ಜೆಸ್ಕಾಂಗೆ ಶಾಕ್ ನೀಡಿದ ಕಾರಟಗಿ ಪುರಸಭೆ

ಕಾರಟಗಿ:

ಪುರಸಭೆ ಅಧ್ಯಕ್ಷೆ ರೇಖಾ ಆನೆಹೊಸೂರು ಅಧ್ಯಕ್ಷತೆಯಲ್ಲಿ ನಡೆದ ಸಾಮಾನ್ಯ ಸಭೆಯಲ್ಲಿ ಜೆಸ್ಕಾಂ, ಆರೋಗ್ಯ ಇಲಾಖೆ, ರಾಜ್ಯ ಸಾರಿಗೆ ಸಂಸ್ಥೆ, ಶಿಶು ಅಭಿವೃದ್ಧಿ, ಸಮಾಜ ಕಲ್ಯಾಣ ಇಲಾಖೆ, ಪಶು ಆಸ್ಪತ್ರೆ ಹಾಗೂ ನೀರಾವರಿ ಇಲಾಖೆ ಅಧಿಕಾರಿಗಳಿಗೆ ಸದಸ್ಯರು ಪಕ್ಷಭೇದ ಮರೆತು ತರಾಟೆ ತೆಗೆದುಕೊಂಡರು. ಇನ್ಮುಂದೆ ಕೆಲಸವನ್ನು ಎಚ್ಚರದಿಂದ ಮತ್ತು ದೂರು ಬಾರದಂತೆ ನಿಗಾ ವಹಿಸುವಂತೆ ತಾಕೀತು ಮಾಡಿದರು.

ಹೊಸ ಮೀಟರ್‌ ಉಚಿತವಾಗಿ ಅಳವಡಿಸದೆ ಕೆಲ ವಾರ್ಡ್‌ಗಳಲ್ಲಿ ಹಣ ವಸೂಲಿ ಮಾಡುತ್ತಿರುವ ದೂರುಗಳು ಬಂದಿವೆ. ಈ ಪದ್ಧತಿ ಬಿಡದಿದ್ದರೆ ನಿಮಗೆ ಶಾಕ್‌ ನೀಡಬೇಕಾಗುತ್ತದೆ ಎಂದು ಸದಸ್ಯರು ಎಚ್ಚರಿಸಿದರು.

ಸದಸ್ಯರಿಗೆ ಮಾಹಿತಿ ನೀಡಿ:

ಪ್ರಮುಖ ವೃತ್ತ, ವಿವಿಧ ಸ್ಥಳಗಳಲ್ಲಿ ಸಿಸಿ ಕ್ಯಾಮೆರಾ ಅಳವಡಿಸಬೇಕು. ದೇವಿಕ್ಯಾಂಪ್‌ನಲ್ಲಿ ಪಾರ್ಕ್ ಹಾಗೂ ಜಿಮ್ ನಿರ್ಮಾಣ, ಕಾಲುವೆ ಮೇಲೆ ಸುಗಮ ಓಡಾಟಕ್ಕೆ ಸೇತುವೆ, ಹೊಸದಾಗಿ ಟ್ರ್ಯಾಕ್ಟರ್‌ ಖರೀದಿಸುವುದು, ಸ್ವಚ್ಛ ಭಾರತ ಅಭಿಯಾನ ೨.೦ ಅಡಿ ಐಇಸಿ ಚಟುವಟಿಕೆ ಕೈಗೊಳ್ಳಲು, ವಾಹನಗಳಿಗೆ ೫ ಚಾಲಕರನ್ನು ನೇಮಿಸಿಕೊಳ್ಳುವ ಕುರಿತು ಸೇರಿದಂತೆ ಹೊಸ ವಸತಿ, ವಾಣ್ಯಿಜ್ಯ ವಿನ್ಯಾಸಗಳಿಗೆ ಅನುಮೋದನೆ ನೀಡುವ ಕುರಿತು ಮತ್ತು ಪೌರ ಕಾರ್ಮಿಕರಿಗೆ ನೀಡುವ ಬೆಳಗಿನ ಲಘು ಉಪಹಾರದ ವ್ಯವಸ್ಥೆಯನ್ನು ಇಂದಿರಾ ಕ್ಯಾಂಟೀನ್‌ನಿಂದ ಪೂರೈಸಲು ಕುರಿತು ಸಭೆಯಲ್ಲಿ ನಿರ್ಧರಿಸಲಾಯಿತು.