ಅನುದಾನದ ಕೊರತೆ; ಸಸಿ ವಿತರಣೆ ಸ್ಥಗಿತ

ಗಂಗಾಧರ ಹಿರೇಮಠ

ಅನುದಾನದ ಕೊರತೆ ಹಿನ್ನೆಲೆಯಲ್ಲಿ ಈ ಬಾರಿ ಹೊಸ ಸಸಿಗಳ ಬೆಳೆಸಲು ಸರ್ಕಾರ ಅನುಮತಿ ನೀಡಿಲ್ಲ. ಹೀಗಾಗಿ ಈ ವರ್ಷ ಕೆಬಿಜೆಎನ್‌ಎಲ್ ಅರಣ್ಯ ಇಲಾಖೆ ಪ್ರತಿವರ್ಷ ರೈತರಿಗೆ ಕಡಿಮೆ ದರದಲ್ಲಿ ವಿತರಿಸುತ್ತಿದ್ದ ಸಸಿಗಳನ್ನು ಈ ಬಾರಿ ವಿತರಣೆ ಮಾಡುತ್ತಿಲ್ಲ.

ಸಸಿಗಳನ್ನು ದೇಶದ ನಾನಾ ನರ್ಸರಿಗಳಿಂದ ತರಿಸಿ ಇಲ್ಲಿ ಮಣ್ಣು, ಗೊಬ್ಬರ, ಗೋಮೂತ್ರ ಸೇರಿ ವಿಶೇಷ ಆರೈಕೆಯೊಂದಿಗೆ ಇಲ್ಲಿ ಸಸಿಗಳನ್ನು ಬೆಳೆಸಲಾಗುತ್ತಿತ್ತು. ಕೆಬಿಜೆಎನ್‌ಎಲ್ ಅರಣ್ಯ ಇಲಾಖೆಯ ಆಲಮಟ್ಟಿಯ ಮೂರು, ರೋಡಲ್ ಬಂಡಾ ಹಾಗೂ ಬೀಳಗಿ ತಾಲೂಕಿನ ಕುಂದರಗಿ ಸೇರಿ ಐದು ನರ್ಸರಿಗಳಲ್ಲಿ ಇವುಗಳನ್ನು ಬೆಳೆಸಿ ರೈತರಿಗೆ ಕಡಿಮೆ ಬೆಲೆ ಮಾರಲಾಗುತ್ತಿತ್ತು.

2017-18 ರಿಂದ ಪ್ರತಿ ವರ್ಷ 10 ಲಕ್ಷ ಸಸಿಗಳನ್ನು ಇಲ್ಲಿ ಬೆಳೆಸಿ ಮಾರಲಾಗಿದೆ. ಒಂದು ಸಸಿಗೆ ₹1ದಿಂದ 10ವರೆಗೂ ಇರುತ್ತಿದ್ದವು. ಹೀಗಾಗಿ ಬೇಡಿಕೆ ಹೆಚ್ಚಿತ್ತು. ಆದರೆ ಕಳೆದ ವರ್ಷ ಸಸಿಗಳ ಬೆಲೆ ₹30ಗೆ ಹೆಚ್ಚಳ ಮಾಡಲಾಗಿತ್ತು. ಇದರಿಂದ ಕಳೆದ ವರ್ಷ ಬೆಳೆಸಲಾದ 6 ಲಕ್ಷ ಸಸಿಗಳಲ್ಲಿ 50 ಸಾವಿರಕ್ಕೂ ಅಧಿಕ ಸಸಿಗಳು ಮಾರಾಟವಾಗದೇ ಉಳಿದಿವೆ ಎಂದು ವಲಯ ಅರಣ್ಯಾಧಿಕಾರಿ ಮಹೇಶ ಪಾಟೀಲ ಮಾಹಿತಿ ನೀಡಿದರು. 2017-18 ರಿಂದ ಇಲ್ಲಿಯವರೆಗೆ 60.67 ಲಕ್ಷ ಸಸಿಗಳನ್ನು ಬೆಳೆಸಿ ಮಾರಲಾಗಿದೆ.ಸಸಿಗಳನ್ನು ಬೆಳೆಸಲು ಕನಿಷ್ಠ 200 ಕ್ಕೂ ಅಧಿಕ ಅರಣ್ಯ ದಿನಗೂಲಿಗಳು ಕಾರ್ಯನಿರ್ವಹಿಸುತ್ತಿದ್ದರು ಎಂದು ಮಾಹಿತಿ ನೀಡಿದರು.ಈ ಬಾರಿ ಹೊಸ ಸಸಿಗಳ ಬೆಳೆಸಲು ಸರ್ಕಾರ ಅನುಮತಿ ನೀಡಿಲ್ಲ. ಹೀಗಾಗಿ ಈ ವರ್ಷ ಕೃಷ್ಣಾ ಮೇಲ್ದಂಡೆ ಯೋಜನೆಯ ಅರಣ್ಯೀಕರಣದಲ್ಲಿ ಯಾವುದೇ ಪ್ಲ್ಯಾಂಟೇಶನ್ ಬೆಳೆಸಲಾಗುತ್ತಿಲ್ಲ. ಜತೆಗೆ ಪ್ರತಿವರ್ಷ ರೈತರಿಗೆ ವಿತರಿಸುತ್ತಿದ್ದ ಸಸಿಗಳು ಕೂಡ ವಿತರಿಸುತ್ತಿಲ್ಲ.ಕಳೆದ ವರ್ಷ ಉಳಿದ ಸಸಿಗಳನ್ನು ಮಾರಲಾಗುತ್ತದೆ.

-------

------