿ ಸ್ನಾನ ಮಾಡುವವರಿಗೆ ಕರ್ನಾಟಕ ನೀರಾವರಿ ನಿಗಮವು ಸ್ನಾನಘಟ್ಟ ನಿರ್ಮಿಸಿಕೊಡಲಿದೆ. ಇದಕ್ಕಾಗಿ ಬೆಣ್ಣಿಹಳ್ಳ ಪ್ರವಾಹ ತಡೆ ಯೋಜನೆಯಲ್ಲಿ ಈ ಬಗ್ಗೆ ಪ್ರಸ್ತಾಪಿಸಲಾಗಿದೆ. ಧಾರವಾಡ ಜಿಲ್ಲೆಯಲ್ಲಿ ಯಾವುದೇ ನದಿಯಿಲ್ಲ. ಆದರೆ, ಮಳೆಗಾಲದಲ್ಲಿ ಉಕ್ಕೇರುವ ಬೆಣ್ಣಿಹಳ್ಳ-ತುಪರಿಹಳ್ಳ ಯಾವುದೇ ನದಿಗಿಂತ ಕಮ್ಮಿಯಿಲ್ಲ. ಮಳೆಗಾಲದ ಮೂರ್‍ನಾಲ್ಕು ತಿಂಗಳು ಇವುಗಳ ಉಗ್ರಾವತಾರದಿಂದ ಇಡೀ ಹುಬ್ಬಳ್ಳಿ, ನವಲಗುಂದ, ಕುಂದಗೋಳ, ರೋಣ, ನರಗುಂದ ಸೇರಿದಂತೆ ಆರು ತಾಲೂಕುಗಳನ್ನು ಅಕ್ಷರಶಃ ಹೈರಾಣು ಮಾಡುತ್ತದೆ.

ಆದರೆ, ಬರುವಂತಹ ಭಕ್ತಗಣ ಸ್ನಾನ ಮಾಡುವುದಕ್ಕೆ ಯಾವುದೇ ಬಗೆಯ ಸೌಲಭ್ಯ ಇಲ್ಲದ ಕಾರಣ ಹಳ್ಳದಲ್ಲೇ ಸ್ನಾನ ಮಾಡುತ್ತಾರೆ. ಅಲ್ಲೇ ಬಟ್ಟೆ ಬಿಟ್ಟು ಹೋಗುವುದರಿಂದ ಟ್ರಕ್‌ಗಟ್ಟಲೇ ಹಳೆ ಬಟ್ಟೆಗಳ ರಾಶಿ ಎಲ್ಲೆಂದರಲ್ಲಿ ಬಿದ್ದಿರುತ್ತವೆ. ಇಲ್ಲಿ ಬಿದ್ದಿರುವ ಬಟ್ಟೆಗಳ ರಾಶಿ ಸ್ವಚ್ಛತೆಯನ್ನೇ ಕೆಲ ಸಂಘಟನೆಗಳು ಮಾಡಿದ್ದುಂಟು. ಇಲ್ಲಂದರೆ ಅಲ್ಲಿನ ಸ್ಥಳೀಯ ಆಡಳಿತಕ್ಕೆ ಸ್ವಚ್ಛಗೊಳಿಸುವಷ್ಟರಲ್ಲೇ ಸುಸ್ತು ಸುಸ್ತಾಗುತ್ತಿತ್ತು. ಭಕ್ತ ಗಣವೂ ಯಾವುದೇ ಬಗೆಯ ಸೌಲಭ್ಯವಿಲ್ಲದೇ ಸ್ನಾನ ಮಾಡಲು ಪರದಾಡಬೇಕಾಗುತ್ತದೆ.

ಈ ಎಲ್ಲ ಸಮಸ್ಯೆಗಳಿಗೆ ಪರಿಹಾರವೆಂಬಂತೆ ಯಮನೂರಲ್ಲಿ ಸ್ನಾನಘಟ್ಟ ನಿರ್ಮಿಸಲು ಕರ್ನಾಟಕ ನೀರಾವರಿ ನಿಗಮ ಯೋಚಿಸಿದೆ. ಬೆಣ್ಣಿಹಳ್ಳ ಪ್ರವಾಹ ತಡೆಗಾಗಿ ₹ 1610 ಕೋಟಿ ಯೋಜನೆ ಸಿದ್ಧಪಡಿಸಿದೆ. ಯೋಜನೆಗೆ ರಾಜ್ಯ ಸರ್ಕಾರ ಅಸ್ತು ಎಂದಿದೆ. ಜತೆಗೆ ₹ 200 ಕೋಟಿ ಕೂಡ ಬಿಡುಗಡೆಗೆ ಒಪ್ಪಿಕೊಂಡಿದೆ. ಈ ನಡುವೆ ಈ ಯೋಜನೆಯನ್ನು ಕೇಂದ್ರ ಸರ್ಕಾರದ ಸಿಡಬ್ಲ್ಯೂಸಿಗೂ ಕಳುಹಿಸಿದೆ. ಅದು ಕೂಡ ಒಪ್ಪಿದರೆ ಕೇಂದ್ರದಿಂದಲೂ ಇದಕ್ಕೆ ಅನುದಾನ ಲಭ್ಯವಾಗಲಿದೆ.

ಇದೀಗ ರಾಜ್ಯ ಸರ್ಕಾರ ಕೊಡಲು ಒಪ್ಪಿರುವ ₹ 200 ಕೋಟಿಯಲ್ಲಿ ಏನೇನು ಕಾಮಗಾರಿ ಕೈಗೆತ್ತಿಕೊಳ್ಳಬೇಕು ಎಂಬುದನ್ನು ನಿರ್ಧರಿಸಲು ನ. 27ರಂದು ಕರ್ನಾಟಕ ನೀರಾವರಿ ನಿಗಮದ ಕಚೇರಿಯಲ್ಲಿ ಸಭೆ ನಡೆಯಲಿದೆ. ಈಗಿರುವ ಮೂಲಗಳ ಪ್ರಕಾರ 148 ಕಿಮೀ ವ್ಯಾಪ್ತಿಯಲ್ಲಿ ಕಾಲುವೆ ಪೈಕಿ 142 ಕಿಮೀ ಕಾಲುವೆ ಹೂಳೆತ್ತುವುದು. ಏರಿ ನಿರ್ಮಾಣ, ಇದರೊಂದಿಗೆ ಯಮನೂರಲ್ಲಿ ಸ್ನಾನಘಟ್ಟ ನಿರ್ಮಾಣ ಈಗಲೇ ಮಾಡಬೇಕೋ ಅಥವಾ ಎರಡನೆಯ ಹಂತದ ಅನುದಾನ ಬಿಡುಗಡೆಯಾದ ಮಾಡಬೇಕೋ ಎಂಬುದು ಕೂಡ ಚರ್ಚೆಯಾಗಿ ನಿರ್ಧಾರವಾಗಲಿದೆ. ಮೂಲಗಳ ಪ್ರಕಾರ 142 ಕಿಮೀ ವ್ಯಾಪ್ತಿಯೊಳಗೆ ಯಮನೂರಲ್ಲಿನ ಬೆಣ್ಣಿಹಳ್ಳವೂ ಸೇರುತ್ತದೆ. ಅದರ ಕಾಲುವೆ ಹೂಳೆತ್ತುವಾಗಲೇ ಸ್ನಾನಘಟ್ಟ ನಿರ್ಮಿಸುವುದು ಸೂಕ್ತ ಎಂದು ಅಧಿಕಾರಿಗಳು ವರದಿಯಲ್ಲಿ ತಿಳಿಸಿದ್ದಾರೆ ಎನ್ನಲಾಗಿದೆ. ಹೀಗಾಗಿ ಮೊದಲ ಹಂತದ ಕಾಮಗಾರಿಯಲ್ಲೇ ಸ್ನಾನಘಟ್ಟ ಕೂಡ ಸೇರುವ ಸಾಧ್ಯತೆ ಎಂದು ಮೂಲಗಳು ತಿಳಿಸುತ್ತವೆ.